Tuesday, April 1, 2008

والله لأشكي لأمي





كلمتنا- إبريل 2008



حين كتب أستاذي الرائع بلال فضل خطابه الرائع أيضا لمدام جوليا روبرتس، وبعدها قام البراء أشرف وتجرأ بكتابة خطاب مماثل لحبيبة الملايين شاكيرا، قلت لنفسي واشمعنى أنت يا أبو الصبارير – وده اسم دلع أطلقه علي أحد الأصدقاء – وقررت أن أواصل المسيرة يمكن الموضوع يبقى موضة، أو يمكن بلال يقرأ خطابي ده ويبتسم لما يلاقيني بقلده.
طيب دلوقتي عمي بلال بيحب السيما الأمريكاني وعزيزي البراء بيحب المزز –عفوا- المزيكا الغربي والعبد لله منفسن من الاتنين – السيما الأمريكاني والمزيكا الغربي متودوناش في داهية- عشان كده قررت أن أكتب جوابي لأمي – سامع واحد بيقول وأنا مال أمي ما تكلمها في البيت يا عم – حاضر بلاش أمي أنا برضه محبش سيرة أمي تيجي على لسان الناس، أنا هكتب جوابي لأم المصريين فردوس محمد.
ماما فردوس.. بعد التحية
بكتب لك من الغربة – عارف أني بكتب جوابي من أحد مقاهي العباسية وأني مأسعدنيش الحظ بعقد عمل خليجي أو هجرة لكندا، وأني مرزوع ع القهوة مستني واحد صاحبي ييجي يحاسب لي- بس أنا حاسس بغربة.. أي والله يا أمه حاسس بغربة جوه بلدي، مش لاقيني ولا لاقيها، يظهر يا أمه أن بلدنا هجت وراحت تشوف رزقها في حتة تانية، أو يمكن بتدور على ناس يحترموها ويقدروها، حاكم احنا بهدلناها أوي يا أمه.. طبعا أنت في تربتك بقالك سنين ومش دريانة بحاجة فسيبيني أقولك بقى:
زجاجة الزيت بقت ب11 جنيه وجرام الذهب بقى ب150، وتامر حسني بقى بطل قومي بعد ما هرب من الجيش، تامر ده مطرب يا أمه جابوا عبلة كامل تعمل دور أمه في الفيلم بدالك، عبلة دي طيبة وحنينة زيك كده، متتخيرش عنك، لو شفتيها هتحبيها.
في بلدنا يا أمه اتنين اسمهم أحمد عز واحد ممثل الناس بتحبه والبنات بتتهبل عليه عشان حليوة، والتاني ملك الحديد – متفتكريش يا أمه أننا جبنا بطل تاني بعد خضر التوني - يا أمه لا ده ملك سوق الحديد، اتجوز من فترة ودفع مهر 25 مليون واللي هيدفع 25 قرش مش عارف يتجوز يا طيبة.
البلد بقت مليانة مظاهرات بس مش ضد الإنجليز.. دي ضد الغلاء والفقر، الناس بتنام جعانة يا أمه.. متهيألي أيام الإنجليز مكنتوش بتباتوا من غير عشاء.
اليومين دول البلد مقلوبة، الحضري خلع على سويسرا – يا ترى مين وراه – آه أنت محضرتيش الحضري صح، الحضري ده يا ستي جون الأهلي وأحسن جون جابته أفريقيا، الناس بتحبه أوي بس قلبوا عليه لما هرب مع أنه غلبان هرب بطوله مش بملايين ومليارات زي بقية الناس، بس يظهر اسم سويسرا بقى بيعمل حساسية للناس.
هفرحك شوية بدل ما تدعي عليا أني نكدت عليكي وأنا عارف دعوة الأم مبتخيبش، مش كل حاجة في بلدنا وحشة يا أمه، السيما بقت حلوة أوي، بقى فيها أفلام مهمة زي أيامكم يا حبيبة، والأفلام بقت بتجيب ملايين لو كنت موجودة دلوقتي كان زمانك عندك شاليه في مارينا، بقى عندنا أفلام زي خارج ع القانون وحين ميسرة والجزيرة، وشاهين عمل فيلم اسمه هي فوضى جاب ييجي 15 مليون مع أنه مفيهوش هند رستم زي باب الحديد.
تصدقي يا أمه أن عادل إمام لسه الزعيم وأفلامه بتجيب أعلى إيرادات، ادعي له يا أمه ربنا يديله الصحة ويمتعنا، الراجل ده شاطر أوي.
أنا طولت عليكي مش كده؟.. ولا أطول هو أنت وراكي إيه يعني.. ولا أقولك هبقى أكتب لك تاني.. الكلام كتير بس أنا إيدي وجعتني، أصلي بقيت متعود أكتب ع الكمبيوتر، بس أعمل إيه مفيش جوابات بتتكتب ع الكمبيوتر، بيكتبوا عليه حاجة تانية اسمها إيميلات، توصل مسافة رمشة من عنيكي يا غالية، هبقى أشرحها لك في الجواب الجاي بقى.. وحشتيني أوي يا أمه.. والسلام ليس ختاما.

14 comments:

nohamy said...

جامدة يا بنى
بس ماما فردوس مش هتسمعك

كنت تبعت لماما هند رستم
( كانت بتمثل معها )

صبري

go on

nohamy said...

جامدة يا بنى
بس ماما فردوس مش هتسمعك

كنت تبعت لماما هند رستم
( كانت بتمثل معها )

صبري

go on

Sarah el eskafy said...

هههههههههههههه
ياعينى ياماما
دى يمكن تموت تانى لو قرت كلامك ده
حرام عليك ياصبرى احنا اخر حاجة لينا الموت هتوديها فين تانى يا مفترى

محمد حمدي said...

من نجاح لنجاح يا صبرى

Anonymous said...

بجد موضوعك رائع انا قريتة فى كلمتنا وجيت هنا وقريتة تانى
بجد تحفة

بالتوفيق دايما

تحياتى لك

صبري سراج said...

تهامي

سارة

حمدي

بوس بوس اللي مش عارف هي مين

تحياتي لكم كلكم

Anonymous said...

بوس بوس اللي مش عارف هي مين

لو كنت ضغطت على اسمى كنت هتدخل على مدونتى على طول وتعرف انا مين

على العموم انا بسمه صاحبة مدونة الروح ويشرفنى زيارتك لمدونتى

http://www.elroh.blogspot.com/

تحياتى لك

صبري سراج said...

على فكرة انا زرت المدونة وعجبتني جدا وحاولت أوصل لأسمك وفشلت

وسعدت لما لقيتك كتبتي معانا في كلمتنا

لكن العدد ده مش عندي ففشلت للمرة التانية اني اعرف اسمك

أهلا بيكي يا بسمة ونورتي مدونتي

Anonymous said...

انا اللى سعيدة جدا ان مدونتى عحبتنى ده شرف ليا طبعا
ولو العدد ده مش عندك هتلاقى ليا موضوع فى عدد ابريل 2008 اسمه احنا مين وفين صفحة 23
وموضوع فى عدد مارس صفحة 17

وشكرا مرة تانية على الزيارة وعلى كلامك

تحياتى لك

صبري سراج said...

طب انتي منتشرة في كلمتنا اهه.. ليه مش بنشوفك في الميتنج يا هانم .. ياريت تجيلنا في مرة .. عشان تتعرفي على زمايلك وزمايلك يعرفوكي.. اكيد هتنوري

Anonymous said...

للأسف لانى مش من مصر والمسافة كبيرة فصعب انى احضر وعلشان كده انا براسل المجلة عن طريق الميل وبتمنى فعلا اقدر احضر معاكم ربنا يسهل والظروف تتغير

واكيد المجلة منورة بيك وبكل الناس الحلوة اللى فيها

بنت مصريه said...

لا بجد كلامك حلو قوى واظهار حال البلد ف جواب ده ف حد زاته ابداع انا بحييك واتمنى تنور مدونتى

بنت مصريه said...

مستنياك تنور مدونتى يا استاز صبرى

صبري سراج said...

يا فندم.. انا آسف مشفتش الكومنت غير دلوقتي.. ومتشكر بجد لتعليقك ولوجودك.. وهزور مدونتك فورا.. دي حاجة تشرفني