Monday, September 24, 2007

!!..تاج جديد من آخر قرصان





لو قالولك اختارعصر من عصور مصر عشان تعيش فيه تختاراى عصر وفى عهد اى حاكم واشمعنى؟

عصر الرئيس السادات رحمه الله .. حابب اقرب اوي من الشخصية دي لأنها غامضة ومحيرة ..

عمل الكتير لمصر لكن في ناس كتير محتارة في سياسته.. عايز اعرف مين هو السادات بالظبط


اول اولوية فى حياتك عيلتك ولا شغلك ولا اصحابك؟


حبي !!


ايه اكتر حاجة بتحبها فى رمضان؟


رمضان


اوصف ليا اجمل فطار ممكن تفطره؟


رز وصينية بطاطس مي إيد أمي وعرقسوس وقمر الدين وقطايف


لو انت حاكم على مجموعة من الافراد حتكون عادل؟ طب حتعمل ايه عشان تتأكد انك حاكم عادل؟


همشي في الشارع من غير حراسة و هقتضي بسيدنا عمر رضى الله عنه


اللى بيبوظ الحكام ..نفسهم ولا الشعب ولا الحاشية المقربة؟؟


النفس أمارة بالسوء والحاشية بتدور على مصلحتها والشعب بيسكت ع الذل


يبقى اكيد التلاته .. وضيف عليهم النحس


مين اكتر اعلامى مصرى بتحترمه؟؟


أكيد مش تامر أمين


لو ممكن تشتغل شغلانة تانية غير اللى انت بتشتغلها او كنت بتشتغلها كنت تتمنى تبقى ايه؟؟


معرفش .. بس عمري ما تخيلت غير إني أكون إعلامي


ايه تانى بلد تتمنى تعيش فيها بعد مصر؟؟


الإمارات


اوصف ليا ترتيبات اجمل فرح ممكن تحضره؟؟


هيبقى فرحي ودا عشان هكون فرحان به أوي .. دا اذا حصل واتجوزت البنت اللي بحبها يعني


عموما أنا بتخيله في جنينة القصر اللي هسكن فيه ان شاء الله :> وهيكون فرح نهاري زي الخواجات


وهجيب محمد فؤاد يحيى الفرح عشان بحبه أوي ولو ينفع عمر خيرت عشان العروسة يبقى فل أوي


بتراعى كلام الناس والقيل والقال؟ لو اه او لو لا قولى ليه؟


مش دايما .. على حسب درجة اقتناعي باللي بعمله


صحيت من النوم مالقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنة حتبقى سعيد؟


أكيد لا عشان مش هكون لسه حققت أمنيتي في إني أقتني كاميرا ديجيتال


السعادة هى؟؟


الحب


عندك امل ؟ اسبابك ؟


الحاجة الوحيدة اللي حيلتي هي الأمل .. عندي أمل أعمل حاجة


لما تحب تهرب من كل شىء بتروح فين؟؟


مش بهرب


امتى اول مرة اخدت فيها نفس طويل كده وقلت بينك وبين نفسك ياااااه انا فعلا كبرت؟؟


طول عمري شايف نفسي كبير


لما بتعمل عمل خيرى بيكون ايه هو دافعك الاول؟؟


رضا ربنا وإني أكون قدوة لغيري في حاجة زي دي


بتشرب سجاير؟لو الاجابة اه ايه شعورك لو شفت ست بتشرب سجاير وليه؟


آه بشرب .. عادي .. الغلط والحرام بيكون على الراجل والست .. انا بشرب سجاير ..

عارف انها غلط وحرام بس اكيد انا مش بايظ .. ومش شرط هي كمان تكون بايظة ومنحلة عشان بتشرب سيجارة


بتعرف ايدك اليمين من الشمال ازاى؟


حافظهم


ايه اكتر اله موسيقية بتحبها؟


كل الآلات الشرقي


فى رأيك ليه الذوق والنخوة اتعدموا؟


متعدومش لسه .. بس انقرضوا ولو عايز السبب .. فتش عن الفقر


ايه الحاجة اللى لو حصلتلك تبقى سعيد قوى؟


اذا ربنا كرمني بالبنت اللي بحبها وكملتا حياتنا سوا


تختار يبقى عندك ارض زراعية ولا اجنص عربيات ولا كام عمارة ولا فلوس فى البنك؟


فلوس في البنك عشان هعمل بيهم مشروع تاني خالص


البحر ولا النيل؟؟؟


عيون حبيبتي


مركب ولا طيارة؟


لما أركب عربية الأول ابقى ارد عليك


عاقل ولا مجنون؟


متقلب


تقرا كتاب ولا تتفرج على فيلم؟


هتفرج ع الفيلم لأنه مش هيتعاد تاني قريب .. وبعدين اقرأ الكتاب


بتمرر التاج لمين؟؟


مصطفى فتحي , محمد العسكري، حسين هاشم

Saturday, September 22, 2007

!!..أنا شاب تافه



ليه كتير من الناس يتحرجون من اظهار شخصياتهم الحقيقية , ليه دايما محاولات التجميل لرسم وايضاح صفة غير موجودة؟! .. في مرة كنت بتكلم مع بعض المذيعين الشباب اللي بيقدموا برنامج شديد السطحية والتفاهة , مش عارف ليه حسيت ان الناس دي مدعية تقافة , بيظهروا انهم مجتهدين وبيحاولوا يقرأوا رغم ان عقلياتهم وتصرفاتهم ومناقشاتهم السطحية في البرنامج تدل على العكس تماما..!!

مش مطلوب من كل انسان في الدنيا انه يكون أسامة انور عكاشة ولا ابراهيم عيسى في ثقافته , ولا من المفروض كمان اننا نكون مغيبين سطحيين ولا نفقه شيء , لكن أقسم لكم أن يكون الانسان تافه ولا يحاول أن يثبت العكس هو أفضل وأكثر احتراما لنفسه وللآخرين من اللي بيحاول يدعي المعرفة.

اللي بيحزنني وبيجنني إن شباب مصر ليسوا بتلك السطحية ولا السذاجة كما تحاول البرامج الشبابية أن تؤكده وما يحاول الكثيرون من الأجيال السابقة تأكيده, صحيح أن هناك نسبة من الشباب مغيبة ونسبة أكبر محبطة لكن السبب هو الكبت اللي بيمنع الشباب من المشاركة الفعالة في الحياة السياسية , السبب هو الكوسة والرشوة اللي اصبحت مسيطرة على كل تعاملاتنا في المجتمع ,أصبح اللي له ظهر واللي عنده واسطة مؤهلا أكثر من الموهوب أو صاحب التخصص..!!

الشباب اللي بتجيلهم فرصة مش على مقاسهم لأن الظروف والواسطة وحسابات أخرى ساعدتهم للحصول على الفرصة بيحسوا بالفجوة الواسعة اللي بين امكانياتهم وثقافتهم وبين المكانة اللي الواسطة اتاحتها لهم,ربما لذلك يلجئون للتصنع وارتداء ثياب المعرفة والثقافة ليثبتوا أنهم لم يأخذوا موقعهم هذا بضربة حظ وأنهم مجتهدون.

ربما أقبل إذا حاول هؤلاء أن يجتهدوا بجد , وأن يملئوا الفجوة بإضطلاع حقيقي وإكتساب خبرات تساعدهم على ملئ المكانة التي وضعوا فيها ولن أقول بالطبع أنهم وصلوا اليها, لكني بالطبع لا أقبل أبدا أن يدعي هؤلاء بما ليس فيهم ولا هم أهل له.

لو أن أصدقائي من مقدمي تلك البرامج الشبابية يصارحون أنفسهم بأن ما يقدموه هو على سبيل الهزار وتضييع الوقت , فلا مانع من ان تكون مساحة على الشاشة للترويح والهزار , لكن أن تكون تلك الصفة هي السائدة في كل برنامج شبابي يظهر في الفترة الأخيرة فهذه كارثة.

أيضا البرامج الشبابية في حاجة إلى عمق أكثر بلا أن تتخلى عن الروح الشابة , في حاجة أيضا للنزول إلى الشباب في الشارع وعمل تقارير من الشارع الحقيقي وليس من المولات والأندية الكبرى.

البرامج الشبابية في حاجة إلى الغاء ذلك الخط الأحمر السخيف الذي يحيط بأي موضوع شائك يجب الحديث عنه فحين يلجأ أي برنامج شبابي لمناقشة أمر شائك يظهر الخط الأحمر ومعه أو بسببه تظهر المناقشة سطحية واهية.


الشباب في حاجة لبرنامج حقيقي يقدم لهم القيمة الحقيقية بلا استخفاف أو تسطيح وأيضا بلا فذلكة أو كلكعة للأمور , الشباب محتاج برنامج يكون صاحبه بجد , صاحبه اللي ينصحه بلغته البسيطة واللي يساعده بدون إعطاء أوامر في تخطي مرحلة مهمة من حياته بنجاح.

Sunday, August 19, 2007

بحبكم أووووووي




مش عارف ابدأ موضوعي ازاي ؟!


عايز اتكلم عن اتنين بحبهم جدا


ولاد حلال بجد


الاتنين عرفتهم عن طريق الصحافة


كانوا السبب بعد ربنا سبحانه وتعالى اني اشتغل في المجال دا


لكن دورهم موقفش لحد هنا


ربنا سبحانه وتعالى دايما بيسبب الأسباب


والاتنين دول ربنا جعلهم سبب لكل خطوة كويسة بعملها في حياتي


الأول على قدر خبرته وعلاقاته بيفتح لي مجالات للشغل


وشايف فيا اللي انا مش شايفه في نفسي


والتاني هو البنزين اللي بيحركني


ورغم كده انا حزين


كنت فاكر اني اجدع انسان على وجه الارض


لكن لقيت اللي يعلموني يعني ايه جدعنه


ويعني ايه ايثار ويعني ايه حب بجد


حب ميعرفش مصلحة


ربما اتهم انا اني بحبهم لأن مصلحتي معاهم


ورغم ان دا مش صحيح الا اني مش هقدر انفي التهمة


لكن هما بيحبوني لوجه .. بيساعدوني لوجه الله


الاتنين دول أنا بحبهم بجد


ونفسي يحسوا بحبي ليهم زي ما هو موجود جوايا


مصطفى فتحي وتهامي


ربنا يكرمكم ويحبب فيكم خلقه


ويجعلكوا دايما سبب خير لكل اللي تعرفوهم

Sunday, August 12, 2007

فهمت عنيك




الرباعية دي هي بتحبها


اعرف عيون هي الجمال والحسن


واعرف عيون تاخد القلوب بالحب


وعيون مخيفة وقاسية وعيون


كتير وبحس فيهم كلهم بالحزن

Sunday, August 5, 2007

اذاعة حريتنا .. اسمع برامجنا



برنامج قلم سنون


كتير مننا بيحبوا الصحافة الشبابية وبيكون نفسهم يتناقشوا مع كتابها في الكلام اللي بيجهوه لكم عبر القلم, وبعض مننا ميعرفش حاجة عن الصحافة الشبابية ودول كمان هيسمعونا لأننا هنستضيف كتاب الصحافة الشبابية وكمان هتعرفوا من خلالنا إيه هي الصحافة الشبابية و اية مشاكل التى تواجه شباب الصحفيين و ما هي أحلامهم و أفكاركم ؟ كل ده فى برنامجكم قلم سنون نقوم في كل حلقة باختيار موضوع شبابي مميز ونعرض له مع استضافة كاتبه ومناقشته فيه
برنامج أكتر من الحب
برنامج يهتم باستضافة عشاق ومجانين المشاهير في كل المجالات ممن يتعاملون مع الإنترنت، نتحدث معهم حول حبهم لهذا المشهور ولماذا يتعلقون به لهذا الحد، نحاول أيضا انتقاد من يحبون ورصد ردود أفعالهم حول هذا النقد



قلم سنون تقديم صبري و تهامي





تقدر تحمل حلقات البرامج






حلقة قلم سنون براء أشرف




حلقة أكتر من الحب د/أحمد خالد توفيق

حلقة أكتر من الحب محمد منير





تقدر تسمع الاذاعة من هنا



Go! Horytna Radio

Tuesday, July 17, 2007

!!مبروك .. بقيت عاطل




أخيرا وبعد عناء 6 سنين جامعة بدأتها في قسم الوثائق والمعلومات بآداب عين شمس ونهيتها في قسم


اللغات والترجمة الفورية بأكاديمية المقطم .. تخرجت بالتقدير الشعبي اللي كنت متوقعه بس لما لقيت الفارق بين


تقديري ودرجة جيد %1 بس


اتخنقت شوية :lol:


المهم إنها بداية لمرحلة اثبات الذات وتكوين نفسي عشان عندي أمل أتجوز في يوم من الأيام وأمارس حياتي الطبيعية


نفسي أعمل حاجة ويكون ليا بصمة في الحياة وحاسس إن ربنا سبحانه وتعالى هيكرمني واقدر احقق أحلامي


مبروك ليا ومبروك للجامعة لأنها كسبت خروجي منها


ادعولي ربنا يوفقني في اللي نفسي فيه والأجر والثواب عند الله :lol:
على فكرة انا مش عاطل اوي يعني .. دلوقتي بقضي فترة تدريب في اذاعة حريتنا
ويمكن انجح في التدريب دا وأكون موجود معاهم .. ادعولي تاني

Thursday, July 12, 2007

البعد جفاء ولا اشتياق!!



إذا أردت شيئا بشدة فأطلق سراحه فإن عاد إليك فهو لك وإن لم يعد فهو لم يكن لك من البداية!!
دي جملة قرأتها في توقيع عضو ما في أحد المنتديات , مش عارف الكلام دا منطقي ولا لا؟ .. محتار .. تفتكروا لو بحب شيء أو شخص ولا أقدر على الإحتفاظ به في الوقت الحالي أطلق سراحه وأعيش على أمل أن يعود؟ وإن لم يعد وطحنته الظروف في تلك الحالة , هل أنساه وأقول لم يكن لي من البداية ؟ ولا دا هيكون تقصير مني لأني لم أشاركه معركة الحياة عشان نحتفظ ببعض وتركته يحارب طواحين الهواء وحده وفي الآخر .. بح !!.
فيه مثل بيقول البعيد عن العين بعيد عن القلب!!
يادي النيلة!! آدي مثل تاني عكس الأولاني بيقول لا تترك من تحب لأن البعد بيعلم الجفاء. طيب وإذا كان أحد الطرفين خايف يقرب في الوقت دا إعتقادا منه بإن القرب دلوقتي سيخلق المشاكل , وكان الطرف الثاني محتاج الأولاني في نفس ذات الوقت عشان يقدر ينتصر على الظروف دي .. يبقى ايه الحل؟!
من الآخر .. بحبها وبتحبني والظروف بتقول دلوقتي مينفعش , هي تريد أن تبتعد الآن على أمل أن يحمل لنا المستقبل الأمل ونكمل حياتنا سوا , يعني عايزة تحمي حبها بطريقتها.
وأنا عايز أحميه بطريقتي , عايزها تكون جنبي دلوقتي قبل بعدين عشان أقدر أحارب الظروف دي وأنتصر عليها .
الخوف مسيطر علينا إحنا الإتنين , هي خايفة إن الظروف تفرق ما بينا , وأنا مش خايف من الظروف , لكني خايف البعد يكون سكينة تدبح إحساسنا ببعض .. ايه الحل؟؟

Monday, June 18, 2007

!!..عجبي


تصوير : مصطفى فتحي



علقت فى المسمار قناع مهزلة
و معاه قناع مأساة بحزنه ابتلا
بصيت لقيتهم يشبهوا بعضهم
واهو ده العجب يا ولاد .. و إلا فلا
عجبى

Thursday, June 14, 2007

!!..حوار معايا .. قبل القمة برضه


طبعا مش هقدر اوصف لكم قد ايه صبورتي دا شاب جامد ومفيش منه اتنين


عشان كدا توفيرا للكلام هسيبكم للحوار الشنيع اللي أجرته معايا


سارة الاسكافي او سوسة كما تصف نفسها خير وصف





مين ينفع كمعبود للنساء غير صبرى سراج عندى الرغبة اوقعك فى شر اعمالك قول ياابنى قول

مممممممممم من الفنانين يعني

اه

رشدي اباظه وانور وجدي واحمد رمزي وكمال الشناوي
وسامة ورجولة وجاذبية وروح حلوة

امتى خدت اخر قرار؟

من ساعتين كدا .. قررت ابدأ حواري معاكي وبدون ما اكون محضر اسئلة كالعادة

عندك كام صديق؟

ممممممممم .. مش هتصدقي لو قلتلك انهم كتير قياسا بالمعنى الحقيقي لكملة صديق 9 ايه رأيك

طيب حلو اوى ربنا يخليهملك ايه هو بقى معنى الصداقة عند صبرى؟

صديقي يعني انا

عندك كام سنة

23


ايه اللى عشته فيهم اكتر الايام الحلوة وللا الايام المرة؟

كلمة مر دي صعبة اوي بس اللي اقدر اقوله لك ان اسوأ سنتين في عمري هما السنتين اللي دخلت فيهم كلية الآداب قسم مكتبات

هنغلط اهه

على فكرة انا بتكلم بجد .. بس مش لعيب في القسم .. لا دا لاني دخلته غصب عني

يبقى اعترف ان مستواك اقل منه

احتمال برضه



ايه منظورك للحياه بما انك على وشك التخرج؟

المستقبل يعني ؟

ايون

بصي يا ستي الاول كنت بفكر بشكل عادي جدا يعني برسم احلامي الكتير ومش قلقان من تحقيقها .. لكن دلوقتي الوضع مختلف لأني حبيت وطبعا بقى مطلوب مني الانجاز عشان اصبح فيه مسئولية ودلوقتي انا في حالة ضغط عصبي شديد بجد لأني لسه مش عارف هبدأ ازاي بعد التخرج وياترى هقد انجز ولا لا .. المفروض اني هبدأ اتحرك فعليا بعد اقل من 20 يوم .. فبفكر فيما بعد الامتحانات اكتر من تفكيري في الامتحانات نفسها

وبما انك حبيت .. صبرى بيشوف الحب ازاى؟


الحب طريق وحضن أمان ودافع للنجاح واجمل احساس في الكون على رأي اليسا

افهم من كده ان حبيبتك شبه اليسا

لا شبه حلا

يارب اشوفكوا بتمضوا عقد الفيلم
قصدى عقد الجواز

يارب ياختي يارب

طيب فى كلمتين وبسرعة عشان نخلص الحلقة الاولى من اعترافات صبرى سراج
قولى فى كلمتين بالظبط شايف حبيبتك ازاى؟

مممم بيقولوا مراية الحب عامية

طيب قول الكلمتين واختارهم عشان ماتروحش فى داهية

شايفها فرحة وامل في بكرة وتقدري تقولي انها نفسي اللوامة
حبيبتي ساعدتني كتير اني اتخلص من حاجات غلط كنت بعملها زي السجاير وانتظم في الصلاة وكده يعني
وعلى فكرة وشها حلو عليا اوي

اكيد وشها حلو عشان عرفتنى

وتهامى؟

تهامي دا حكايته حكاية .. هقولك سر
رغم ان تهامي دا صاحب فضل عليا بعد ربنا سبحانه وتعالى لكن انا كنت غبي ولو ينفع اقول لفظ اسوأ من كدا كنت قولت لأني ظلمته في فترة .. يمكن هو ميعرفش دا .. لكن برضه هقول له سامحني يا صاحبي

الاذاعة؟

حلم حياتي اكون مذيع تليفزيوني له نجومية بسبب برامجه الهادفة والرسالة اللي بيقدمها بجانب اني نفسي اكون مشهور ومينفعش اكون مذيع راديو لاني للاسف مملكش كاريزما في صوتي عشان اكون اذاعي

والصحافة؟

انا صحفي بالصدفة وكنت ايام المدرسة بكره حصة التعبير رغم حبي الشديد للغة العربية .. صحيح حبيت الصحافة لكن ما زلت احلم بإني اكون مذيع تليفزيوني

اول واحد اشوفه بيكره التعبير زيى انت عبقرى ياصبرى والله

بتحب مين اكتر مامتك وللا باباك وماتقوليش الاتنين زى بعض عشان مش هصدق؟

ابويا لكن على فكرة علاقتي بيهم مش قوية اوي لأن افكارنا مختلفة وهما مش بيقتنعوا غير برأيهم للأسف


انضربت كام مرة بالقلم وللا انت كنت بتقضيها علقة كاملة (سؤال محرج)

ياما خدت علق على فكرة انا اتضربت كتير جدا

لو شفت خناقة فى الشارع تتخانق وللا انت بتاع تفاهم

زمان كنت بلطجي اوي بس الخناق مش بيربي غير العداوة ومش بيحفظ كرامة حد
واللي يقول ان التفاهم ضعف يبقى انسان خايب

ياجامد

طيب اخر سؤال
نفسك فى ايه دلوقتى حالا غير انك تقولى غورى من وشى

اقوم اشوف الماتش.. ثانيا طبعا ان الاهلي يكسب

طب قوم بس قولى عايز مين بعدك

نفسي استضيف أميرة حسن لكن معرفهاش

Wednesday, June 6, 2007

!!..بنت الإسكافي .. حوار قبل القمة




هي شخصية قمة في الطيبة وخفة الدم .. حين تتحدث معها تشعر انك امام
روح لا تعرف للضغينة او لثقل الدم عنوانا.. هي بإختصار صاحبة مدونات فقاعة هواء ليمتد
الآنسة سوسة
عايزك تردي على اسألتي وانتي بترقصي ..الرقص مفيد جدا في كشف الحقائق
بماذا تشعرين الآن بالضبط في هذا الوقت الظريف ؟


اشعر بالبرد

وهل البرد دا ناتج عن احساس داخلي ام انك من أثرياء القوم الذين يملكون هذا الجهاز المسمى بالتكييف ؟



لا الحمد والشكر لله وحده
انا انسانة بردانة بطبعى لا تشعر بحرارة الجو الا لما بتتمشى فى الشمس بتاعة الساعة 12 الضهر


نفهم من كدا انك انسانة تعاني من انيميا وتحتاجين لتبرعات السادة المدونين ؟


لا دى مش مسألة انيميا دى مسألة ان الاوضة بتاعتى اصلا مناخها بارد واحيانا بيبقى بارد قارص يميل الى هطول الامطار اما بالنسبة لللتبرعات فانا مش هرفض الهدايا بالذات وانا على وش تخرج وعايزة الحق اشوفلى رصيف ايجار جديد


معنى كده انكوا ساكنين على خط الاستواء؟


خط الاستواء ده فى الشارع اللى جنبنا احنا دلوقتى مقضيينها كارت..!!

ايه الفرق بين يوسف معاطي وسارة الاسكافي ؟


سؤال وجيه..
سارة بتحب تقرا ليوسف معاطى انما يوسف معاطى مايعرفش سارة الاسكافى للاسف .. فاته نص عمره والله


ويا ترى يوسف معاطي لو في يوم قرأ لسارة الاسكافي تتخيلي هيكون ايه انطباعه ؟


بلاش عشان الرقابة


تفتكري ان الادب الساخر في مصر مش واخد حقه ؟

مشفتش حاجة بس الادب الساخر عموما منتشر بس مش واخد حقه بصراحة

طيب مين اهم كتاب الادب الساخر دلوقتي .. غير بنت الاسكافي طبعا ؟
حلو اسم بنت الاسكافي دا :>


حلوة بنت الاسكافى دى .. شوف ياسيدى
انا ماقريتش فى الادب الساخر كتب كاملة او لكتاب معينين كتير
وكل ثقافتى فيها من المقالات المجمعة من هنا ومن هناك
بس احسن حد برتاح انى اقراله هو يوسف معاطى ومن بعده احمد رجب
وبعده بلال فضل بس مش كتير يعنى بالصدف

دايما بيقولوا الكوميديا هي اسرع وسيلة لتوصيل المعلومة ولتحفيز الناس ومع ذلك بتقولي ان الادب الساخر مش
منتشر بعكس السينما طبعا .. تفتكري التضاد دا ايه سببه ؟
فى فرق كبييييييييييير جدا بين الادب والادب اللى بيتقدم فى السنيما على الاقل فى الفترة اللى عشتها فى الدنيا
لان ببساطة لو انت مسكت كتاب فيه مقالات ساخرة او قصص ساخرة واتحولت لافلام او مسلسلات هتلاقيها مختلفة بشكل كبير فى زمن اصبحت فيه المادة بتتغلب على المضمون فبالتالى اللى بيتقدم فى السينما مش ادب
بالنسبة بقى لموضوع الانتشار والشهرة فبطبيعة الشعب المصرى ساخرة من كل حاجة حتى من نفسه

الشعب المصري دايما ساخر من نفسه وناقد لها بشكل مثير للعجب فمن الطبيعي وانتي راكبة الاوتوبيس مثلا تلاقي الليشعوب البسيطة اللي عندنا ال يقول دا شعب بهايم .. عمر المصريين دول ما هينضفوا ابدا .. وكلام من هذا القبيل .. اشمعنى احنا دونا عن سائر عادة العجيبة دي ؟

سؤال وجيه..
بس يمكن احتمال والله اعلم نظرا لاننا احفاد الفراعنةواكيد متوارثين منهم صفة الفرعنة
وبما اننا توارثنا صفة الفرعنة على مدى الاف السنين فشئ طبيعى اننا نكون شعب مابيعجبناش العجب
احتمال!!


الامثال الشعبية جزء من الموروث الأدبي الساخر ..هل عندك شغف حقيقي للإلمام بها , ولماذا يتعامل المصريون مع الأمثال دي كما لو انها دساتير مقدسة رغم انها من صنع بشر مثلنا وتحتمل جانب كبير من الخطأ ؟

انا بحب اسمعها والله وافكر فيها وجت ليه لانى عمرى ماهعرف جت ازاى الا لو لفيت على شعب مصر كله وبرضه مش هعرف بس للاسف الزهايمر والمكتبات مش مساعدينى انما انا الحمد لله بقالى 3 سنين اسم مرجعين فيهم الامثال كلهم وناوية بعد الامتحانات ان شاء الله اجيبهم بقى واعيش حياتى معاهم

ولماذا يتعامل المصريون مع الأمثال دي كما لو انها دساتير مقدسة رغم انها من صنع بشر مثلنا وتحتمل جانب كبير من الخطأ ؟


اقولك انا بقى اولا عشان احنا ناس مش بتحب تتعب نفسها فى حاجة
تانى حاجة بقى ان محدش بيحاول يفكر المثل ده اتقال امتى وليه نفس ردى عليك كمان فى موضوع انا مش رومانسى فى حكاية البنت اللى زى القمر وزى اللى بياخد ايات من القرآن يفسرها على مزاجه والى هتمشى مع مصلحته عادى بقى ناس رايقة ياابنى

حوارنا دا قبل مباراة القمة بوقت قليل جدا .. صفي لنا شعورك الآن


انا الحمد لله شعورى انى بتمنى من كل قلبى الاهلى يكتسح الماتش وبناء على ذلك فانا محضرة الفشار والاعلام والترنج الاحمر

ايه اكتر صفة بتحبيها في سارة ؟

سؤال غريب.. يمكن بحب فيا انى باخد الامور ببساطة حتى لو كانت مصايب وانى بتعصب اتعصب واهدى بسرعة

هو وجيه مشي ولا ايه ؟

بيغيروا شيفتات

واكتر صفة بتكرهيها في سارة ؟

العصبية والنسيان .. الاتنين مدمرين حياتى تقريبا ان مكانش بالتاكيد

اكتر اغنية بتحبيها

مش اغنية واحدة انا ليا فى الاغانى الهاديةبس الاكتر الاغانى اللى تلاقى فيه المطرب او المطربة بيدوا حبيبهم على دماغه وبيذلوه بموت فى النوع ده من الاغانى

على كدا بتحبي محمد فؤاد وسميرة سعيد

اوى جدا

ايه اكتر حاجة بتستفزك ؟


الناس اللى مابتقبلش الراى الاخر والدكاترة لما بيقولولى احفظى

مين هي سارة الاسكافي ؟

بنى ادماية زى كل البنى ادمين

هسألك نفس السؤال اللي سألته لتهامي .. ايه اللي بيشد البنات لعمر الشريف ؟

والله مااعرفش لانى مش شايفة فيه حاجة تشد بصراحة فمش هقدر افيدك باكتر من انها تفاهة بنات

مين فارس احلام سارة او ايه هي مواصفاته

هو اهم حاجة يكون فيه 3 حاجات
انه يكون عارف ربنا عشان يراعى ربنا فيا
الحاجة التانية يكون طيب ودول انقرضوا تقريبا
تالت حاجة واللى مستحيل هيكون انه يفهمنى يعنى من الاخر مش موجود ..
اه ياريت كمان مايتريقش على المكتبات

تفتكري بعد 20 سنة هتكون سارة الاسكافي وصلت لفين


الله اعلم

اختاري ضيف الحوار اللي بعدك

انت

ازاي يعني

مش شغلى انا عايزة صبرى سراج

Saturday, June 2, 2007

!!..لا مؤاخذة .. مبحبش نجيب محفوظ



2007مجلة كلمتنا - يونيو

تخيل نفسك قاعد على القهوة أمامك زبادي خلاط وفي يدك ليّ الشيشة التفاح وأصدقائك يتراصون حولك في صورة كربونية حيث المشروب أمامهم والليّ في أيديهم تنفسون جميعا دخان الغضب والكبت والعيشة واللي عايشنها في إيقاع منتظم بين كركرة وكحة ( رغم انكم فرافير بتشربوا تفاح ) وتنظرون أو تبحلقون في السماء السوداء بلا أي هدف .. وإذ فجأتن تلقي إلى أصدقائك الأوغاد بتلك القنبلة التي ستجعلهم يتخلون عن نظرة البلاهة في سماء المدينة اللي لسة سوداء وينظرون إليك بميكس نظرات بين استعجاب و دهشة واستنكار ما تقوله أيها الغبي الجاهل ثم تتحول تلك النظرات في ثوانٍ قليلة إلى نظرات غضب وتبدأ الأصوات في العلو بعبارات الشتيمة والنعت بالجاهل والغبي وقاموس شتائم الشباب المتطور دائما والذي يمنع حياء هذا الإصدار من ذكره .
لقد نجحت يا عزيزي في أن تثير أصدقائك وتجعل لجلستكم على كراسي القهوة معناً وحياة ولو كانت عبثية ..
يا جماعة أنا مبحبش نجيب محفوظ ولا اللي بيكتبه..!!
نسيت أن أخبركم أن الأوغاد أصدقائي ( اللي انت مش محتاج تتخيل إنهم أصدقائك ) ينقسمون إلى عدة فئات فمنهم طلاب الكليات النظرية والذين يعتمدون على مصدر ثقافي واحد بجانب الريس برايز وهو ملازم ليلة الإمتحان التي يشتروها من المكتبة الكائنة بجوار الكلية.
الفئة الأخرى هم طلبة كليات القمة وطبعا لا داعي لإخباركم بأن تلك الكليات زي الفريك متحبش شريك فهم دائما منكفين على الملازم والكتب وفسحتهم الوحيدة هي المسافة التي يقطعوها بين المعمل الفلاني والسكشن العلاني ويا سلام لو ساعة فضا تجمعهم مع معشوقتهم الشيشة التفاح على القهوة التي تبعد عن منزلهم بمحطة لزوم الإحتياط عشان محدش من قرايبهم أو من محبي الفتنة يشوفهم..!! اذن هم أيضا لا وقت لديهم ولا رغبة في القراءة.
النوع الثالث هم الأوغاد الذين أنهوا فترة تعليمهم وتفرغوا تماما للقهوة والشيشة ووصلة النت وهؤلاء طبعا كل علاقتهم بالقراءة الآن هي تذكر أيام الدارسة وفترة الطفولة التي قضوها في أحضان ميكي جيب وفلاش..!!
ولأنك يا عزيزي انسان تتميز بالخبث فقد ألقيت عليهم جملتك الخالدة وأنت تعلم علم اليقين كل المعطيات السابقة وأنهم جميعا تنحصر علاقتهم بنجيب محفوظ كما تنحصر أنت علاقتك بالسجاير المارلبورو ( تسمع عنها بس ولو الظروف تسمح بتشتريها فرط ) هم أيضا علاقتهم بنجيب محفوظ لا تتعدى مشاهدة أفلام بين القصرين وقصر الشوق وحط عليهم الكرنك وطبعا انتوا عارفين شعبية الفيلم الأخير عند الشباب عاملة ازاي.
نعود إلى صورة الأوغاد وهم ينظرون إليك شزرا وندوس paly عشان المشهد يكتمل.. أعلاهم صوتا وأسلطهم لسانا يخرج عليك بالكلمة الإعتراضية الشهيرة ويرمي بالليّّ على الترابيزة ويقول لك : متحبش مين ؟؟!! وانت تعرف إيه عن نجيب محفوظ يا جاهل انت ؟! .. الآخر يرسم ابتسامة سخرية مصطنعة وبهدوء الإنسان المثقف الواثق يحدثك ودخان الشيشة يخرج من فمه وأنفه بشكل متقطع : وإيه اللي مش عاجبك في نجيب محفوظ يا حبيبي؟ .. ودون أن ينتظر وغد آخر أن أنطق ( وكنت بصراحة مش ناوي أرد فقد كان كل همي هو مراقبة ردود أفعال أصدقائي ) ياعم هو عمره قرأ لنجيب محفوظ أصلا .. يابني بقر انت ( موجها حديثه إلى العبد لله ) نجيب محفوظ دا أديب عالمي واخد جايزة نوبل ويكفيك فخرا يا جاهل إنه عاش طفولته هنا في العباسية ( حاكم أخوكم من العباسية).
يا جدعان أنا مبحبش نجيب محفوظ متهيألي دا حقي ( قلتها ببرود شديد مصحوب بإبتسامة استفزت اصدقائي ) وقبل أن يخرج علي أحدهم بمصطلح جديد من قاموس الأباحة التفت إلى رجل أربعيني العمر ذو لحية طويلة ووجه أسمر: إنت عندك حق يا أستاذ .. الله ينور عليك ثم التفت موجها حديثه إلى الأوغاد: حد فيكم قرأ أولاد حارتنا وشاف البلاوي اللي فيها عشان تدافعوا عن نجيب محفوظ أوي كده .. حد فيكم أصلا قرأ ولو رواية واحدة لنجيب محفوظ .. لعلمكم أنا مبحبش لا نجيب محفوظ ولا يوسف السباعي ولا إحسان عبد القدوس ..
ساعتها قررت أنا أو قررت أنت أن ينتهي الحوار رحمة بالأوغاد وقمت بالقاء جملة خالدة أخرى : الحساب يا سعيد.
على فكرة وعشان محدش يفهمني غلط كل الأساتذة اللي سبق ذكرهم لهم مني كامل الإحترام والتقدير لكن كل الحكاية إني كنت عايز أنكش إصحابي واثبت لنفسي حاجة .
في الآخر بقى هسأل سؤال صغير .. هما أصحابي عملوا كده ليه ؟؟!!

Tuesday, May 29, 2007

!!..تأملات وطنية طحن



قاعد مع نفسي ع القهوة بشرب شاي وبضرب حجرين المساء والسهرة , أفكر في التغيرات العظيمة اللي طرأت فجأتن على حياتي وفجأتن دي رغم ان بعضها كان بسابق ترتيب , ومحدش يسأل ازاي!! , حبيت ودا أول حدث عظيم في حياتي - ماشي كلنا بنحب - , ثانيا بطلت السجاير , محدش يقوللي ما انت نازل ع القهوة تشيش , عشان أكيد هرد عليكم وأقول ان الشيشة دي لزوم كتابة الموضوع..!!
ذهبت بتأملاتي من المحيط الشخصي إلى المحيط الوطني - ودا طبعا غير الحزب الوطني - وقلت ياسلام لو التغيرات العظيمة اللي أصابت حياتي تبهت ع الوطن الوطنطن ويحصل فيه هو كمان تغيير !! وعشان محدش يفهمني غلط التغييرات اللي اقصدها تغييرات بسيطة جدا لكسر الملل مش أكتر , مش هتكلم عن تغيير حكومة أو رئيس لأني عارف إننا شعب أصيل مبيهونش عليه العشرة , بس إيه رأيكم نعمل نيولوك للوطن ؟!
اسم مصر:
في المائة سنة الأخيرة تغير اسم مصر3 مرات , الأول كان اسمها المملكة العربية المتحدة , وبعدين أصبحت الجمهورية العربية المتحدة برضه , وبعد كدا بقت جمهورية مصر العربية , العجيب إن الأسم دا استمر كتير أوي دون السعي لتغييره!! فقلت ليه لأ ما نغيره , اشمعنى هو يعني , تفتكروا نسمي مصر إيه , بس عايزين اسم روش يناسب الألفية الجديدة والعولمة والحوارات دي.
العلم :
كمان علم مصر كانوا بيغيروه كتير وبعد ما كان أخضر مزهزه .. جعلوه بألوانه الحالية وعليه صقر قريش وبعد ما الصقر طار جابوا مكانه طائر العقاب اللي لسه مطارش لحد دلوقتي .
أعتقد اللون الأخضر قديما كان دليل على إن مصر بلد زراعية وطبعا الهلال والصليب معروف الهدف منهم . طيب العلم الحالي بألوانه الأحمر والأبيض والأسود ماهو المقصود من ألوانه؟؟
صديقي الوغد الشعبي الطبقة قال لي بفصاحة لسانه وفهلوته المعتادة : يا معلم الأحمر دمنا والأبيض قلبنا والأسود مش مننا!! .. مش عارف هل ممكن نغير العلم دلوقتي ونخليه ( pink) مثلا عشان هو الموضه دلوقتي وطبعا عشان نعطي ايحاء بإن الحياة في بلدنا لونها بمبي.
النشيد الوطني :
من يوم ما دخلت المدرسة وكل يوم في طابور الصباح نردد نفس الكلام بنفس اللحن ولا احنا فاهمين بنقول ايه ولا حاسين الكلام من أصله!!
بلادي بلادي بلادي .. لكي حبي وفؤادي .. مصر يا أم البلاد ..أنت غايتي والمراد .. وعلى كل العباد .. كم لنيلك من أيادي.
يا حلاوة المولد .. تفتكروا ان فيه حد في سنة 2007 ممكن يغني الكلام دا بصيغته الحالية دي ؟! .. على فكرة انا مش بعيب في الكلام ولا جودته .. فقط بتكلم عن الوقت اللي احنا فيه والوقت اللي اتكتب فيه الكلام دا من ييجي 100 سنة, ليه منفكرش نغير نشيد بلدنا ,ونخليه حاجة كدا خفيفة ولذيذة من مزيكتنا اللي بنسمعها وبنحبها , ليه فرض علينا نشيد بلادي وكمان بتوزيعته الموسيقية العقيمة اللي عملها محمد عبد الوهاب!! .. أنا عايز النشيد يتغير ونستبدله بأغنية يبقى إنت اكيد في مصر !! والله انا شايفها معبرة أكتر من بلادي بلادي , حتى لو خرج علينا البعض وقال بسذاجة الكلام!!
عارفين التغيرات البسيطة والساذجة دي لو حد غيري من اللي صوتهم مسموع فكر فيها وقالها , هتكون أزمة ملهاش مثيل ومجلس الشعب هيسيبه من مناقشة طلبات الإحاطة حول أفلام السينما ويركز في الطلبات الجديدة بعمل نيولوك للوطن , وهيخرج علينا السيد صفوت الشريف ويصرح إن لولا المناخ الديموقراطي في مصر مكنش فيه حد قدر يفكر بالجرأة دي وإن دي حاجة تحسب للنظام المبارك!! , ومش بعيد يخرج علينا من يكفر صاحب الأفكار دي ويقول انه خرج على آلهتنا ... احنا خلاص فقدنا القدرة على التفكير والتغيير .. للأسف .

Friday, May 25, 2007

!!..مواعداني وطال الانتظار


Photo: Ahmed El Masry


عديت العشرين بسنوات قليلة , ولسه مستنيها ..!! يا ترى اتأخرت ولا أنا اللي مستعجل ؟
, من 3 إعدادي وانا بشوف العيال زمايلي بيحبوا وكل واحد فيهم مظبط واحدة من مدرسة البنات
اللي بينا وبينها سور , رغم كده كنت من القليلين جدا جدا اللي مش بيحبوا بنات!
وبعد ما طلعنا ثانوي وبدأت مرحلة الإحساس بالرجولة وتبعيتها من تزويغ من المدرسة
والتدخين والفرجة ع الأفلام الثقافية وخلافه ,
بدأت القلة القليلة اللي محبوش في اعدادي يحبوا في ثانوي
وكل واحد من زمايلي وأصحابي كان مظبط وعايش
حياته , وأنا زي ما أنا لا خطوة قدام ولا خطوة ورا..!!
طلعنا من الثانوي للجامعة وبقى كل الناس اللي مأنتمين ومظبطين
بيدوروا ع الجديد في الجامعة , والعبد لله قرر هو كمان انه يظبط في الجامعة
ويبقى شاب بجد .
في أول يوم دراسة ضربت الطقم الجديد والنضارة ام عدسات زرقاء ( كانت موضة وقتها )
وفلقت شعري من النص واتكلت ع الجامعة ,
دخلت الكلية راسم وش التناكة لأني كنت عارف وقتها ( اخوكم فتك )
ان البنات بتموت في الشاب التقيل .
عدى يوم والتاني واخوكم معرفش اي مزة من مزز الجامعة
الا واحدة كان بينه وبينها مجرد نظرات فهم بعد كده انها اعجاب من البنت دي
بس بعد ما كانت الفرصة راحت.
شوية شوية انمدجت في الجامعة واتصاحبت على شلة كانوا كارهين تناكتي في الاول
لكنهم بعد كده عرفوا اني انسان كويس من جوه بس دخلتي عليهم كانت غلط ,
تخلخلت في دهاليز الجامعة والشلة اكتر وكانت لسه دماغي بتدور على واحدة
تملى الفراغ العاطفي اللي جوايا وكنت بحس ( بيني وبينكم ) بشوية حقد ناحية زمايلي
المرتبطين بس مش لأنهم مرتبطين , لأ عشان انا مش عارف اعمل زيهم.
شوية شوية ومع حبة التجارب اللي الواحد مر بيهم وشوية الكتب اللي قريتهم
بدأت أفكر في الموضوع دا بشكل مختلف واحس ان اللي مخليني مش قادر آخد خطوة زي دي هو الخوف
, بس مش الخوف من ان البنت تصدني او لا , مش دي الفكرة ,
انا خايف لأن ليا اخت بنت مش حابب اني اشوفها في موقف زي دا
– طبعا انا مش بتكلم عن علاقة الحب المحترمة , انا بتكلم عن التظبيط.
منكرش اني لحد دلوقتي لسه دماغي مشغولة بفكرة الحب وقلبي مازال بيعاني من حالة الفراغ دي
, ومبقتش عارف هل طريقة اصحابي في البحث عن الحب صح ,
ولا انتظاري انا لأميرة أحلامي هو اللي صح؟ ,
برضه انا مش جاي هنا اشكي لكم همي لكني جاي اقول لها ( هي بس )
تعالي بقى وكفاية تقل عليا , انا محتاجك اكتر منك ,
مستنيكي بنار الشوق , مستنيكي.

Monday, May 21, 2007

!!..حتى الشمس مبقتش غير رسمة على حيطان البيت



!!..حتى الشمس مبقتش غير رسمة على حيطان البيت

Saturday, May 19, 2007

!!..محمد التهامي .. الأول



محمد التهامي .. من غير كلام كتير
مهما قولته مش هوفيه حقه
هو صديقي العزيز
ووش الخير واطيب انسان في الدنيا
وصاحب قرار دخولي عالم التدوين
وعالم الصحافة من اساسه

بيانات بطاقتك الشخصية بتقول ايه ؟



اسمى محمد مواليد 7/12 السويس


ما هي اهتماماتك ؟


القراءة و السينما و التلفزيون بمختلف فروعهم


ما مشروعاتك القادمة؟


بحضر مع دار سوسن مجموعة قصصية أسمها بني أدم مع وقف التنفيذ يارب تعجبكم
و عندى أمتحانات أدعو لى بقي


الكورة ..

أهلاوي ولا زملكاوي ؟


اهلاوي عشان عائلة بابا اهلاوية ..غير كدة معرفيش


مين أكتر لاعب بتحبيه ؟


هادي خشبة اسمع انه محترم


و أكثر لاعب بتكرهيه ؟


إبراهيم سعيد

ما رأيك في تقليد بعض الأندية لجمهور الأهلي وانشاء روابط لنبذ التعصب ؟


شئ كويس


من هو أحسن لاعب في مصر هذا العام ؟


احمد حسام


شوية فن..

آخر فيلم شفته وعجبك ؟


شقة مصر الجديدة

آخر أغنية عجبتك ؟


انا ولا عارف تامر حسنى


أغنية مستفزة؟


دي كتير اوي


أفضل مطرب ومطربة؟


محمد منير
فيروز

وأسوأ مطرب ومطربة ؟


الوحش مش بعرف أسمه

رأيك في أيمن بهجت قمر ؟


له اغانى كتير جميلة

وليد سعد ؟


ملحن جامد بس يبطل غنا


نصر محروس ؟


منتج ذكى اوي


تفتكر نصر محروس هو فعلا اللي بيكتب كلمات الأغنيات اللي بتحمل إسمه كمؤلف؟


اه لية لااصلها مش أغانى عبقرية أغاني عادية

أحسن ممثل سينما وأحسن ممثلة ؟


نور الشريف
هند صبري


أفضل سيناريست وأفضل مخرج ؟


وحيد حامد
يوسف شاهين

إيه رأيك في انتشار ظاهرة السينما المستقلة ؟


بص السينما اللى في السوق مش بتعبر عن الناس ..كان لازم تظهر سينما بتعبر عن الناس ..ده سبب ظهور السينما المستقلة

ايه آخر فيلم قصير شفته وعجبك ؟


الرقم القومي محمد محسن فيلم جميل اوي بتكلم اننا بقينا عاجزين عن التواصل

ماذا عن ؟

الصحافة ؟



بحبها اوي ..بس بحب القراءة الجرائد عن الكتابة يعنى لما بكتب حاجة مش بحبها


السينما ؟


عالم خيالى بنسى فيه الدنيا


مصطفى فتحي ؟


مدير تحرير كلمتنا و اخ كبير و معلم لى ..اتعلمت منه حاجات كتير


محمد التهامي ؟


بنى أدم كويس اوي ..انا حتى بحبه


اسئلة خفيفة

الحب ؟؟



شئ جميل اوي ..احسن حاجة الواحد يكون عايش قصة حب

بتحب فى قصة حب ؟؟


للاسف لا

ايه اللي بيشد البنات في عمر الشريف تحديدا ؟


رقيق وصوته ناعم


ما هو انطباعك عن البنات المدخنات؟


زى الولاد المدخنين بالظبط حرية شخصية .. مش بتضايق منهم ..بس انا مش بحب التدخين


بتعرف تطبخ ولا لا ؟ وايه احسن اكله بتعملها ؟


لا ..بعرف اعمل سلطة

كلمة أخيرة لمعشر المدونين ؟


بحب التدوين و بجد بحس اننا أسرة كبيرة اوي وفينا اتجاهات مختلفة ...

ودلوقتي من حقك تختار ضيف الحوار القادم .. تختار مين؟



سارة الاسكافي











Monday, May 14, 2007

!!..أنا مش رومانسي




القمر



البنت دي زي القمر .. لا دي أجمل من القمر .. قمر 14 يا ناس..!!


كلام كتير بسمعه لما حد بيعلق على جمال إحدى بنات حواء أو العكس – ودا طبعا قبل ما يتعمل update للمصطلحات دي بمصطلحات روشة تناسب لغة العصر زي مزة مثلا!!- يرجع مرجوعنا للمصطلح قمر , الناس كلها شايفة القمر جميل لدرجة مدحهم لبعض بتشبيه الفرد لغيره بالقمر .. مش عارف أنا ليه مش شايف كدا؟!


أنا بشوف القمر دا مجرد بقعة بيضاء في سماء سوداء بلا أي معنى ولا هدف لأاني أصلا مش مقتنع بفكرة إن القمر بينور ليالينا إلا لو كان نوره دا زي نور الضيوف كدا اللي بنقول لهم دايما نورتونا أو نورتوا البيت مش عارف ليه!!


وبالتبعية طبعا عمري ما شفت القمر رومانسي لأن معلوماتي الجغرافية عنه بتقول إنه مجرد مساحة صخرية مفيهاش أي حياة .. تبقى فين الرومانسية بقى ؟!



النيل



واحد واخد خطيبته وبيتفسح معاها ع الكورنيش ومشاهد مكررة للحبيبة اتنين اتنين فوق كوبري قصر النيل , وفي حديقة احمد رامي اللي في المنيل وكل الأماكن اللي زي دي , وصديقي يقول لي النيل دا صاحبي اللي بشكيله همي وارتاح!!


أيضا ليه معرفش عمري ما حسيت الإحساس دا مع النيل ولا أدري سببا لربطه بالرومانسية والراحة النفسية , عمري ما وقفت على النيل وملقتش الزبالة على جانبيه أو في مجراه ولا عمري شفت مياهه بلون غير الأسود وطول عمرها راكدة ولا تحرك أي مشاعر .. هي فين الرومانسية؟!



حليم



كل المحبين بيسمعوا حليم لأن صوته فيه احساس كل العشاق ,, لو مش بتسمع حليم لما تحب هتسمعه ,, حليم دا اسطورة الحب في كل زمان ,, يالهوي هو فيه زي حليم..!!


وآديني حبيت وبرضه لا حبيت حليم ولا اتأثرت به ولا عمري حسيته غير في غنوة واحدة اسمها عدى النهارد ودي كان بيحب فيها مصر بجد مش تمثيل.



أنا بقى عايش رومانسيتي شكل تاني , بعيشها رحلة بين ورقتي وقلمي , وبعيشها في لون سماء صافية بترسملي سحابة شكل حبيبتي , وبعيش رومانسيتي مع محمد فؤاد أصله بيترجم إحساسي بالضبط لا بيقلل منه ولا بيزودها ويأفور . تفتكروا عشان مبحبش النيل ولا القمر ولا حليم أكون مش رومانسي؟! .. شيء غريب إنك تربط احساس التاس بالحب مهما كان اختلاف طرقهم في استشعار الاحساس دا بتابوهات الناس تفضل ترددها وتتعامل معاها وهي لا فاهماها ولا حسها..!!


Wednesday, May 9, 2007

ستاد علي خليل الدولي




بالتأكيد لكل منا أماكن في القلب تشكل بعض من وجدانه وكثير من ميوله وشخصيته ,ترتبط هذه الأماكن غالبا بفترة الطفولة وذكريات العمر البريء الذي يحمل الإنطلاق بلاحدود , بلاخوف ولا مسئولية ,, اليوم سوف أحدثكم عن أرض علي خليل .
بإختصار .. أرض علي خليل هي تلك الساحة الكروية الشعبية الفاصلة بين مدرسة اسماعيل القباني وكلية الهندسةبالعباسية.
أرض علي خليل هي أهم متنفس لشباب المنطقة.في الإجازات تصبح ارض علي خليل مزارا يوميا لأطفال وشباب المنطقة وبالطبع أنا منهم فالنظام المتعارف عليه أن يكون اللعب بنظام الغالب مستمرفي حالة ازدحام الأرض ( تسع أرض علي خليل لخمسة تقسيمات أو ملاعب خماسية ) أما الشباب الكبير شوية اللي في سني الآن فلهم أسلوب آخر بالتأكيد يتناسب مع وضعهم الحالي ككباتن للمنطقة فنقوم بإرسال اولاد الحتة الصغيرين ( قطاع الناشئين ) قبل ميعاد مبارتنا لحجز الملعب ثم نذهب نحن قبل ميعادنا بربع ساعة ونكافئ الناشئين بمنحهم الشرف باللعب لمدة ربع ساعة مع الكباتن الكبار .
في فترة الطفولة كنا نؤثر اللعب في أرض علي خليل على الخروج والفسحة في أي مكان آخر وكنا نضع اقدامنا يوميا من الخامسة عصرا في الأرض نلعب مع كل الناس حتى صرنا واحدة من أشهر فرق العباسية وياما فزنا بدورات كروية رمضانية وغير رمضانية .
دائما كانت لدينا مشكلة الكرة في حد ذاتها فبعد ان نتفق على اللعب و نرتدي اطقمنا الرياضية وكوتشي باتا الذي كنا نعتقد وقت طفولتنا أيضا أنه أشهر من أديداس كنا لا نجد كرة نلعب بها فالكرة دائما إما دهستها سيارة او وقعت على خوابير سور الكلية وكنا نأبه أن نلعب بالكرة الكبس الشهيرة إلا في حالات الضرورة فقد عرفنا إنها بتجيب ميه في الرجل ودا طبعا خطر علينا نجوم المستقبل الذين سنقود مصر لكأس العالم.
في هذه الأرض الأسفلتية التي ربما تنظر إليها ولا تعريها إهتماما تولد نجوم وتقوم أساطير فلاعبي الكرة الحريفة هم حديث تجمعات الشباب في أي منطقة وطبعا السيط ولا الغنى .
في أرض علي خليل قابلت أصنافا كثيرين من البشر ومن لاعبي الكرة فهناك من يلعب الكرة لأنه يحبها ومن يلعب لأنه حريف وآخر يلعب للسيط فقط والبعض للتنفيس عن الكبت الذي يعيشه , وهناك الإنسان الجدع و الشهم والندل والبلطجي وربما تجمع مباراة واحدة بين طبيبا و مسجل خطر..!! ( متستغربش هي دي كرة الشارع ودا سر من أسرار سحرها ) كونت صداقات قليلة وتشاجرت كثيرا وكونت دائرة معارف واسعة فقد كنا دائما مطلوبين للعب بإعتبارنا فريق كبير في المنطقة وكثيرا ما كانت الفرق الأخرى تعرض على أي منا اللعب معها ولو لدورة واحدة أو مباراة ( إعارة يعني ) لأنه من المستحيل أن يترك لاعب فريقه للأبد ( انتماء بقى )
بعد أن مرنتنا الأرض ومرمطتنا قررنا في السادسة عشرة أن نتقدم لإختبارات الأندية ومنا من قبل في الأهلي والزمالك ثم حالت الظروف الأسرية والثانوية العامة أو شوية التناكة اللي ركبوا بعضنا من جراء الالتحاق بالأندية الكبيرة بأن تركوها لتلك الأسباب المختلفة.
المهم أن تلك الأرض الأصيلة التي غادرناها يوما متجهين إلى أندية النجومية كانت أحن علينا من أي مكان آخر فجمعتنا من جديد واحتضنتنا ورجعنا بفضلها لأيام التألق الأولى .
اعتزال النجوم ..!!
متستغربش أيوة أرض علي خليل فيها لاعبين بيعتزلوا اللعب ,منهم اللي بيعتزل نهائيا وينتقل للعب بشكل غير منتظم مع فرق تشبه فريق الشمس في النادي الأهلي فتلك الفرق تجمع المتزوجين والعاملين ومن تمنعهم الظروف من اللعب بشكل مستمر ودائما ماتجدهم بكروش و صلعات ولكن طبعا تظهر الخبرة في تحركاتهم ولمساتهم للكرة.
الاعتزال في أرض علي خليل له أسباب تختلف قليلا عن الأسباب التي تدفع لاعبي الكرة المحترفين للإعتزال فهنا الإعتزال يكون بسبب إنك اشتغلت وظروف عملك لاتسمح باللعب المنتظم أو ربما لأنك تزوجت و توفر مجهودك لمهام أخرى أو ربما للإصابة كما في حالتي
.
صلاة العيد :
أرض علي خليل لا تنحصر ذكرياتها فقط في كرة القدم, بل تمتد لصلاة العيد ,فالساحة تتحول في صباح العيد إلى مسجد يفترش بالحصر وتعتلي الميكروفونات أعمدة الإنارة ويحل التكبير محل اصوات لاعبي الكرة . لا أنسى شكل عمال المسجد والصبية وهم يدورون حول المصلين لجمع التبرعات أو لتوزيع الحلوى على الأطفال,ولا أجمل من مشهد التدافع الجماهيري قبل الصلاة أو بعدها, الكل يهنيء والكل سعيد.
تبقى لأرض علي خليل ذكريات لن تنسى في قلوب وعقول كل من لعب الكرة من سكان المنطقة فلحظات التألق والنجومية والإخفاق والخسارة وأيضا المشاجرات هي اهم ذكريات مرحلة مهمة مرت من حياتي وحياتهم .


Monday, May 7, 2007

أبو السعود والهمشري .. خبطتين في الراس توجع







منذ فترة قريبة جدا صدمنا لخبر وفاة الموسيقار الكبير حسن أبو السعود



وصدمت أنا كثيرا بفقدان تمتعي بأعمال جديدة للموسيقار الكبير الذي لطالما أثرى أذني ومشاعري



بألحانه الرائعة فمن منا ينسى سألتك لهاني شاكر وأصعب حب وأقرب صاحب لخالد عجاج



ولما النسيم لمحمد منير وحبيبي وانت بعيد لتامر حسني وحتى تاريخه مع عدوية والموسيقى التصويرية لأفلام ومسلسلات



من عينة الكيف ولن أعيش في جلباب أبي






لا راد لقضاء الله






النهاردة صدمت للمرة الثانية لسماعي خبر وفاة الموسيقار الكبير رياض الهمشري



رياض الذي قبل أن يكون مطربا حسن الصوت ومحلنا يقطر شرقية واحساسا



هو احد اساتذة العزف على العود



رياض الذي أطربنا بأعمال خالدة لكبار المطربين وصغارهم



فمن منى ينسى منه يا ليالي ومتفكرش كتير وشاهدين عليه وكماننا مع النجم محمد فؤاد



ومن ينسى راجعين وعندك حق ونفس المكان وعايزين يغيروك مع النجم عمرو دياب



وحبيبي ده وارض الشرق لهشام عباس وجت عليا وجيت جنبك لسميرة سعيد



وايضا مع الشباب كتامر حسني الذي لحن له لو كنت نسيت واوصفهالك



وايضا شيرين التي تغنت من ألحانه بجرح تاني وبتوحشني



دا طبعا غير تاريخه في الموسيقى التصويرية التي وضعها لأفلام حرب الفراولة وهمام في امستردام



وصعيدي في الجامعة الأمريكية وخلطبيطه وليه خلتني أحبك






دول علمين ثلاثة أعلام هم أهم من يحملون لواء الموسيقى الشرقية



في زمن تحولت فيه الموسيقى إلى مسخ واستنساخ أبله لموسيقى الغرب الفقيرة






لم يعد يبقى لي ولمحبي الموسيقى الشرقية غير اسم واحد هو وليد سعد




الملحن الذي تقطر نغماته احساسا والذي طالما امتعنا بالحان حفرت لنفسها مكان في ذاكرتنا وقلوبنا




وليد قدم العديد من الالحان التي نحفظها عن ظهر قلب , تاريخه مع محمد فؤاد مليء فمن ينسى تحرمني ليه




وأنا لو حبيبك وياناسي روحي وزي الليلة والله لو نرضى ومفيش نصيب وحمل جرح




وغيرها العديد والعديد ومن ينسى لو كان يرضيك و ولسه بتحبه يا قلبي لعمرو دياب ومن ينسى سابني وراح وكل ذنبي




ومش هفضل كده علطول لشيرين وحب لتامر حسني و انا ليا مين غيك لوردة وليه يا غرام لنبيل شعيل




وانا بس بتضايق لأصالة








ثلاثة أعلام لن ننساهم فقدنا اثنين ولم يبقى لنا غير واحد فقط إلى أن يجد جديد




ربنا يرحم من أخذ ويرزق من يعيش بالمزيد من الثراء والرقي الموسيقي




Sunday, May 6, 2007

تاج ماجد ابراهيم .. على مقاسي ..!!


في مكاننا المفضل في دار الأوبرا التقاني الزميل ماجد ابراهيم واتحايل عليا عشان يجري الحوار دا معايا

وطبعا انا اتنطت عليه من منطلق اني نجم ومطلوب وبتاع

وفي الآخر رأفة بيه قبلت اعمل الحوار

طبعا كل دي اشتغالات لزوم الصورة اللي في الاول دي

عشان مكنتش هسيب لكم الحوار من غير صورة يعني


دا تاج وصلني من الصديق والزميل العزيز ماجد إبراهيم


وطبعا دا هيكون أول تاج أجاوب عليه بصفتي لسه في سنة أولى تدوين



س1 تكلم عن هوايه لما بتمارسها بتستغرق فيها تماماوتنفصل عن عالم الواقع لفترة من الوقت اثناء ممارستها ..؟؟؟


بالتأكيد هي كرة القدم التي أبدع في وصفها من أطلق عليها الساحرة وأشياء وقيم كثيرة جميلة االمستديرة , أنغمس حتى قدمي في حالة ممارستي أو مشاهدتي
لكرة القدم فهي لعبة ساحرة بحق تجمع الفكر والمهارة والقدرة على اتخاذ القرار والإيثار والتعاون والقدرة على التحمل والصبرأضف إلى هذا بالطبع متعة الممارسة ونشوة لإنتصار.



س2 صف مقدار سعادتك أو شعورك_أيا كان عند تمرير التاج لك وهل يختلف حسب المدون الذى يمرر لك التاج ..؟؟


كنت سعيدا جدا فهو أول تاج يمرر لي وجاء بعد انشائي للمدونة بأيام قليلة ومن أخ وصديق أحترمه وأحبه كثيرا , بالطبع الشخصية التي تمرر لي التاج ستفرق معي كثيرا لو كان شخصا لا اعرفه فسيكون الوقع علي أفضل فساعتها سأشعر أن مدونتي قد أثرت نجحت في جذب قراء جدد.



س3 هل ترى للتاج اهميه حقيقيه..؟؟


التعرف على شخصيات المدونين له فائدة كبيرة في معرفة مفاتيح كتاباتهم وتوجهاتهم


س4 هل فكرت فى عمل تاج خاص بك ..؟؟


لم أعرف ما هو التاج إلا منذ يومين فلم أكن أصلا من متابعي المدونات في السابق , ولكن ليه لا , يمكن اعملها في يوم من الايام ولو إني مش بحب فكرة تكرار الأسئلة لكل الناس .



س5 هل تفضل قراءه اجوبه التاج عند المدونين الاخرين؟؟ أم لا تهتم سوى بالتدوينات الاخرى؟؟


جاوبت ع السؤال دا قبل كدا لما قلت لك إن التعرف على شخصيات المدونين له فائدة كبيرة في معرفة توجهاتهم


س6 عندما ترد على التاج مالذى تراعيه اكثر؟؟؟


إني أكون أنا في إجاباتي مش حد تاني


س7 هل تحرص على قراءه اجابات من تمرر لهم التاج ..؟؟
وهل تغير اجابتهم للتاج شئ فى ادراكك ..؟؟

الشق الأول للسؤال لو جاوبته هتبقى تالت مرة أكرر فيها كلامي في التاج دا (ايموشن واحد اتخنق)

أما الشق الثاني فمش فاهم ايه هي ماهية التغيير دا بس بالطبع هعرفهم أكثر ووجهة نظري فيهم هتتطور .


س8 هل تلتزم حرفيا باسئله التاج ..؟؟


لحد دلوقتي مفوتش سؤال


س9 ماهى نوعيه التاجات التى تفضلها؟؟؟


معرفش ايه هي الانواع اصلا لأن دا اول تاج يمرر لي


س10 هل كنت طالب شاطر في المدرسه؟؟؟


كنت متفوق والحمد لله لحد الثانوي وفي الثانوي كنت محير جدا لكل الناس في الوقت اللي كنت احد اعضاء فريق أوائل الطلبة

اللي فاز بالمركز الأول على مستوى المحافظة مجموعي في الثانوية مزادش عن 80% وهقولك السبب اللي هيبطل أي عجب

أنا أكره بشده مادة الرياضيات ولا أعرف فيها الألف من كوز الدره طبعا ضيف عليها الإحصاء بنت عمها والجيولوجيا التي

كرهني فيها مدرس المادة تجد إن أغلب الدرجات ضاعت في تلك المواد .


س11 ايه اكتر ماده حبيتها فى المدرسه والكلية ..؟؟


كنت أعشق اللغة العربية ومواد العلوم والجغرافيا والتاريخ


س12 ايه اكتر ماده كرهتها فى المدرسه والكليه؟؟


في المدسة جاوبتك فوق وفي الكلية هتنقسم اجابتي لقسمين

القسم الاول هو مرحلة كلية الآداب جامعة عين شمس وقسم الوثائق والمكتبات

ودي كانت اسوأمرحلة دراسية ونفسه في حياتي ولذلك أنا كاره المرحلة دي كلها مش موادها بس

القسم الثاني بقى هو مرحلة الاكاديمية ودراسة الترجمة الفورية

أكثر مادة تثير حنقي في الدراسة هنا هي علم الصوتيات phonology

مادة سخيفة جدا وامتحانها أسخف

وكمان المواد اللي ملهاش لزمة زي حقوق الانسان والتاريخ اللي بحبه بس مش لاقي له اي علاقة بدراستنا

خصوصا اننا بندرسه باللغة العربية!!


س13 كنت عايز تطلع ايه وانت صغنن؟؟؟


ياااااااه حاجات كتير اوي .. محامي وطيار وبعد كده لقيتني حابب مجال الإذاعة المدرسية أوي وكان حلمي أكون مذيع

ودا الحلم اللي استمر معايا لحد دلوقتي.