والله لأشكي لأمي

كلمتنا- إبريل 2008



حين كتب أستاذي الرائع بلال فضل خطابه الرائع أيضا لمدام جوليا روبرتس، وبعدها قام البراء أشرف وتجرأ بكتابة خطاب مماثل لحبيبة الملايين شاكيرا، قلت لنفسي واشمعنى أنت يا أبو الصبارير – وده اسم دلع أطلقه علي أحد الأصدقاء – وقررت أن أواصل المسيرة يمكن الموضوع يبقى موضة، أو يمكن بلال يقرأ خطابي ده ويبتسم لما يلاقيني بقلده.
طيب دلوقتي عمي بلال بيحب السيما الأمريكاني وعزيزي البراء بيحب المزز –عفوا- المزيكا الغربي والعبد لله منفسن من الاتنين – السيما الأمريكاني والمزيكا الغربي متودوناش في داهية- عشان كده قررت أن أكتب جوابي لأمي – سامع واحد بيقول وأنا مال أمي ما تكلمها في البيت يا عم – حاضر بلاش أمي أنا برضه محبش سيرة أمي تيجي على لسان الناس، أنا هكتب جوابي لأم المصريين فردوس محمد.
ماما فردوس.. بعد التحية
بكتب لك من الغربة – عارف أني بكتب جوابي من أحد مقاهي العباسية وأني مأسعدنيش الحظ بعقد عمل خليجي أو هجرة لكندا، وأني مرزوع ع القهوة مستني واحد صاحبي ييجي يحاسب لي- بس أنا حاسس بغربة.. أي والله يا أمه حاسس بغربة جوه بلدي، مش لاقيني ولا لاقيها، يظهر يا أمه أن بلدنا هجت وراحت تشوف رزقها في حتة تانية، أو يمكن بتدور على ناس يحترموها ويقدروها، حاكم احنا بهدلناها أوي يا أمه.. طبعا أنت في تربتك بقالك سنين ومش دريانة بحاجة فسيبيني أقولك بقى:
زجاجة الزيت بقت ب11 جنيه وجرام الذهب بقى ب150، وتامر حسني بقى بطل قومي بعد ما هرب من الجيش، تامر ده مطرب يا أمه جابوا عبلة كامل تعمل دور أمه في الفيلم بدالك، عبلة دي طيبة وحنينة زيك كده، متتخيرش عنك، لو شفتيها هتحبيها.
في بلدنا يا أمه اتنين اسمهم أحمد عز واحد ممثل الناس بتحبه والبنات بتتهبل عليه عشان حليوة، والتاني ملك الحديد – متفتكريش يا أمه أننا جبنا بطل تاني بعد خضر التوني - يا أمه لا ده ملك سوق الحديد، اتجوز من فترة ودفع مهر 25 مليون واللي هيدفع 25 قرش مش عارف يتجوز يا طيبة.
البلد بقت مليانة مظاهرات بس مش ضد الإنجليز.. دي ضد الغلاء والفقر، الناس بتنام جعانة يا أمه.. متهيألي أيام الإنجليز مكنتوش بتباتوا من غير عشاء.
اليومين دول البلد مقلوبة، الحضري خلع على سويسرا – يا ترى مين وراه – آه أنت محضرتيش الحضري صح، الحضري ده يا ستي جون الأهلي وأحسن جون جابته أفريقيا، الناس بتحبه أوي بس قلبوا عليه لما هرب مع أنه غلبان هرب بطوله مش بملايين ومليارات زي بقية الناس، بس يظهر اسم سويسرا بقى بيعمل حساسية للناس.
هفرحك شوية بدل ما تدعي عليا أني نكدت عليكي وأنا عارف دعوة الأم مبتخيبش، مش كل حاجة في بلدنا وحشة يا أمه، السيما بقت حلوة أوي، بقى فيها أفلام مهمة زي أيامكم يا حبيبة، والأفلام بقت بتجيب ملايين لو كنت موجودة دلوقتي كان زمانك عندك شاليه في مارينا، بقى عندنا أفلام زي خارج ع القانون وحين ميسرة والجزيرة، وشاهين عمل فيلم اسمه هي فوضى جاب ييجي 15 مليون مع أنه مفيهوش هند رستم زي باب الحديد.
تصدقي يا أمه أن عادل إمام لسه الزعيم وأفلامه بتجيب أعلى إيرادات، ادعي له يا أمه ربنا يديله الصحة ويمتعنا، الراجل ده شاطر أوي.
أنا طولت عليكي مش كده؟.. ولا أطول هو أنت وراكي إيه يعني.. ولا أقولك هبقى أكتب لك تاني.. الكلام كتير بس أنا إيدي وجعتني، أصلي بقيت متعود أكتب ع الكمبيوتر، بس أعمل إيه مفيش جوابات بتتكتب ع الكمبيوتر، بيكتبوا عليه حاجة تانية اسمها إيميلات، توصل مسافة رمشة من عنيكي يا غالية، هبقى أشرحها لك في الجواب الجاي بقى.. وحشتيني أوي يا أمه.. والسلام ليس ختاما.