Thursday, July 12, 2007

البعد جفاء ولا اشتياق!!



إذا أردت شيئا بشدة فأطلق سراحه فإن عاد إليك فهو لك وإن لم يعد فهو لم يكن لك من البداية!!
دي جملة قرأتها في توقيع عضو ما في أحد المنتديات , مش عارف الكلام دا منطقي ولا لا؟ .. محتار .. تفتكروا لو بحب شيء أو شخص ولا أقدر على الإحتفاظ به في الوقت الحالي أطلق سراحه وأعيش على أمل أن يعود؟ وإن لم يعد وطحنته الظروف في تلك الحالة , هل أنساه وأقول لم يكن لي من البداية ؟ ولا دا هيكون تقصير مني لأني لم أشاركه معركة الحياة عشان نحتفظ ببعض وتركته يحارب طواحين الهواء وحده وفي الآخر .. بح !!.
فيه مثل بيقول البعيد عن العين بعيد عن القلب!!
يادي النيلة!! آدي مثل تاني عكس الأولاني بيقول لا تترك من تحب لأن البعد بيعلم الجفاء. طيب وإذا كان أحد الطرفين خايف يقرب في الوقت دا إعتقادا منه بإن القرب دلوقتي سيخلق المشاكل , وكان الطرف الثاني محتاج الأولاني في نفس ذات الوقت عشان يقدر ينتصر على الظروف دي .. يبقى ايه الحل؟!
من الآخر .. بحبها وبتحبني والظروف بتقول دلوقتي مينفعش , هي تريد أن تبتعد الآن على أمل أن يحمل لنا المستقبل الأمل ونكمل حياتنا سوا , يعني عايزة تحمي حبها بطريقتها.
وأنا عايز أحميه بطريقتي , عايزها تكون جنبي دلوقتي قبل بعدين عشان أقدر أحارب الظروف دي وأنتصر عليها .
الخوف مسيطر علينا إحنا الإتنين , هي خايفة إن الظروف تفرق ما بينا , وأنا مش خايف من الظروف , لكني خايف البعد يكون سكينة تدبح إحساسنا ببعض .. ايه الحل؟؟

4 comments:

nohamy said...

دى اساسا انا سمعته فى ظرف طارق

بس تعالى نتكلم بوجهة نظر تانية
لو واحد بيقرب من حد و الحد ده مرتبط بحد تانى
إذا أردت شيئا بشدة فأطلق سراحه فإن عاد إليك فهو لك وإن لم يعد فهو لم يكن لك من البداية

مشربية said...

هي خايفة إن الظروف تفرق ما بينا , وأنا مش خايف من الظروف , لكني خايف البعد يكون سكينة تدبح إحساسنا ببعض
احساس جميل يا صبري و الله و خوفك جميل
بس هاقولك علي حاجة افضل احلم و اللي تحلم بية اعملة بس خلي بالك متبقاش لحوح ع شان الطرف التاني ردة اللي هيكون سكينة تدبح احساسك
و حمدالله علي السلامة في كتابة البوست

Anonymous said...

كلمات جميلة مؤثرة جدا وأثرت فيا .. بس هل ده كلام عنك انت ولا عمومى ..
حاسس أنه عن نفسك بس أنت ما وضحتش ده ... عموما أرى إن الجملة اللى بدأت بيها كلامك فعلا مظبوطه جدا
لو لى قدر ونصيب مع من تحب ستدور الايام لتجمعكما مرة اخرى حتما ..

وأنا لا أرى أن كل من هو بعيد عن العين بعيد عن القلب ..
يمكن يوكن المثل صحيح فى حالات بس فى حالات تانية بيبقى غلط لأنه مش قاعدة

سيب من تحب على راحتها وتأكد أنها لو مكتوبة لك حتما ستعود لك .. هذا ما أؤمن به فعليا ...

مروة عوض said...

امممممممم فعلا كل واحد بيحب بطريقة وكل واحد بيعبر عن حبه بطريقة مختلفة عن الطرف الأخر..
انا عموما مش مع ان اى اتنين بيحبوا بعض يبعدوا عشان الظروف انا شايفة انهم المفروض يواجهوا الظروف دي مع بعض
لكن لو الظروف متسمحش بده ممكن البعد لفترة حسب رغبة احد الطرفين...ولو ربنا كاتب انهم يكملوا مع بعض هيكملوا تحت أي ظرف
وانا مش مع المقولة دي لأني شايفه فيها تكاسل وشماعة على الاقدار والحظ..المفروض الواحد يعمل اللى عليه ويتمسك بحبه وفى الاخر كل شىء نصيب بس ساعتها مش هنكون في ندم اننا كان فى ايدينا حاجة نعملها و معملنهاش
صبري ربنا يوفقك فى كل خطوة فى حياتك