Tuesday, April 29, 2008

!أعمل إيه؟


فكرت أبقى جنتل مان لقيته بيلبس غالي.. فكرت أبقى سوبر مان لقيته بيلبس البوكسر فوق البنطلون!!

Sunday, April 27, 2008

!!.. عيل ومفيش كده منه


يا ترى ينفع اتصور الصورة دي تاني؟

Monday, April 21, 2008

!!قال لك محافظتين جداد.. إفطن




صحيت الصبح اتوضيت وصليت وكالعادة نزلت رغما عني أشتري جريدة الأهرام لأبويا - اللي كان رغما عني هو

شراء جريدة الأهرام مش تنفيذ طلب لأبويا طبعا ، أنا برضه شاب متربي وابن ناس كويسين - المهم ياخونا قلت ابص ع الصفحة الأولانية وانا طالع ع السلم عشان أعد فيه كام خبر نزل عن الريس في الصفحة دي - دي من هواياتي وبجد فيها متعة أكتر من السودوكو اللي مش فاهمها دي - وكانت المفاجئة الفجائية والصدمة الصباحية والإفيه العبقري اللي خلاني اتقلبت على ضهري من الضحك أكتر من أفلام محمد سعد .. قال لك قرار جمهوري بتقسيم القاهرة والجيزة ل 4محافظات.. محافظة حلوان تضم مناطق حلوان والقاهرة الجديدة ودار السلام ومايو والهايكستب ومحافظة 6 اكتوبر وتضم جامع الحصري وعمرو خالد.


يعني أختي حبيبتي مروة عوض اللي ساكنة في مايو نامت بلليل وهي في القاهرة صحيت الصبح لقت نفسها أقاليم وإنها عشان تروح شغلها في المهندسين مضطره تعدي على 3 محافظات - إيه اللي جاب القلعة جنب البحر!!- طب دي مشكلة مروة المؤقتة.. طيب عمي اللي ساكن في الهرم وهيجدد رخصته كمان كام يوم.. هيضطر يا عيني يسافر لمحافظة 6 اكتوبر عشان مرور الجيزة موجود هناك.. علل!!.. طيب بلاش عمي .. خلينا مع المرور نفسه.. المفروض ان اللي ساكن في حلوان دلوقتي يروح يغير نمر عربيته اللي هي ملاكي القاهرة وياخد نمر جديدة ملاكي حلوان وطبعا هيدفع رسوم.. والمفروض ان الناس اللي قدرهم الاسود جعل سكنهم في 6 اكتوبر يروحوا يغيروا ورقهم كله البطاقة والرخص وشهادات الميلاد وكله كله لأنهم خلاص مبقوش من أهل محافظة الجيزة.. بقوا محافظة 6 أكتوبر.

مش عارف ليه متخيل شكل سيادة اللواء مأمور قسم حلوان لما صحي من النوم الصبح وقرأ الأهرام زيي كده.. يالهوي بالي طب أنا دلوقتي لسه مأمور ولا بقيت مدير أمن؟.. محدش فاهم حاجة


طيب أنا فيه واحد غتت اعرفه كان مرشح نفسه في انتخابات المحليات عن دايرة النزهة وخد أغلب أصواته من الهايكستب حيث حبايبه الصعايدة.. دلوقتي الهايكستب بقت تبع حلوان وبناء عليه بقى المعلم عضويته في المجلس المحلي غير شرعية.. أنا فرحان فيه


طيب أنا عندي كام سؤال - غير بتوع عدوية - الأولاني لرجل الأعمال أنسي ساويرس وبقول له يا كبير الناس بتوع حلوان واكتوبر اللي بقو أقاليم.. هل أصبح من حقهم استخدام خط ألو أقاليم ولا لا؟


وسؤالي التاني بوجهه للدكتور طارق كامل هل يا دكتور هيتعمل تعريفة جديدة للمكالمات في المحافظات دي وتبقى مباشر؟


وسؤال تالت للدكتور محمد فريد خميس.. هل جاء لحضرتك تكليف للنساجون الشرقيون بعمل سجادة جديدة عليها خريطة مصر بعد التعديل عشان تتعلق في قصر الرياسة وراء الريس في اجتماعاته مع السادة الزعماء ولا لا؟

تبقي مشكلة لو نسيوا.. هيبقى شكلنا وحش أوي قدام الأجانب


وهسأل كمان الناس بتوع شركات غرب ووسط وشرق الدلتا بتوع الاوتوبيسات المكيفة دي هل هتعملوا خطوط رحلات

للمناطق الإقليمية دي؟


وسؤال كمان للسيد وزير التربية والتعليم.. هل ربنا هيكرمنا ونشوف تعديل في مناهج الجغرافيا عشان الطلبة تعرف التقسيم الجديد ويقدروا في الفسحة يغيظوا بعضهم.. أنا من القاهرة وانت من الأقاليم؟


وسؤالي الأخير للرئيس مبارك وبالمرة كل مصري يسأله لنفسه.. ليه يا ريس معملتش الموضوع ده قبل انتخابات المحليات مع إن ده البديهي والمنطقي.. كده يا ريس تخليني اشمت في صديقي الغتت اللي عضويته بقت غير دستورية ؟

Thursday, April 10, 2008

حيران


سألت نفسي كتير .. مرستش يوم على بر


أنا اللي فيا الخير ولا اللي فيا الشر؟

Tuesday, April 1, 2008

والله لأشكي لأمي





كلمتنا- إبريل 2008



حين كتب أستاذي الرائع بلال فضل خطابه الرائع أيضا لمدام جوليا روبرتس، وبعدها قام البراء أشرف وتجرأ بكتابة خطاب مماثل لحبيبة الملايين شاكيرا، قلت لنفسي واشمعنى أنت يا أبو الصبارير – وده اسم دلع أطلقه علي أحد الأصدقاء – وقررت أن أواصل المسيرة يمكن الموضوع يبقى موضة، أو يمكن بلال يقرأ خطابي ده ويبتسم لما يلاقيني بقلده.
طيب دلوقتي عمي بلال بيحب السيما الأمريكاني وعزيزي البراء بيحب المزز –عفوا- المزيكا الغربي والعبد لله منفسن من الاتنين – السيما الأمريكاني والمزيكا الغربي متودوناش في داهية- عشان كده قررت أن أكتب جوابي لأمي – سامع واحد بيقول وأنا مال أمي ما تكلمها في البيت يا عم – حاضر بلاش أمي أنا برضه محبش سيرة أمي تيجي على لسان الناس، أنا هكتب جوابي لأم المصريين فردوس محمد.
ماما فردوس.. بعد التحية
بكتب لك من الغربة – عارف أني بكتب جوابي من أحد مقاهي العباسية وأني مأسعدنيش الحظ بعقد عمل خليجي أو هجرة لكندا، وأني مرزوع ع القهوة مستني واحد صاحبي ييجي يحاسب لي- بس أنا حاسس بغربة.. أي والله يا أمه حاسس بغربة جوه بلدي، مش لاقيني ولا لاقيها، يظهر يا أمه أن بلدنا هجت وراحت تشوف رزقها في حتة تانية، أو يمكن بتدور على ناس يحترموها ويقدروها، حاكم احنا بهدلناها أوي يا أمه.. طبعا أنت في تربتك بقالك سنين ومش دريانة بحاجة فسيبيني أقولك بقى:
زجاجة الزيت بقت ب11 جنيه وجرام الذهب بقى ب150، وتامر حسني بقى بطل قومي بعد ما هرب من الجيش، تامر ده مطرب يا أمه جابوا عبلة كامل تعمل دور أمه في الفيلم بدالك، عبلة دي طيبة وحنينة زيك كده، متتخيرش عنك، لو شفتيها هتحبيها.
في بلدنا يا أمه اتنين اسمهم أحمد عز واحد ممثل الناس بتحبه والبنات بتتهبل عليه عشان حليوة، والتاني ملك الحديد – متفتكريش يا أمه أننا جبنا بطل تاني بعد خضر التوني - يا أمه لا ده ملك سوق الحديد، اتجوز من فترة ودفع مهر 25 مليون واللي هيدفع 25 قرش مش عارف يتجوز يا طيبة.
البلد بقت مليانة مظاهرات بس مش ضد الإنجليز.. دي ضد الغلاء والفقر، الناس بتنام جعانة يا أمه.. متهيألي أيام الإنجليز مكنتوش بتباتوا من غير عشاء.
اليومين دول البلد مقلوبة، الحضري خلع على سويسرا – يا ترى مين وراه – آه أنت محضرتيش الحضري صح، الحضري ده يا ستي جون الأهلي وأحسن جون جابته أفريقيا، الناس بتحبه أوي بس قلبوا عليه لما هرب مع أنه غلبان هرب بطوله مش بملايين ومليارات زي بقية الناس، بس يظهر اسم سويسرا بقى بيعمل حساسية للناس.
هفرحك شوية بدل ما تدعي عليا أني نكدت عليكي وأنا عارف دعوة الأم مبتخيبش، مش كل حاجة في بلدنا وحشة يا أمه، السيما بقت حلوة أوي، بقى فيها أفلام مهمة زي أيامكم يا حبيبة، والأفلام بقت بتجيب ملايين لو كنت موجودة دلوقتي كان زمانك عندك شاليه في مارينا، بقى عندنا أفلام زي خارج ع القانون وحين ميسرة والجزيرة، وشاهين عمل فيلم اسمه هي فوضى جاب ييجي 15 مليون مع أنه مفيهوش هند رستم زي باب الحديد.
تصدقي يا أمه أن عادل إمام لسه الزعيم وأفلامه بتجيب أعلى إيرادات، ادعي له يا أمه ربنا يديله الصحة ويمتعنا، الراجل ده شاطر أوي.
أنا طولت عليكي مش كده؟.. ولا أطول هو أنت وراكي إيه يعني.. ولا أقولك هبقى أكتب لك تاني.. الكلام كتير بس أنا إيدي وجعتني، أصلي بقيت متعود أكتب ع الكمبيوتر، بس أعمل إيه مفيش جوابات بتتكتب ع الكمبيوتر، بيكتبوا عليه حاجة تانية اسمها إيميلات، توصل مسافة رمشة من عنيكي يا غالية، هبقى أشرحها لك في الجواب الجاي بقى.. وحشتيني أوي يا أمه.. والسلام ليس ختاما.

6إبريل.. اتلموا بقى

إضراب 6 إبريل هيكون علامة وإشارة مهمة أوي

هنعرف إذا كنا نقدر فعلا نتلم ونوحد صفوفنا وكلمتنا

ولا خلاص عليه العوض في البلد

المشكلة ان الناس نفسها الإضراب ينجح

بس روح الإنهزامية مسيطرة علينا ومحدش

عنده ثقة ان الإضراب هينجح فالبتالي مش هيشاركوا فيه

يا ريت يا جماعة كل واحد مقتنع بالفكرة يعمل اللي عليه

ويشارك في الإضراب.. يا ناس فوقوا البلد خلاص بتحتضر