المقامة الأوبامية

كلمتنا.. عدد ديسمبر 2008

حدثني العبد بن سيد قال:

لما كانت الانتخابات الأمريكية بعد أزمة اقتصادية وحرب أفغانية ومثلها عراقية، وبعد أن انهار (برجان) واختفى بن لادن إلى الآن، وبعد أن طرد بوش من البيت الأبيض إلى الحوش، انقسم الناس إلى فريقين، النصف لأوباما ونصف النصف لماكين، وسأل الناس الآخرين: "يا ترى أوباما ولا ماكين؟".. ولما كنت من الربع الأخير فقلت بعد زفير: "يا ناس يا لوكال يا شعبيين فككوا من أوباما وماكين".. وكأني لم أرد فالسؤال قد رُد، لازم تجاوب يا خفيف سيبك من الجواب الظريف، لعنت الغباء واستعذت من الجهلاء، وأجبت: يا إخواننا يا مؤمنين سيارتي بالبنزين، والبنزينة مفيهاش تمانين وغالي الخمسة وتسعين، بالذمة هينفعني أوباما ولا ماكين؟.. القدس ساكنها بنو صهيون من أيام الرئيس ويلسون، احسبوا كم فترة رئاسية، جمهورية وديمقراطية.. في عهد أي زعيم عادت أورشليم؟.

وكسبها خلاص العم أوباما وقالوا هنشوف الخير ياما ، ده أسمر كيني وبيشرب شاي، وأبوه مسلم هيخون إزاي؟.. ، أوباما رئيس مزيكة.. هيدلع أبو تريكة، أدلق جاز ولّع نار.. باراك أوباما زعيم جبار، وفي خطاب النصر أهو قال هنغير لكم الحال، حال مين تقصد يا رئيس؟ يمكن حال التفطيس؟.. ما هو سبقك بوش ونهاه أسلوب ذبح وخلّاه، صدام في الحبل اتعلق وبن لادن في الصحراء أهو فلّق، فلتبحث يا باراك عن فكر جديد فتاك، فلك أربعة أعوام تحتاج لفكر تمام، عندك سوريا وطهران والتنين الصيني كمان.. ماذا ستفعل يا بن حسين ويا ترى هتكون كغراب البين؟.. الأيام وحدها هتقول مين فينا المخبول؟

تهييس

حين تخاطب قلب المرأة استخدم وردة وحين تخاطب عقلها استخدم جزمة.

....

عمرو خالد يعلن توقف مشروعه " عيش وملح " الذي يهدف لجمع 35 ألف متطوع لتطوير 7 آلاف أسرة مصرية.. ( ممنوع التجمهر.. قانون طوارئ ).

....

الفارق بين الحب الأول والحب الحقيقي كالفارق بين هيفاء وهبي وفيروز.. الأول يخاطب الشهوة والآخر يخاطب الإحساس.. بالتأكيد أقصد شهوة الحب.

....

في السبعينيات اتفقت سعاد حسني مع صلاح جاهين على أن الحياة بقى لونها بمبي.. اعتقد أنه لو تأجل الاتفاق لهذا الوقت لأجبرت السندريلا العم جاهينأن يكتب أن الحياة بقى لونها أخضر في أصفر.

....

أثبتت الدراسات التاريخية أن مينا موحد القطرين كان زملكاويا فقد كان يرتدي تاجا أبيضا وحين هزم ملك الشمال بتاجه الأحمر صنع تاجا جديدا أبيضا بخطين حمر.

....

سألني: قل لي كلمتين عن مصر بدون ما تفكر؟

قلت: بلد تكرهها وتلعن أبوها بعشق زي الداء

أدار رأسه عني وبدأ يغني " بنضيع وقت "

....

قالت: مقالك الأخير حلو أوي

أجبت: دي أقل حاجة عندي

فاتهمتني بالغرور

ومن تاني لليابان راجعين.. فريق غالي وأصله متين

الأهلي في كل حتة عمال يجيب اجوان
زي ما راح أفريقيا برضه راح اليابان
والفرحة في كل حتة زيدني كمان وكمان
ناس هايصة في الكوربة وناس في ميدان لبنان

الدويقة.. أيام العجب والموت

المقال منشور بمجلة كلمتنا عدد نوفمبر الحالي بعنوان



الدويقة أهلا بك في الجحيم


علاقتي بالدويقة بدأت في الصف الثالث الإعدادي.. صبي صغير قرر القدر له أن يتعرف على الدويقة شخصيا بعد أن كان فقط يسمع عنها من زملاءه الساكنين فيها.. عايز أروح الدويقة.. أعمل إيه؟.. تاخد أي حاجة لحد مزلقان الدويقة ومن قدام حي منشأة ناصر هتركب عربية طالعة "الوحايد" ومن الوحايد تاخد عربية تانية "للمساكن".. عبرت شريط القطار الممتد أمام المزلقان ودلفت إلى علبة السردين منتهية الصلاحية التي سموها لأجل جبر الخاطر " ميكروباص ".. جلست على الكنبة الأخيرة واخترق فخذي مسمار صلب عتيد " ابتدينا ".. وجوه الرجال في علبة السردين كلها مكفهرة، حواجب مقتضبة وعيون متحفزة للشر.. الشر فقط.. نساء لا يطيقون عباءاتهم السوداء، منهن من تحمل صغيرها على كتفها أو تجلسه على قدميها توفيرا للأجرة، ومنهن من تفرغت لسب الدين للسائق العربة عشان يهمد ويمشي بلا استعجال، الكل ينظر إلي بترقب شديد – واضح إني غريب عن المنطقة – برغم أن الدويقة منطقة عامرة بالسكان إلا أن سكانها لهم نفس الهيئة والغريب بينهم لا يحتاج إلى قوة ملاحظة لكشفه، وصلت إلى منطقة "الوحايد" بعد أن عبرت على مصنع الرنجة التي تخترق رائحته كل حواسك وتلال القمامة والعفن التي تجبرك على الغثيان، وهناك بحثت عن علبة سردين أخرى تقلني إلى المساكن، لم أكن أتوقع أن أرى نوعا جديدا من المواصلات لم أره قط في حياتي إلا في الدويقة!!.. فاكرين عربات الجيش الإنجليزي أيام الإحتلال؟.. تلك السيارات الجيب القديمة كاكية اللون والتي يرتدي قائدها بدلة جيش كاكي وباريه أخضر.. رأيناها كثيرا في مسلسلات عصر الطرابيش.. هي نفسها تلك السيارة.. فقط تحول لونها من الكاكي إلى لون الصدأ وارتدى قائدها الذي لم يتجاوز عمره أبدا الرابعة عشر قميصا عليه صورة إيهاب توفيق واستبدل الباريه الأخضر بقصة شعر " انجليزي و "جلات " ولزوم النزاهة قام صاحب العربة باستبدال عجلة الدريكسيون الأصلية بعجلة مرسيدس وكاسيت يئن من صوت عبد الباسط حمودة وهو يغني " بوسي كات ".. تلك السيارة كانت مغامرة لطيفة لصبي في سني فهي تجري بك كما تجري عربات التصادم في ملاهي سندباد – أريد أن أضحك وخايف يقولوا عليا عبيط – وصلت المساكن ونزلت محطة السنترال وقررت أن أتجول في المساكن على قدمي.. لا ترى سوى ورش وسيارات تتجدد ولا تسمع سوى أصوات دقدقة شواكيش السمكرية على صاج السيارات، عمال وأسطوات يكسوا ملابسهم وجلودهم الشحم ومدرسة يخرج تلاميذها لتغيير ملابسهم واستبدال أسمائهم باسم " بلية "، أم تسحب أطفالها الثلاثة الممسكين بطرف جلبابها لتدخل الورش والمحال طالبة حسنة لله- وصلت إلى حافة الجبل التي تسمى بلغة أهل المقطم كورنيش ورأيت بيوتا لأول مرة أراها بحياتي، بيوت تدفن نصفها السفلي في صخر الجبل الجيري وتحتاج لكي تدخل من بابها أن تثني قامتك كثيرا، وبيوت تفوق في ميلها برج بيزا الشهير وأخرى لم يقو صاحبها على دهانها فظلت عارية تظهر عورتها للناظرين، أغلب تلك البيوت يعتلي " الدش " سطوحها – هم الناس دول أغنياء ولا فقراء.. ده إحنا معندناش دش في بيتنا!!- وكأي صبي في سني قررت الجلوس على القهوة التي كنت قد بدأت في التعرف على ميزات الجلوس إليها في هذا السن – جلست وطلبت واحد بيبس – وبجواري يجلس شابين يتحدثان بحدة شديدة:
- يعني هو يجي لك لحد القهوة تقوم تعلمه في وشه؟
- أومال عايزني أخده على حجري.. ده ماشي مع أختي بقاله سنة ولما تيجي سيرة الجواز يقول لها حين ميسرة
- يابني طب واستفدت إيه لما عورته.. ده بدل ما تاخده على حجرك وتقول له ينجز في الموضوع؟
- يا عم أنا اتخنقت احنا كوم لحم في أوضة وصالة وحمام مشترك.. عايزينها تغور بقى؟
- يا بني خليها على الله.. ما هو ظروفه زي ظروفك وظروفنا.. يبنوا لهم أربع حيطان وسقف فوق منكم ويتلموا وخلاص.

- طب والبناء ده مش محتاج مصاريف، وهو وأنا وأنت ظروفنا منيلة، ده أنا مدخلش جيبي جنيه بقالي شهر- العيال ولاد أختي ناموا إمبارح من غير عشاء.

- لا حكومة حاسة بينا ولا الناس بتوع مارينا شايفينا ولا حتى الكيف عارف يلهينا.. يا رب هو أنت خلقتنا عشان تمرمطنا.. ده الواحد بيطلع عين أهله عشان يجيب الجنيه.

إيه ده.. معقول فيه ناس عايشة كده؟.. هم دول عايشين أصلا.. إزاي الناس دي لسه بتتنفس لحد دلوقتي.. يا ترى لما أكبر وأوصل لسنهم ده هيكون إيه اللي بيحصل؟.. دول بيقولوا إن الحكومة مش حاسة بينا.. أومال ليه الريس بيجيب 99% في الاستفتاء وليه المطربين كلهم اتجمعوا وغنوا له " اختارناك " وليه مجلس الشعب كل يوم في التليفزيون ألاقي ناس بتتكلم فيه عن حق الفقراء ومحدودي الدخل.. أنا كنت فاكر إن محدودي الدخل دول هما أفقر فئة في المجتمع.. أول مرة أعرف إن فيه فئة كبيرة أوي اسمها معدومي الدخل.

وفاتت السنين وبعد 10 سنين وفعلا تغير المشهد.. بقى عندنا دش في بيتنا وفتحت التليفزيون ولقيت الدويقة بتنهار.. جثث وبيوت تحت الأنقاض.. فرق الإنقاذ تتعامل بعشوائية.. الصراخ ولطم الخدود في كل مكان، الأمن المركزي يحاصر المنطقة.. الناس المهمين ذوي الحلل والأحذية الإيطالية والسيارات المرسيدس السوداء موجودون جميعا.. يتعاملون بعجرفة معتادة ولا تخل وجوههم من الشعور بالمصيبة – مصيبة احتمالية فقد مراكزهم والإعلام اللي مش هيسيبهم في حالهم- الكاميرات في كل مكان وسيارات الإسعاف تتحفز لاستقبال الضحايا، مئات الجثث وآلاف الدمعات وأصوات متداخلة، هرج ومرج وبكاء وعويل، أنقاض ترفع بعشوائية وأشلاء جثث تجمع في أكياس سوداء.. الإعلام يتسائل من وراء ما حدث؟ من سمح لهؤلاء بتوصيل المرافق وكيف تصرف مياههم في قلب الجبل الجيري.. كم عدد الضحايا وما حجم الخسائر؟.. المسئولون يجيبون باقتضاب ويحاولون إيهام الناس بأن الموقف تحت السيطرة، وبعيني لم أرى أي سيطرة.. الرئيس يأمر بتوفير 2000 شقة مجانية لأصحاب البيوت المنهارة.. كان فين من الأول الكلام ده يا ريس؟.. هو إحنا لازم نستنى المصيبة عشان نتحرك، ويا ترى يا حكومة هتحاسبي الوزير السابق اللي وصل لهم المرافق رغم علمه بكارثية السكن في هذه المنطقة فقط لضمان أصواتهم الإنتخابية للفوز بمقعد في مجلس الشعب؟.

وليه أصلا لما الحكومة فكرت تنقل الورش الصناعية من وسط البلد قامت بنقلها لجبل الدويقة وهم أكيد عارفين إنه معرض للانهيار في أي وقت؟.. أهم دلوقتي بيقولوا هيوفروا مكان تاني للورش دي!!

وإزاي يا حكومة تحاسبي المجرمين من سكان الدويقة ومنشية ناصر والمناطق المشابهة على أفعالهم وأنتم من أجبرتموهم على الفقر والمعيشة الضنك؟.. متعرفوش إن الفقر بيولد كل الرذائل.. الحاجة أجبرت الكثيرين من أهل العشوائيات على ممارسة مهن غير أخلاقية.. دعارة وبلطجة ومخدرات وكل شيء غير مباح، فقط من أجل البحث عن الحق الأدنى في الحياة ويا ليتهم فلحوا، ويا ليت الحكومة تركتهم في حالهم.. عجبي.

المتفائلين بيشجعوا مصر.. يا ترى مين معانا؟!

احنا متفائلين ان منتخبنا هيوصل كاس العالم ان شاء الله

وهيعمل شغل عالي كمان في جنوب أفريقيا

متفائل زينا وناوي تشجع مصر

انضم لنا في الجروب ده

http://www.facebook.com/group.php?gid=44451465114

ويللا نشجع مصر

إنتي أحلى

يا أجمل من كل البشر

الله لا يشبعني حب

في حجرتي المستطيلة المزدحمة بكراكيب ليس لي علاقة بمعظمها تحتل أسفل سريري وأعلى دولابي وجوانبه

وكل ركن خاو في الحجرة منذ سنين ودون أمل في أن يتحرك موقفها ولو قليلا، أنزوي

أنا في سريري محتضنا لاب توبي العزيز مبحرا في عالمه اللامتناهي ومتسلقا شبكته

العنكبوتية لسبب غير معلوم بالنسبة لي.

دائما ما تحمل قائمة الأغاني التي يرددها على مسامعي صديقي "وين أمب " تلك الأغنية

" عاش الطب ".. في البداية كنت أستمع لتلك الأغنية كما أسمع غيرها من الأغاني.. فقط أستمتع

بلحنها وأداء محمد فؤاد.. مع الأيام زاد تعلقي بعاش الطب بشكل غريب،

بدأت أنتبه إلى الكلمات، إنه نفس المنطق وهي نفس الفلسفة المشتركة بيننا،

هو يريد أن يعيش الحب في كل لحظة وأنا أيضا ويشاركنا نزار.. اكتمل ثالوث أصدقائي

بانضمام فؤاد إلى نزار والعبدلله..

الحب هو الحياة والبحث عنه والحرب من أجله دائما هي المتعة الحقيقية.

.............................................

" الله لا يشبعني حب ولا يغنيني عن الحلوين.. يصرح ليا بأمر الطب أحب يوماتي

إن شاء الله 200 ".. وجدتني أرد بها على زميلتي بتلقائية أدهشتني

قبل أن تدهشها حين سألتني:
- " هو انت بتحب على روحك يابني؟ .. ساعات بحس إنك عاقل أوي وساعات بحسك هوائي ومجنون

.. انت مين فيهم؟"
- " وإيه المانع أكون الاتنين؟"
- "علي.. إنت كل ما تشوف واحدة تحبها ولما تسيبوا بعض تاني يوم بتحب غيرها

.. تفتكر ده طبيعي؟.. مش شايف انك كده مش مظبوط؟"
- " إطلاقا .. الإنسان ميقدرش يعيش من غير حب.. احنا اتخلقنا عشان نحب..

إنتي مثلا كبنت شايفة إن نزار قباني هو فارس الرومانسية ..

نزار كان بيدخل مطعم عشان يتغدى ويعيش قصة حب ولما يخرج من باب المطعم

ينساها ويدور علي غيرها في أي مكان تاني".

آثرت زميلتي الصمت لم تقتنع بما قلت وأيضا لم تندهش كثيرا

من أن موقفها من نزار لم يتغير .. هي مازالت تراه فارس العشق والرومانسية

ولازالت تراني شابا طائشا هوائيا.. ربنا يهديه.

..............................................................

أعود إلى حجرتي المحتلة.. شيئا لم يتغير بها أو ربما تغير.. لا أدري..

فحياتي داخل حجرتي تنحصر بين اللاب توب ودواوين نزار

التي تجلس في أريحية على منضدة صغيرة وضعتها إلى جوار سريري مباشرة.

أفتح الماسنجر وأحادث فتاتين في وقت واحد.. الأولى اسمها " مي "..

إمرأة ناضجة في الثانية والثلاثين ، مطلقة ولديها طفلة،

تفهمني مي قبل أن أحكي وتعي كل ما يدور في عقلي الشاب،

تساعدني كثيرا في اتخاذ قرارتي ودائما ما تسعفني خبرتها الحياتية..

هي أيضا تحكي لي كل شيء.. تفاصيلها الخاصة.. الخاصة جدا..

هي مطمئنة لأنني لن أفشي سرها يوما.. فعلاقتي بها لا تتجاوز شاشة الكمبيوتر..

ربما يكون مي " مجرد اسم وهمي أيضا " .. دائما نتحدث عبر الويب كام فيرى كلانا الآخر..

تراني هي شابا وسيما عيناه تلمعان بالتحدي وجسده القوي يعطيها احساسا بالأمان،

وأراها أنا إمرأة بحق.. نموذجا للأنثى التي يبحث عنها كل رجل..

فهي لا تمتلك فقط العقل الراجح واللسان اللبق لكنها تمتلك جسدا أنثويا ناريا رغم بياضها الشاهق..

تحررها في ملبسها يكشف لي دائما عن ذراعيها وأعلى صدرها البض.

إني أحبها وأشتهيها.. أحدثها نهارا عبر وهم الإنترنت وأضاجعها ليلا في وهم الأحلام.. أضاجعها كل ليلة.. أخترقها مرات ومرات.. بيني وبينها ليال حميمة كنت فيها بروحي وجسدي وكانت هي بصورتها فقط.. تكبرني مي بإحدى عشر عاما لذلك فمن المستحيل أن أخبرها بحبي لها والذي لا أشعر به إلا حين أرى اسمها أون لاين أو حين أضاجعها في منامي.

.............................................

الفتاة الثانية هي "ليزا" طالبة الجامعة الألمانية..

أحب في ليزا تحررها فهي لا تخجل من تقبيلي أمام الجميع.. تتحرك بخفة..

تضحك بانطلاق.. ابتسامتها الرائعة لا تفارق شفتيها الطازجتين..

ملابسها دائما زاهية الألوان.. غدا سألقى ليزا وأصدقائها في أكوا بارك..

سنتلاحم وننزاحم في ألعابها المائية.. ستجدها الآن تفكر كيف ستنفذ في مقلبها الساخن غدا

ولذلك تجدني أفكر في نفس الاتجاه.. إنها الحرب من أجل البقاء.. أي بقاء؟.. لا أدري.

أشتقت كثيرا لملمس أصابعها حين تداعب عضلات صدري وبطني

ونظراتها المعجبة بقوتي وفتوتي، تلك فقط هي اللحظات

التي أشعر فيها بانتصاري في تلك المعركة.. أتوق أيضا لمشاعر وممارسات الحب المتحررة

التي لا أتذكرها ولا أمارسها إلا حين أرى ليزا.
- هتيجي بكرة؟
- طبعا جاي
- أما جبت حتة دين مايوه.. بس تحفة
- بكرة نشوف

يرتفع صوت فؤاد في تلك اللحظة عبر الوين أمب

" ده حتى بيحلي الصحبة لا تقول لي طوفي ولا مربى.. ده ربنا زاده محبة ويحب كل اللي بيحب "

.. ترتفع معها ضحكتي فجأة.. " والله عندك حق ".

رمضان جانا

أهلا رمضان

هرتلات

زمان كان الولد بياكل" كاراتيه" دلوقتي مبقاش فيه " كاراتيه " فالولد " قلبظ "

....

المرحوم اللي على علب السجاير خلاص هيشيلوا صورته.. تقريبا الأربعين عدى

....

صديقي متزوج من منتقبة.. في زحمة المواصلات جرى ليحجز لها مكانا في الميكروباص بجواره وحين جلس أخذ يشدها من ذراعها.. اركبي يا ولية اركبي.. والست ترد عليه مش انا مش انا.. مطلعتش مراته

....

الفارق بين الحضري وأمير عبد الحميد نقطة جعلت من الأول "مسلح" ومن الآخر " مسلخ" "

.....

BTM أحلى حاجة في بعثتنا الأوليمبية هي بدل

اللي كانوا لابسنها في الافتتاح.. هو ده التمثيل المشرف

....

زمان كانت السينما "حسن ومرقص وكوهين" ودلوقتي أصبحت "حسن ومرقص" فقط.. ربنا يستر ومتبقاش "حسن وبس"

....

الدنيا سيجارة وكاس.. ممكن تبقى سيجارة كليوباترا مكتومة وكاس منقوع البراطيش .. وممكن تبقى سيجارة ماريجوانا وكاس شامبانيا

....

كثيرا ما أقطع طريق العودة من عملي في شارع سوريا بالمهندسين إلى بيتي في العباسية ماشيا.. الناس تعتبرني مخبولا وأنا أراها

متعة لا مثيل لها.. محدش له دعوة

حليم.. حكاية شعب ولا حكاية نظام..؟

يمكن حكاية روح.. لامؤاخذة يا عدوية

حليم أسطورة الغناء التي صنعها إعلام الثورة قبل أن تصنعها إختياراته وأغانيه.. هل كان حليم مطربا للنظام؟

حليم الطفل والشاب الذي عاش حياة بائسة وشق طريقه في عالم الفن مستندا إلى حنجرته التي يملؤها الإحساس، ساقه القدر إلى الغناء في عيد الثورة الأول ونجح إعلام الثورة بشكل كبيرفي صنعه كأول حالة نجاح أوكأول هدية من الثورة للشعب المصري.

من يومها أطلق حليم لحنجرته العنان وحدد أغانيه بين العاطفي الذي يحبه الجمهور والوطني الذي يرضى عنه النظام.

في الحقيقة لم يغن حليم سوى أغنية وطنية واحدة خرجت من قلبه بمنتهى الصدق ولمعت فيها حنجرته كما لم تلمع من قبل " عدى النهار " والتي غناها عقب النكسة، فيما عدا تلك الأغنية سخر حليم موهبته وفنه لخدمة النظام فغنى للاشتراكية والسد العالي وأغانيه عن " ثورتنا المصرية " والقومية العربية التي نادى بها عبد الناصر الذي لم يتركه ولم يتركنا حليم دون أن يصب على آذننا أغاني من عينة" يا جمال يا حبيب الشعب " وغيرها.

بعيدا عن فكرة إذا كان حليم أداة من أدوات النظام أو أنه اختار أن يغني للنظام بإرادته، يبقى خطأ حليم الأكبر والأهم هو غناءه لفترة سياسية معينة أو لنظام أو لفرد بأعينهم،فلم يحسب حليم وقتها حسابا للزمن الذي ربما يثبت عكس ظن حليم ، فضلا عن إهداره لفنه في غناء لن يعيش، فمن منا يفكرفي سماع أغنيات حليم التي ترتبط بالثورة وبعبد الناصر؟

لم نعد نسمع تلك الأغاني إلا في يوم عيد الثورة على شاشات التليفزيون المصري أو عبر موجات الأثير ولو تغير النظام الحاي بنظام آخر لا يؤمن أو بناصر ستعدم تلك الأغاني ولن نسمع عنها مجددا.

الخطأ هو خطأ كل فنان يجنح بفنه نحو إرضاء السلطة.. أعجبني يوسف شاهين شفاه الله حين قال يوما " الفنان يجب أن يبقى دائما على يسار السلطة فالفنان دائما يسعى نحو الأفضل له ولبلاده " انتهى كلام شاهين الذي عرف كيف يحترم فنه وفشل حليم في هذا.

يبقى حليم مطربا عاطفيا مميزا مازلنا نردد أغانيه العاطفية حتى الآن لكنه في رأيي لم يكن الأفضل ولم يكن يوما أسطورة.

ده مقال كنت نشرته من سنتين تقريبا في مثل هذا الوقت اثناء احتفالات الثورة

إن في ميدان الخوازيق لمتسع للجميع 2

بطولة الأمم الأوروبية.. حيث قمة المتعة الكروية في العالم.. لا تخلو أيضا من الخوازيق


خوازيق إيطالية

دونادوني.. مدرب لا حافظ ولا فاهم

ماتيراتزي.. عسكري مرور



أمبروزيني.. شبه مدربه



خوازيق فرنسية

دومينيك.. حافظ مش فاهم

جوفو.. مش عارف ليه افتكرت عماد متعب

دي

اهم خوازيق البطولة اللي افسدت عليا متعة المشاهدة

!!.. لحمة وفتة وفول نابت.. يا أم هاشم يا طاهرة

هو أحد أهم الموالد التي تأخذ الطابعين الشعبي والرسمي.. مولد السيدة زينب بنت سيدنا علي رضي الله عنهما.. يتميز مولد السيدة زينب أو أم هاشم كما خلدها يحيى حقي بجو خاص.. هناك في وسط القاهرة حيث مقام السيدة ترى في أسبوع المولد خياما لكل المحافظات فكل مقتدر في كل محافظة تلاقيه عامل خيمة لأهل محافظته فيها ما لذ وطاب من الأطهمة لحوم وفتة ورز وطبعا الفول النابت.. منهم اللي بيعمل الحكاية دي لوجه الله ومنهم اللي بيعملها لغرض فين نفس يعقوب - يعقوب مين؟ -



يا تمر حنة يا تمر حنة.. عادي متستغربوش كل موالد مصر فيها تمرة حنة والولا حسن.. المولد اللي المفروض انه بياخد طابع ديني لابد تلاقيه فيه غازية ومطرب وسييط وحاوي جلا جلاو فقرة سيرك وفتح عينك تاكل ملبن وهتلاقي احمد رمزي ورشدي اباظة بيستعرضوا عضلاتهم ع المدفع والكسبان يقابل نعيمة عاكف في النهائي!!



موسم للارتزاق والاسترزاق.. موسم للهليبة والنشالين والمتحرشين وكل شيء، العيال تلعب مراجيح والشباب يضربوا بيرة وحشيش ويتحرشوا.. في الزحمة لا رقيب



ندخل الجامع.. حلقات ذكر والله حي ودروشة ومش عارف ايه اللي هيقربني من ربنا وانا قاعد اطوح في دماغي يمين وشمال؟.. ناحية االمقام ناس بتتمسح فيه ويا طاهرة يا ام هاشم حنني قلب جوزي عليا واكفيني شر حماتي.. يا طاهرة ابني عاطل بقاله سنتين.. يا ام هشام ابويا دوخنا به ع المستشفيات.. هنا فقط يأتي دور زيت القنديل.. اكيد شفتوا الفيلم مفيش داعي بقى نرغي في الحوار ده تاني!



في مولد السيدة وبجانب الحمص والحلاوة هتلاقييهم بيبيعوا طواقي مكتوب عليها مولد السيدة.. على سبيل ان يكون فيه يونيفورم يعني او حاجة توضح ان لابس الطاقية دي له حصانة خاصة.. الطاقية سعرها جنيه واحد عشان محدش يضحك عليك



تفتكروا ان السيدة زينب فرحانة بينا واحنا بنحتفل بميلادها بالشكل ده؟.. والله انها بريئة مننا ومن أفعالنا دي

El-Desooky crocodile is more famous than lacoste

تمساح سيدهم إبراهيم الدسوقي.. أشهر حاجة ممكن تشتريها من مولد إبراهيم الدسوقي في كفر الشيخ

هحكي لكم حكاية التمساح بس الأول أقول لكم مين هو إبراهيم الدسوقي:

هو ابراهيم الدسوقي الذي يعود نسبه إلى الحسن سبط رسول الله صلى الله عليه وسلم واتولد سنة 633 هجرية

وكان يتحدث اللغات الأجنبية ويجيد السيريانية والعبرية ويحاور الوحوش ويتحدث مع الطيور يعني بالصلاة ع النبي الراجل خد الأوبشن بتاع سيدنا سليمان وكلم الحيوانات والطيور.. يعني معجزة سيدنا سليمان اتكررت تاني مع الدسوقي.. حلو الشغل ده!!



طيب ايه حكاية التمساح بقى؟..قال لك ان كان فيه عيل صغير اسمه تررم.. بلعه تمساح.. قوم أم الولد ده جريت على الدسوقي تستنجد به قوم ابراهيم الدسوقي يأمر واحد من اتباعه انه يروح لحد الشط ويشخط في التماسيح ويقول لهم الواطي اللي بلع الواد يطلع به.. فما كان من التمساح اللي غلط غلطة عمره وبلع الواد إلا أنه طلع وقال أنا ومشي مع التابع لحد ابراهيم الدسوقي ولفظ الواد من فمه حيا!!.. الله اكبر.. قوم إيه كمان.. قال لك ان ابراهيم الدسوقي قرر يعاقب التمساح فأمره إنه يموت فمات في الحال.. عارفين.. نفسي أقول كلمة قبيحة ..



قال الدسوقي أمر التمساح إنه يموت فمات علطول وبعدها احتفظ بفقرة من ضهر التمساح حطوها في المقام بتاعه وبقوا يعملوا التماسيح تمائم ويبيعوها في المولد.. يا صلاة الزين.. هو العته وصل بالمصريين للدرجة دي؟



استنوا.. لسه كرامات الدسوقي مخلصتش.. خدوا دي كمان قال لك الناس كانوا مختلفين على أول يوم رمضان وكان الدسوقي لسه طفل رضيع.. قام لما سمع إذان الفجر لفظ ثدي أمه وصام.. وبكده الناس اقتنعت ان اليوم ده غرة رمضان

كان نفسي اعرف هو اتكلم في المهد زي سيدنا عيسى ولا لا.. بما إنه يعني كلم الحيوانات والطيور زي سيدنا سليمان.. ولا لا أنبياء مين بقى.. الراجل بقى عنده قدرات الهية كمان وقال للتمساح موت والتمساح مكسرش كلامه وعملها



آدي حكاية من ضمن حكاوي كتير لموالد كتير بنعملها لناس منعرفش اصلهم او فصلهم مجردت عادات خبيثة توارثناها من ناس جهلاء وناس خبيثة زورت في التاريخ ولعبت في عقول الناس الملعوب في أساس عقولها أساسا.. انتظروا المزيد

!!.. المولد.. ليه تحج في السعودية لما ممكن تحج هنا

تفتكروا فيه كام مولد في مصر؟.. أقول لكم أنا .. 2850 مولد!!.. طيب تعرفوا فيه كام مصري بيحرص على حضور الموالد كل سنة؟.. أقول لكم أنا برضه.. نصف تعداد الشعب المصري بالتمام والكمال بيحضر الموالد دي .. وفيه ناس كتير أوي أوي أكيد كلنا نعرف أعداد منهم بتسافر للموالد أينما كانت.. يعني عادي جدا إنك تلاقي واحد راح يحضر مولد سيده عبد الرحيم القناوي في قنا وبعدين يشد الرحال على دسوق عشان يحضر مولد سيده إبراهيم الدسوقي ومن دسوق يتجه شمالا إلى إسكندرية الماريا عشان مولد سيده أبو العباس.. وبعدها بتجه جنوبا مرة أخرى لمشاركة أخواته الأقباط الاحتفال بمولد العدرا قبل أن يستقر في القاهرة لاستكمال بقية الموالد.. على فكرة ده مش واحد بيسترزق من الموالد.. لأ .. ده إنسان حابب يتقرب من آل البيت والصالحين ويوسطهم بينه وبين ربنا!!

طيب تعرف إيه عن الموالد يا عسل؟

يا سيدي الموالد دي عادة شيعية نشأت في عهد الدولة الفاطمية اللي تميزت بفساد ملوكها ووقتها كانوا بيحتفلوا بستة موالد.. هي المولد النبوي ومولد سيدنا علي وستنا فاطمة الزهراء والحسن والحسين ومولد الخليفة الحاضر - اشمعنى هو يعني - وده بدأ بالتحديد في عهد المعز لدين الله.

ومن بعدها انتشرت عادة الموالد وشملت كل آل البيت وأغلب من عرف عنهم التقى وكل من ظهرت له كرامة!!.. فلا تخلو منطقة الآن من وجود مقام مولد للعارف بالله سيدي فلان الفلاني أو السيدة فلانة بنت فلان!!

بالتأكيد ليس للموالد أصل في الدين وهي بدعة سخيفة ليس لها أي فائدة دينية غير أن الناس نسيت أنها تقابل وتكلم المولى عز وجل خمسة مكالمات مجانية في اليوم ودوروا ع الواسطة زي ما بيدوروا عليها في كل حاجة في حياتهم قبل ما يفكروا ينفذوا من غيرها.. بقينا نجري ونتمسح في سيدي مش عارف مين وستي مش عارف إيه ونقول لها سايقين عليكي النبي الواد يقبل في المدرسة السنة دي!!.

وأصبح إيمان البعض بكرامات الولاة دول أكتر من إيمانهم بربنا سبحانه وتعالى خالق الخلق!!.. فاكرين رواية يحيى حقي بتاعت قنديل أم هاشم؟.. طيب اللي مقرأهاش أكيد شاف الفيلم.. الرواية بتحكي عن كثير من الجهلاء الذين كانوا يعتقدون أن زيت قنديل أم هاشم يشفي كل مرض ويزيح كل هم وصراع أصحاب هذا الفكر العقيم مع ابن حتتهم اللي سافر ألمانيا وتعلم هناك أن يؤمن بالعلم فقط.. كل منهما متطرف وكلاهما يكفر بفكر الآخر.. والاتنين غلط.. وفي النهاية عم يحيى حل الموضوع وقال إن العلم لازم يجتمع مع الإيمان الصحيح.. مش التمسح في زيت القنديل.. عفوا التمسح بزيت القنديل.

هي دي أكبر مشكلة.. الجهل.. بس كمان الجهل عندنا أنواع!!.. ناس كتير بتروح تدعي وتتبارك ببعض الأولياء اللي محدش عارف لهم أصل!!.. يعني أراهن ان الست اللي واقفة تتحايل ع السيد البدوي عشان ابنها يلاقي شغل تكون تعرف مين هو السيد البدوي!!.. واتحدى لو كان الراجل اللي عمال يقول مدد يا سيدي الدسوقي مدد يكون يعرف تاريخ سيده الدسوقي!!

الموالد في مصر حواديت وحواديت.. ليست مجرد موسم يحمل نزعة دينية.. لكنه سوق لتجارة رائجة وموسم للنشالين ومرشحي الانتخابات والمسئولين المرضى بفوبيا القيام من على كراسيهم.. المولد حياة كاملة وحقيقية

وحكايات الموالد والأسياد وأصحاب المقامات والموالد كثيرة وبها مفاجأت.. انتظروها هنا في صمت البحر

من يوم بعدك

بعدك مش واخد على نفسي

بعدك مش عارف أنا مين

مفيش قوة على وجه الأرض هتمنعني من إني أنتحر!!

لا أعلم لماذا تذكرت هذا المشهد العبقري للراحل علاء ولي الدين وهو يريد أن ينتحر من فوق مجمع التحرير في فيلم الإرهاب والكباب

وهذه العبارة الخالدة التي أطلقها بمنتهى التحدي" مفيش قوة على وجه الأرض هتمنعني من إني أنتحر"، لا أعلم لماذا تذكرتها حين قرأت قصة " يوم انسحاب العدو" من مجموعة "بني آدم مع وقف التنفيذ" للأديب الواعد محمد التهامي.



التهامي الذي تميز في استخدام اسلوب الحكي .. حكى لنا عن ذلك العدو الذي احتل مصر يوم مباراة الأهلي والزمالك وكيف لم يلتفت الشعب المهموم بالمباراة ونتيجتها والمتابع لها بكل جوارحه إلى سير الدبابات وجنود العدو في الشوارع الخالية وقت المباراة ، وكيف أن القنوات المصرية فضلت أن تذيع نبأ الاحتلال عن طريق شريط الأخبار أسفل الشاشة حتى لا تفسد على المواطنين متعة مشاهدة لقاء القمة!!



العدو صال وجال في الشوارع الخالية حتى اكتأب ومل وقرر ترك البلد.. ملقوش شعب يحاربوه!! وكان تقريرهم إن المصريين ليسوا في حاجة لوسائل تدمير خارجية.. هم يستطيعون القضاء على أنفسهم دون تدخل من أحد.



طرافة فكرة التهامي وفانتازيتها لم تخرج بنا خارج دائرة الحقيقة فالحق أننا فعلا أفضل من ندمر أنفسنا بأنفسنا.. بنكبر الجي ونروق الدي ضد أي حاجة تشغل بالنا وتعكر مزاجنا وتضيع دماغ الحشيش المتكلفة.. ما تتحرق لبلد على أبوها لابو اصحابها.. يغلى رغيف العيش مش مهم.. مياه الشرب تدخل ع الصرف الصحي.. مناعة.. معتقلات وسجون ع الفاضي والمليان.. اهم يخفوا الزحمة.. مرتبات قليلة والأسعار كل دقيقة بتزيد.. ساكتين طالما لسه بناكل وبنشرب.



احنا فقدنا القدرة على تذوق طعم الحياة.. الحياة عندنا بقت مرتبطة بالأكل والجنس وبس.. يعني طالما اتعشت ومتفضحش قدام مراته يبقى خلاص الحياة زي الفل.. احنا فعلا ناجحين في إننا نقضي على أنفسنا بأنفسنا دون أي تدخل.. يا ريت بقى عم بوش وغيره من الطامعين الطامحين يسيبونا في حالنا ووعد مني احنا هنخلص على نفسنا قوام قوام ونسيبها لهم مخضرة بانجو

مين اللي قال البعيد عن العين بعيد عن القلب؟

أوراق منثورة

البعيد عن العين.. بعيد عن القلب..!!
بعيد عنك لكن جنبك وأقرب ليكي من قلبك
بحبك.. مستحيل أنسى هواكي.. طمني قلبك

رامي صبري.. شاب في العقد الثالث من عمره

نفسي أشوفك واسمع صوتك
أعمل إيه واروح لك فين؟
بعدك مش واخد على نفسي
بعدك مش عارف أنا مين
صعب عليا اتحمل بعدك
واعيش العمر حزين
دا أنا لو غالي عليك ترحمني
أنا مش عارف أعيش غير بيك

محمد فؤاد.. رجل أربعيني العمر

من بلاد النفط أكتب إليك وحدك.. سنون الغربة لا تفوت، والعمر يمر كقطار سريع " توووت "، افترقنا بفعل الظروف، لعن الله الفراق، في مصر كل شيء يذكرني بك.. صورتك التي وضعتها في برواز أهديتيني إياه، نهر النيل شاهدُ أيامنا في العشق والهوى، شوارع وسط البلد، جروبي ومكتبة مدبولي التي أهديتك منها " الخيط الرفيع "، وكل شيء. فشلت في تطبيق فعل النسيان، وإلى بلاد النفط رحلت، تركت الصورة في بروازها والنيل لعشاق غيرنا، وخيط إحسان عبد القدوس الرفيع ليفعل به ما يشاء.. أخبروني بأن البعيد عن العين بعيدا عن القلب، لذلك رحلت، قررت أن أخوض تجربة النسيان في مكان آخر، وصممت على نجاح التجربة.. وفشلت. الصورة تركتها في بروازها وطبعتها بعيني داخل قلبي، ورائحة عطر عيد الحب الفرنسي لا زالت في أنفي، لا أشم غيرها، ولا أفيق من تأثيرها الذي نافس نبيذ فرنسا الأحمر. لا زلت أتذكر جرس هاتفي النقال حين توقظيني في السابعة صباحا لأذهب إلى العمل " الله عليك.. من بين عينيك.. شايف خطاوي مخضرة الله عليك"، لا زلت أتذكر مكالمة المساء وأشتاق لغيرة حمقاء،وعبارات مثل " وحياتي تبطل سجاير - قلقتني عليك أوي - مش لازم تشتغل صبح وبعد الضهر وتهلك نفسك.. لسه قدامنا وقت " لا زلت أتذكر رسائلك القصيرة لتذكيري بأن غدا أول ذو الحجة ولازم تصوم أو لمباغتتي بسؤال " صليت الضهر؟ ". لاسمك في لساني مذاق العسل المر، عسل الذكريات ومر الحاضر بوجع البعاد، لا زلت أحبك وأتنفسك كما كنت أفعل دوما.. أعرف.. لم يعد ينفع أن أرسل خطاباتي إليك ولكنك.. وحشتيني.


أنا جراح كبير.. أعيش في لندن التي احتوتني بعد رحيلي عن مصر عقب النكسة، قدمت لي لندن كل شيء، العلم والعمل، التقدير المادي والمعنوي والمال الوفير، الشهرة والمكانة الاجتماعية المرموقة، باختصار قدمت لي لندن كل شيء. لدينا في انجلترا أقوى مسابقة كرة في العالم ومع ذلك قمة متعتي الكروية في مباراة للأهلي وطنطا أشاهدها على الفضائية المصرية!!
لدي هنا جهاز فيديو قديم وعدة شرائط فيديو ليس من بينها أفلاما لنجوم هوليود، فقط لدي أفلام ضد الحكومة واللعب مع الكبار وباب الحديد وبداية ونهاية والناصر صلاح الدين واشترى ابني فيلما اسمه اللي بالي بالك، حفظت مشاهد تلك الأفلام حرفا حرفا وأبدا لم أمل منها ولم أسأم من مشاهدتها يوما!!

أفرح كالأطفال حين يأتي أحد المصريين للعمل هنا وأجده داخلا علي بفطيرة مشلتتة، أوحين أستقبل أحدهم في المطار وأحضنه بشده لأشم رائحة مصر في ملابسه. لم أنس مصر يوما ولم تصدق معي مقولة أمي " البعيد عن العين بعيد عن القلب " ولم تفلح رفاهية لندن أن تنسيني حارتنا بحي السيدة زينب، حتى فسحتي مع زوجتي الإنجليزية في الهايد بارك لم أحسها كما أحسست برومانسية حديقة أحمد رامي بالمنيل حين كنت اصطحب حبيبتي زميلة الدراسة إلى هناك.
لم أضع في سيارتي يوما ألبوما للبيتلز أو فرانك سيناترا، في سيارتي فقط راكبة دائمة هي أم كلثوم.. كلمة واحدة: البعيد

عن العين يملك القلب.

في مسجد نفيسة العلم وبعد أن صليت العصر وجلست قليلا ، جالت بخاطري تلك العبارة " البعيد عن العين بعيد عن القلب ".. أومال أنا هنا بعمل إيه؟! لم أرى الله تعالى يوما.. وأحببته.. عشقت رسول الله صلى الله عليه وسلم ولم أشرف يوما بمقابلته.. تعلقت بشدة بالفاروق بن الخطاب وقد رحل قبل مولدي بأكثر من ألف عام.. إذن اللي قال الجملة دي هجاص وخروف كبير.

مقولة صدرت من بلاد تدّعي أنها أرض الرومانسية وبسببها أطلقوا على قبلات العشاق " قبلات فرنسية "، هم يرون أن " البعيد عن العين بعيد عن القلب ".. هم يرون ذلك إذن فمن الفارس العاشق عنترة إلى فاروق جويدة صاحب أعظم بيت في الحب.. تبقى الرومانسية الحقيقة حصرية على القناة العربية.

أترككم مع جويدة والسلام ليس ختام..

لو أننا لم نفترق لبقيت نجماً في سمائك سارياً وتركت عمري في لهيبك يحترق لو أنني سافرت في قمم السحاب وعدت نهراً في ربوعك ينطلق لكنها الأحلام تنثرنا سراباً في المدى وتظل سراً في الجوانح يختنق ... لو أننا لم نفترق كانت خطانا في ذهول تبتعد و تشدنا أشواقنا فنعود نمسك بالطريق المرتعد تلقي بنا اللحظات في صخب الزحام كأننا جسد تناثر في جسد جسدان في جسد نسير و حولنا كانت وجوه الناس تجري كالرياح فلا نرى منهم أحد ... مازلت أذكر عندما جاء الرحيل و صاح في عيني الأرق و تعثرت أنفاسنا بين الضلوع و عاد يشطرنا القلق و رأيت عمري في يديك رياح صيفٍ عابثٍ و رماد أحلام .. وشيئاً من ورق هذا أنا .. عمري ورق .. حلمي ورق .. طفل صغير في جحيم الموج حاصره الغرق .. ضوء طريد في عيون الأفق .. يطويه الشفق .. نجم أضاء الكون يوماً واحترق ... لا تسألي العين الحزينة .. كيف أدمتها المقل لا تسألي النجم البعيد .. بأي سر قد أفل مهما توارى الحلم في عيني و أرقني الأجل مازلت ألمح في جبين الأفق نجمات جديدة و غدا ستورق في ليالي الحزن .. أيام سعيده وغدا أراك على المدى .. شمسا تضيء ظلام أيامي .. و إن كانت بعيده ... لو أننا لم نفترق حملتك في ضجر الشوارع فرحتي و الخوف يلقيني على الطرقاتِ تتمايل الأحلام بين عيوننا و تغيب في صمت اللقل نبضاتي و الضوء يسكب في العيون بريقه و يهيم في خجل على الشرفات ِ كنا نعانق في الظلام دموعنا و الدرب منفطر من العبرات و توقف الزمن المسافر في دمي و تعثرت لوعة خطواتي و الوقت يرتع والدقائق تختفي فنطارد اللحظات باللحظات ِ ما كنت أعرف والرحيل يشدنا أني أودع مهجتي و حياتي ما كان خوفي من رحيل آتي لم يبق شيئا منذ كان وداعنا غير الجراح تئن في كلماتي ... ااااااااه لـــــــو أننــااا لم نفترق ؟؟..

أصعب تاج

وده طبعا غير أصعب حب بتاعت عجاج
التاج ده جاء لي عبر مدونة الروح لصاحبتها الست
bos bos هانم
التاج عبارة عن سؤال واحد لكنه بجد في قمة الصعوبة
اتكلم عن نفسك في 10 نقاط؟
حاضر
1- صبري سراج.. إعلامي مصري ( صحفي ومذيع يعني ) بدأت العد التنازلي لوصول سنوات عمري للرقم 24 ، ليسانس لغات وترجمة فورية قسم إنجليزي،لي أخت واحدة هي نورهان سراج صحفية ومدونة (زميلة يعني)،بحبها جدا رغم اننا مش شبه بعض (أنا أحلى طبعا)، أصحابي كتير كتير الحمد لله لكن الأقرب ليا دايما 3 ،حسين هاشم وده برضه صحفي ومدون(يعني انا محاصر بالبيت والأصحاب في كل حتة)، حسين في سنة 4 حقوق وربنا ينتعه منها بالسلامة، واسلام منسي وده برضه مدون، اسلام بيشتغل في قناة فضائية عجيبة كده،ومصطفى عبد العزيز وده الوحيد فينا اللي ملوش في الكتابة من أصله، درش مهندس كميائي في شركة عجيبة برضه
كمان فيه leeno لينوتشي حبيبتي ودي بجد أختي الكبيرة واكتر حد بحسه شايل همي..بحبها حب خالد بيبو لبشير التابعي
2- انا انسان متقلب المزاج، معنديش ثوابت في تفكيري، عصبي أحيانا،ثقتي في نفسي ملهاش حدود وده بيضايق بعض الناس مني لأنهم بيشوفوا إن ده غرور، بحب دماغي وطريقة تفكيري وبحب أغلط واتعلم ومعنديش أدنى مشكلة في الاعتراف بخطأي،

3- طموح لأقصى درجة وعندي حلم مصر أحققه لكني في نفس الوقت بضيع وقت كتير.. وده أسوأ اعتراف بعترفه في حياتي..اصحابي بيساندوني بشكل كبير وهم أكبر دافع ليا عشان أنجح خصوصا محمد التهامي وحسين هاشم ومصطفى فتحي وإسلام منسي ومصطفى عبد العزيز.. ربنا ما يحرمني منهم أبدا.. الناس دي بتحبني في الله ومش مستنية مني أي حاجة .. اللهم الا واحد فيهم مستني البناطيل الجينزlol

4- مسحتها

5- بحب المزيكا والسينما جدا وبحترم الفن اوي ومبعتبرش الرقص فن، من أحلامي يبقى عندي شركات انتاج موسيقي وسينمائي اقدم من خلالها فن محترم بجد، فن ميستخفش بعقول الناس ويساعد في تربية جيل يعرف يعني ايه حرية مسئولة، أدي فرصة لكل مبدع وموهوب،انه يعبر عن وجهة نظره في الحياة ويمارس ابداعه بدون قيود إلا خوفه من ربنا.

6- نفسي أكون إعلامي كبير.. مذيع وكاتب صحفي بأثر في الناس ولما اموت الناس تقول الله يرحمه من قلبها وهي قلبها موجوع عليا ووشهم مبتسم.. لما يفتكروني ميفتكروش غير الخير.. نفسي محدش يكون كارهني أو شايل مني.. لأني قاسي وبقسى على الناس اللي بحبهم اوي.. لأني بجد بحبهم وخايف عليهم.

7- بحب الكورة اوي وبفهم فيها.. أهلاوي أوي.. ومحسوب دلوقتي على جبهة المعارضة الأهلاوية لأني معارض لسياسة النادي دلوقتي وطبعا ناوي ابقى عضو في النادي اما اشتهر واغتني بإذن الله.. بيقولوا العضوية دلوقتي وصلت 80 ألف ..

8- بحب مصر اوووووي..بحبها بكل حرف كتبه صلاح جاهين ومدحت العدل وايمن قمر وبكل نغمة غناها منير وفؤاد لمصر بصدق وبجد وبدون مناسبة..بحبها اوي يا جدعان اوي

9- بكره القراءة لكني بعتبرها زي المية والهوا يا هنايا في حبهم.. ضرورة وشر لابد منه.. بحب بلال فضل وخيري شلبي وكنت بحب نبيل فاروق ايام المراهقة وبحب محمد التهامي واحمد مجدي كمان.. بحب نزار ودرويش وعنترة والمتنبي وعم جاهين وعم نجم وسيد حجاب وشاعر محدش يعرفه اسمه عبد الرحمن والي.. هيبقى شاعر كبير اوي

10- بقالي ساعة وشوية بجمع في الكلام.. اصعب شيء في الدنيا انك تتكلم عن نفسك.. بس انا صيعت شوية واتكلمت على ناس تانية.. عفريت انا

بمرر التاج ده

لكل مدون اسمه اتكتب في موضوعي أضيف عليهم

فنون وماجا وقباري

غلوكي يا غالية

بقت بـ 9 جنيه

!!.. مطلعش هو

تعرضت لخدعة كبيرة أوي أوي .. غلطت في حق الشيخ محمد حسان دون قصد



كنت اشتريت حوالي شريطين أو 3 مكتوب عليهم اسم الشيخ محمد حسان



والكفرات عليه صورته لكن جوه الشرايط كان فيه واحد بيجعر



وكلامه من نوعية لو مصلتش هيطع تييييت أهلك في الآخرة



عشان كده كانت فكرتي عن الشيخ محمد حسان سيئة



لكن اكتشف انه مش هو الراجل اللي كان بيجعر في الشرايط



وان محمد حسان نفسه بيتخدع زيي



عموما انا بعتذر للشيخ ولكل الناس اللي بتحبه عن اللبس ده



ومش هقول رأيي في محمد حسان الجديد غير لما اسمعه كويس



لكن الاعتذار واجب طبعا

إن في ميدان الخوازيق لمتسع للجميع

خوازيق فضائية

يوسف البدري: وأطيعوا الله وأطيعوا الرسول وأولي الأمر منكم..البدري يفتي بعدم مشروعية اضراب

4 مايو على أساس إننا بنخرج عن طاعة الحاكم

ميلودي تتحدى الأدب

خوازيق رياضية


ريكارد.. مدرب برشلونة ولا راد لقضاء الله



أحمد عادل فتى الأهلي الذهبي

خوازيق فنية

انت قلبك قاسي أوي أوي

تيمو ملك الجيل التالت

خوازيق اقتصادية

منصور أوبل

حمادة عزو

خوازيق سياسية

زبيبة

الخليفة المنصور

مهما كانت تطلعاتك.. أردت تكون خازوقا أو اخترت أن تجلس على الخازوق.. أن في ميدان الخوازيق لمتسع للجميع

!أعمل إيه؟

فكرت أبقى جنتل مان لقيته بيلبس غالي.. فكرت أبقى سوبر مان لقيته بيلبس البوكسر فوق البنطلون!!

!!.. عيل ومفيش كده منه

يا ترى ينفع اتصور الصورة دي تاني؟

!!قال لك محافظتين جداد.. إفطن

صحيت الصبح اتوضيت وصليت وكالعادة نزلت رغما عني أشتري جريدة الأهرام لأبويا - اللي كان رغما عني هو

شراء جريدة الأهرام مش تنفيذ طلب لأبويا طبعا ، أنا برضه شاب متربي وابن ناس كويسين - المهم ياخونا قلت ابص ع الصفحة الأولانية وانا طالع ع السلم عشان أعد فيه كام خبر نزل عن الريس في الصفحة دي - دي من هواياتي وبجد فيها متعة أكتر من السودوكو اللي مش فاهمها دي - وكانت المفاجئة الفجائية والصدمة الصباحية والإفيه العبقري اللي خلاني اتقلبت على ضهري من الضحك أكتر من أفلام محمد سعد .. قال لك قرار جمهوري بتقسيم القاهرة والجيزة ل 4محافظات.. محافظة حلوان تضم مناطق حلوان والقاهرة الجديدة ودار السلام ومايو والهايكستب ومحافظة 6 اكتوبر وتضم جامع الحصري وعمرو خالد.

يعني أختي حبيبتي مروة عوض اللي ساكنة في مايو نامت بلليل وهي في القاهرة صحيت الصبح لقت نفسها أقاليم وإنها عشان تروح شغلها في المهندسين مضطره تعدي على 3 محافظات - إيه اللي جاب القلعة جنب البحر!!- طب دي مشكلة مروة المؤقتة.. طيب عمي اللي ساكن في الهرم وهيجدد رخصته كمان كام يوم.. هيضطر يا عيني يسافر لمحافظة 6 اكتوبر عشان مرور الجيزة موجود هناك.. علل!!.. طيب بلاش عمي .. خلينا مع المرور نفسه.. المفروض ان اللي ساكن في حلوان دلوقتي يروح يغير نمر عربيته اللي هي ملاكي القاهرة وياخد نمر جديدة ملاكي حلوان وطبعا هيدفع رسوم.. والمفروض ان الناس اللي قدرهم الاسود جعل سكنهم في 6 اكتوبر يروحوا يغيروا ورقهم كله البطاقة والرخص وشهادات الميلاد وكله كله لأنهم خلاص مبقوش من أهل محافظة الجيزة.. بقوا محافظة 6 أكتوبر.

مش عارف ليه متخيل شكل سيادة اللواء مأمور قسم حلوان لما صحي من النوم الصبح وقرأ الأهرام زيي كده.. يالهوي بالي طب أنا دلوقتي لسه مأمور ولا بقيت مدير أمن؟.. محدش فاهم حاجة

طيب أنا فيه واحد غتت اعرفه كان مرشح نفسه في انتخابات المحليات عن دايرة النزهة وخد أغلب أصواته من الهايكستب حيث حبايبه الصعايدة.. دلوقتي الهايكستب بقت تبع حلوان وبناء عليه بقى المعلم عضويته في المجلس المحلي غير شرعية.. أنا فرحان فيه

طيب أنا عندي كام سؤال - غير بتوع عدوية - الأولاني لرجل الأعمال أنسي ساويرس وبقول له يا كبير الناس بتوع حلوان واكتوبر اللي بقو أقاليم.. هل أصبح من حقهم استخدام خط ألو أقاليم ولا لا؟

وسؤالي التاني بوجهه للدكتور طارق كامل هل يا دكتور هيتعمل تعريفة جديدة للمكالمات في المحافظات دي وتبقى مباشر؟

وسؤال تالت للدكتور محمد فريد خميس.. هل جاء لحضرتك تكليف للنساجون الشرقيون بعمل سجادة جديدة عليها خريطة مصر بعد التعديل عشان تتعلق في قصر الرياسة وراء الريس في اجتماعاته مع السادة الزعماء ولا لا؟

تبقي مشكلة لو نسيوا.. هيبقى شكلنا وحش أوي قدام الأجانب

وهسأل كمان الناس بتوع شركات غرب ووسط وشرق الدلتا بتوع الاوتوبيسات المكيفة دي هل هتعملوا خطوط رحلات

للمناطق الإقليمية دي؟

وسؤال كمان للسيد وزير التربية والتعليم.. هل ربنا هيكرمنا ونشوف تعديل في مناهج الجغرافيا عشان الطلبة تعرف التقسيم الجديد ويقدروا في الفسحة يغيظوا بعضهم.. أنا من القاهرة وانت من الأقاليم؟

وسؤالي الأخير للرئيس مبارك وبالمرة كل مصري يسأله لنفسه.. ليه يا ريس معملتش الموضوع ده قبل انتخابات المحليات مع إن ده البديهي والمنطقي.. كده يا ريس تخليني اشمت في صديقي الغتت اللي عضويته بقت غير دستورية ؟

حيران

سألت نفسي كتير .. مرستش يوم على بر

أنا اللي فيا الخير ولا اللي فيا الشر؟

والله لأشكي لأمي

كلمتنا- إبريل 2008



حين كتب أستاذي الرائع بلال فضل خطابه الرائع أيضا لمدام جوليا روبرتس، وبعدها قام البراء أشرف وتجرأ بكتابة خطاب مماثل لحبيبة الملايين شاكيرا، قلت لنفسي واشمعنى أنت يا أبو الصبارير – وده اسم دلع أطلقه علي أحد الأصدقاء – وقررت أن أواصل المسيرة يمكن الموضوع يبقى موضة، أو يمكن بلال يقرأ خطابي ده ويبتسم لما يلاقيني بقلده.
طيب دلوقتي عمي بلال بيحب السيما الأمريكاني وعزيزي البراء بيحب المزز –عفوا- المزيكا الغربي والعبد لله منفسن من الاتنين – السيما الأمريكاني والمزيكا الغربي متودوناش في داهية- عشان كده قررت أن أكتب جوابي لأمي – سامع واحد بيقول وأنا مال أمي ما تكلمها في البيت يا عم – حاضر بلاش أمي أنا برضه محبش سيرة أمي تيجي على لسان الناس، أنا هكتب جوابي لأم المصريين فردوس محمد.
ماما فردوس.. بعد التحية
بكتب لك من الغربة – عارف أني بكتب جوابي من أحد مقاهي العباسية وأني مأسعدنيش الحظ بعقد عمل خليجي أو هجرة لكندا، وأني مرزوع ع القهوة مستني واحد صاحبي ييجي يحاسب لي- بس أنا حاسس بغربة.. أي والله يا أمه حاسس بغربة جوه بلدي، مش لاقيني ولا لاقيها، يظهر يا أمه أن بلدنا هجت وراحت تشوف رزقها في حتة تانية، أو يمكن بتدور على ناس يحترموها ويقدروها، حاكم احنا بهدلناها أوي يا أمه.. طبعا أنت في تربتك بقالك سنين ومش دريانة بحاجة فسيبيني أقولك بقى:
زجاجة الزيت بقت ب11 جنيه وجرام الذهب بقى ب150، وتامر حسني بقى بطل قومي بعد ما هرب من الجيش، تامر ده مطرب يا أمه جابوا عبلة كامل تعمل دور أمه في الفيلم بدالك، عبلة دي طيبة وحنينة زيك كده، متتخيرش عنك، لو شفتيها هتحبيها.
في بلدنا يا أمه اتنين اسمهم أحمد عز واحد ممثل الناس بتحبه والبنات بتتهبل عليه عشان حليوة، والتاني ملك الحديد – متفتكريش يا أمه أننا جبنا بطل تاني بعد خضر التوني - يا أمه لا ده ملك سوق الحديد، اتجوز من فترة ودفع مهر 25 مليون واللي هيدفع 25 قرش مش عارف يتجوز يا طيبة.
البلد بقت مليانة مظاهرات بس مش ضد الإنجليز.. دي ضد الغلاء والفقر، الناس بتنام جعانة يا أمه.. متهيألي أيام الإنجليز مكنتوش بتباتوا من غير عشاء.
اليومين دول البلد مقلوبة، الحضري خلع على سويسرا – يا ترى مين وراه – آه أنت محضرتيش الحضري صح، الحضري ده يا ستي جون الأهلي وأحسن جون جابته أفريقيا، الناس بتحبه أوي بس قلبوا عليه لما هرب مع أنه غلبان هرب بطوله مش بملايين ومليارات زي بقية الناس، بس يظهر اسم سويسرا بقى بيعمل حساسية للناس.
هفرحك شوية بدل ما تدعي عليا أني نكدت عليكي وأنا عارف دعوة الأم مبتخيبش، مش كل حاجة في بلدنا وحشة يا أمه، السيما بقت حلوة أوي، بقى فيها أفلام مهمة زي أيامكم يا حبيبة، والأفلام بقت بتجيب ملايين لو كنت موجودة دلوقتي كان زمانك عندك شاليه في مارينا، بقى عندنا أفلام زي خارج ع القانون وحين ميسرة والجزيرة، وشاهين عمل فيلم اسمه هي فوضى جاب ييجي 15 مليون مع أنه مفيهوش هند رستم زي باب الحديد.
تصدقي يا أمه أن عادل إمام لسه الزعيم وأفلامه بتجيب أعلى إيرادات، ادعي له يا أمه ربنا يديله الصحة ويمتعنا، الراجل ده شاطر أوي.
أنا طولت عليكي مش كده؟.. ولا أطول هو أنت وراكي إيه يعني.. ولا أقولك هبقى أكتب لك تاني.. الكلام كتير بس أنا إيدي وجعتني، أصلي بقيت متعود أكتب ع الكمبيوتر، بس أعمل إيه مفيش جوابات بتتكتب ع الكمبيوتر، بيكتبوا عليه حاجة تانية اسمها إيميلات، توصل مسافة رمشة من عنيكي يا غالية، هبقى أشرحها لك في الجواب الجاي بقى.. وحشتيني أوي يا أمه.. والسلام ليس ختاما.

6إبريل.. اتلموا بقى

إضراب 6 إبريل هيكون علامة وإشارة مهمة أوي

هنعرف إذا كنا نقدر فعلا نتلم ونوحد صفوفنا وكلمتنا

ولا خلاص عليه العوض في البلد

المشكلة ان الناس نفسها الإضراب ينجح

بس روح الإنهزامية مسيطرة علينا ومحدش

عنده ثقة ان الإضراب هينجح فالبتالي مش هيشاركوا فيه

يا ريت يا جماعة كل واحد مقتنع بالفكرة يعمل اللي عليه

ويشارك في الإضراب.. يا ناس فوقوا البلد خلاص بتحتضر

عدنا بعد الفاصل

فاصل طويل أوي ..

انقطعت عن التدوين من فترة طويلة لأني بصراحة محستش بأي نوع من الود بيني وبين المدونات

لكن في الحقيقة أصدقائي كلهم طلبوا مني أرجع أدون تاني

وفي الأيام الثلاثة اللي فاتت كلمني أصدقائي

محمد حمدي صاحب مدونة دماغي

وأحمد جمال حول المدونة

والنهاردة لقيت عندي حنين لمدونتي .. فتحتها وفوجئت بوجود تعليقات جديدة

اتكتبت الشهر ده رغمم إني قاطعت المدونة من شهور

عشان كده العودة بقت ضرورة

التدوين وحشني وكل الناس اللي كانت مهتمة بمدونتي وحشتني أكتر