Tuesday, May 29, 2007

!!..تأملات وطنية طحن



قاعد مع نفسي ع القهوة بشرب شاي وبضرب حجرين المساء والسهرة , أفكر في التغيرات العظيمة اللي طرأت فجأتن على حياتي وفجأتن دي رغم ان بعضها كان بسابق ترتيب , ومحدش يسأل ازاي!! , حبيت ودا أول حدث عظيم في حياتي - ماشي كلنا بنحب - , ثانيا بطلت السجاير , محدش يقوللي ما انت نازل ع القهوة تشيش , عشان أكيد هرد عليكم وأقول ان الشيشة دي لزوم كتابة الموضوع..!!
ذهبت بتأملاتي من المحيط الشخصي إلى المحيط الوطني - ودا طبعا غير الحزب الوطني - وقلت ياسلام لو التغيرات العظيمة اللي أصابت حياتي تبهت ع الوطن الوطنطن ويحصل فيه هو كمان تغيير !! وعشان محدش يفهمني غلط التغييرات اللي اقصدها تغييرات بسيطة جدا لكسر الملل مش أكتر , مش هتكلم عن تغيير حكومة أو رئيس لأني عارف إننا شعب أصيل مبيهونش عليه العشرة , بس إيه رأيكم نعمل نيولوك للوطن ؟!
اسم مصر:
في المائة سنة الأخيرة تغير اسم مصر3 مرات , الأول كان اسمها المملكة العربية المتحدة , وبعدين أصبحت الجمهورية العربية المتحدة برضه , وبعد كدا بقت جمهورية مصر العربية , العجيب إن الأسم دا استمر كتير أوي دون السعي لتغييره!! فقلت ليه لأ ما نغيره , اشمعنى هو يعني , تفتكروا نسمي مصر إيه , بس عايزين اسم روش يناسب الألفية الجديدة والعولمة والحوارات دي.
العلم :
كمان علم مصر كانوا بيغيروه كتير وبعد ما كان أخضر مزهزه .. جعلوه بألوانه الحالية وعليه صقر قريش وبعد ما الصقر طار جابوا مكانه طائر العقاب اللي لسه مطارش لحد دلوقتي .
أعتقد اللون الأخضر قديما كان دليل على إن مصر بلد زراعية وطبعا الهلال والصليب معروف الهدف منهم . طيب العلم الحالي بألوانه الأحمر والأبيض والأسود ماهو المقصود من ألوانه؟؟
صديقي الوغد الشعبي الطبقة قال لي بفصاحة لسانه وفهلوته المعتادة : يا معلم الأحمر دمنا والأبيض قلبنا والأسود مش مننا!! .. مش عارف هل ممكن نغير العلم دلوقتي ونخليه ( pink) مثلا عشان هو الموضه دلوقتي وطبعا عشان نعطي ايحاء بإن الحياة في بلدنا لونها بمبي.
النشيد الوطني :
من يوم ما دخلت المدرسة وكل يوم في طابور الصباح نردد نفس الكلام بنفس اللحن ولا احنا فاهمين بنقول ايه ولا حاسين الكلام من أصله!!
بلادي بلادي بلادي .. لكي حبي وفؤادي .. مصر يا أم البلاد ..أنت غايتي والمراد .. وعلى كل العباد .. كم لنيلك من أيادي.
يا حلاوة المولد .. تفتكروا ان فيه حد في سنة 2007 ممكن يغني الكلام دا بصيغته الحالية دي ؟! .. على فكرة انا مش بعيب في الكلام ولا جودته .. فقط بتكلم عن الوقت اللي احنا فيه والوقت اللي اتكتب فيه الكلام دا من ييجي 100 سنة, ليه منفكرش نغير نشيد بلدنا ,ونخليه حاجة كدا خفيفة ولذيذة من مزيكتنا اللي بنسمعها وبنحبها , ليه فرض علينا نشيد بلادي وكمان بتوزيعته الموسيقية العقيمة اللي عملها محمد عبد الوهاب!! .. أنا عايز النشيد يتغير ونستبدله بأغنية يبقى إنت اكيد في مصر !! والله انا شايفها معبرة أكتر من بلادي بلادي , حتى لو خرج علينا البعض وقال بسذاجة الكلام!!
عارفين التغيرات البسيطة والساذجة دي لو حد غيري من اللي صوتهم مسموع فكر فيها وقالها , هتكون أزمة ملهاش مثيل ومجلس الشعب هيسيبه من مناقشة طلبات الإحاطة حول أفلام السينما ويركز في الطلبات الجديدة بعمل نيولوك للوطن , وهيخرج علينا السيد صفوت الشريف ويصرح إن لولا المناخ الديموقراطي في مصر مكنش فيه حد قدر يفكر بالجرأة دي وإن دي حاجة تحسب للنظام المبارك!! , ومش بعيد يخرج علينا من يكفر صاحب الأفكار دي ويقول انه خرج على آلهتنا ... احنا خلاص فقدنا القدرة على التفكير والتغيير .. للأسف .

5 comments:

nohamy said...

يا بنى كل حاجة بتغير انت عارف حتى نشيد مصر لسة متغير بعد حرب 73 كان فيه واحد تانى قبله

المهم أنت فكرت في كل التغيرات من تأثير الشاي و الشيشة

نصيحة منى اعمل عالمك المفضل و دولتك الخاصة داخل غرفة نومك

حط علمك و نشيدك الوطنى حتى لو كان أغنية لنانسي محدش هيكلمك يا معلم
انما تقول كدة وحش ده غلط

Sarah el eskafy said...

انا عايزة العلم يبقى على شكل دايرة عشان يبقى رمز للدايرة اللى بنلف فيها ومش عارفين نخرج منها
ويكون فيها نجوم صغيرة جدااااااااااا عشان تبقى دليل على الحقوق اللى ضايعة
ويبقى فى النص اللوجو علىشكل لاب توب عشان يدل على التنطور اللى احنا بينا يه
وياريت يبقى لونه اخضر محمر عشان يدل على الاراضى الزراعية اللى بتتحرق

كفاية عليك كده وده لوك مش بتاع شيشة
ده لوك امتحان المدونات عقبال عندك
وقريبا نوافيكم باخر الانباء

مشربية said...

دة اللي عملتة و الله يا تهامي
و يا سارة تصميم العلم اللي انت قلتي علية اجمل من تصميمي و الله فعلا العلم اتغير شكلة بدل النسر الحلو اللي ملهوش اي لزمة دة موجود مكانة "النوبي و الفلاح" لانهم رمز مصر الحقيقي دة رائي و
و يا صبري طبعا انت عارف رائيي في المقالة تحفة بجد و بالنسبة للنشيد هو دة الجديد
يا بلادي يا بلادي يلي سرقة اموال ولادي
و من قبلها اموال اجدادي
مش عارفين نعملك اية
عبط و استعبطنا
هبل و استهبلنا
خليكي بقةفي حالك و رجعيلنا اللي في بالك
الف شكر يا ريس

Anonymous said...

ايه رأيك لو نشيد بلادى يستبدل بقصيدة نجيب سرور الشهيرة عن مصر؟
مش بذمتك يبقى احسن
.............
بوست جامد

صبري سراج said...

تصدق حتى اوضتي مش عارف اغيرها غير في احلامي يا تهامي

.............................

لاب توب مين بس يا سوسة .. قولي رغيف عيش بمسمار عشان الناس تصدقك

.............................

عسكري .. انت اللي اوحيت لي بفكرة الموضوع اصلا

...........................

عاشور .. انت بتتكلم صح يا برنز