Sunday, May 6, 2007

تاج ماجد ابراهيم .. على مقاسي ..!!


في مكاننا المفضل في دار الأوبرا التقاني الزميل ماجد ابراهيم واتحايل عليا عشان يجري الحوار دا معايا

وطبعا انا اتنطت عليه من منطلق اني نجم ومطلوب وبتاع

وفي الآخر رأفة بيه قبلت اعمل الحوار

طبعا كل دي اشتغالات لزوم الصورة اللي في الاول دي

عشان مكنتش هسيب لكم الحوار من غير صورة يعني


دا تاج وصلني من الصديق والزميل العزيز ماجد إبراهيم


وطبعا دا هيكون أول تاج أجاوب عليه بصفتي لسه في سنة أولى تدوين



س1 تكلم عن هوايه لما بتمارسها بتستغرق فيها تماماوتنفصل عن عالم الواقع لفترة من الوقت اثناء ممارستها ..؟؟؟


بالتأكيد هي كرة القدم التي أبدع في وصفها من أطلق عليها الساحرة وأشياء وقيم كثيرة جميلة االمستديرة , أنغمس حتى قدمي في حالة ممارستي أو مشاهدتي
لكرة القدم فهي لعبة ساحرة بحق تجمع الفكر والمهارة والقدرة على اتخاذ القرار والإيثار والتعاون والقدرة على التحمل والصبرأضف إلى هذا بالطبع متعة الممارسة ونشوة لإنتصار.



س2 صف مقدار سعادتك أو شعورك_أيا كان عند تمرير التاج لك وهل يختلف حسب المدون الذى يمرر لك التاج ..؟؟


كنت سعيدا جدا فهو أول تاج يمرر لي وجاء بعد انشائي للمدونة بأيام قليلة ومن أخ وصديق أحترمه وأحبه كثيرا , بالطبع الشخصية التي تمرر لي التاج ستفرق معي كثيرا لو كان شخصا لا اعرفه فسيكون الوقع علي أفضل فساعتها سأشعر أن مدونتي قد أثرت نجحت في جذب قراء جدد.



س3 هل ترى للتاج اهميه حقيقيه..؟؟


التعرف على شخصيات المدونين له فائدة كبيرة في معرفة مفاتيح كتاباتهم وتوجهاتهم


س4 هل فكرت فى عمل تاج خاص بك ..؟؟


لم أعرف ما هو التاج إلا منذ يومين فلم أكن أصلا من متابعي المدونات في السابق , ولكن ليه لا , يمكن اعملها في يوم من الايام ولو إني مش بحب فكرة تكرار الأسئلة لكل الناس .



س5 هل تفضل قراءه اجوبه التاج عند المدونين الاخرين؟؟ أم لا تهتم سوى بالتدوينات الاخرى؟؟


جاوبت ع السؤال دا قبل كدا لما قلت لك إن التعرف على شخصيات المدونين له فائدة كبيرة في معرفة توجهاتهم


س6 عندما ترد على التاج مالذى تراعيه اكثر؟؟؟


إني أكون أنا في إجاباتي مش حد تاني


س7 هل تحرص على قراءه اجابات من تمرر لهم التاج ..؟؟
وهل تغير اجابتهم للتاج شئ فى ادراكك ..؟؟

الشق الأول للسؤال لو جاوبته هتبقى تالت مرة أكرر فيها كلامي في التاج دا (ايموشن واحد اتخنق)

أما الشق الثاني فمش فاهم ايه هي ماهية التغيير دا بس بالطبع هعرفهم أكثر ووجهة نظري فيهم هتتطور .


س8 هل تلتزم حرفيا باسئله التاج ..؟؟


لحد دلوقتي مفوتش سؤال


س9 ماهى نوعيه التاجات التى تفضلها؟؟؟


معرفش ايه هي الانواع اصلا لأن دا اول تاج يمرر لي


س10 هل كنت طالب شاطر في المدرسه؟؟؟


كنت متفوق والحمد لله لحد الثانوي وفي الثانوي كنت محير جدا لكل الناس في الوقت اللي كنت احد اعضاء فريق أوائل الطلبة

اللي فاز بالمركز الأول على مستوى المحافظة مجموعي في الثانوية مزادش عن 80% وهقولك السبب اللي هيبطل أي عجب

أنا أكره بشده مادة الرياضيات ولا أعرف فيها الألف من كوز الدره طبعا ضيف عليها الإحصاء بنت عمها والجيولوجيا التي

كرهني فيها مدرس المادة تجد إن أغلب الدرجات ضاعت في تلك المواد .


س11 ايه اكتر ماده حبيتها فى المدرسه والكلية ..؟؟


كنت أعشق اللغة العربية ومواد العلوم والجغرافيا والتاريخ


س12 ايه اكتر ماده كرهتها فى المدرسه والكليه؟؟


في المدسة جاوبتك فوق وفي الكلية هتنقسم اجابتي لقسمين

القسم الاول هو مرحلة كلية الآداب جامعة عين شمس وقسم الوثائق والمكتبات

ودي كانت اسوأمرحلة دراسية ونفسه في حياتي ولذلك أنا كاره المرحلة دي كلها مش موادها بس

القسم الثاني بقى هو مرحلة الاكاديمية ودراسة الترجمة الفورية

أكثر مادة تثير حنقي في الدراسة هنا هي علم الصوتيات phonology

مادة سخيفة جدا وامتحانها أسخف

وكمان المواد اللي ملهاش لزمة زي حقوق الانسان والتاريخ اللي بحبه بس مش لاقي له اي علاقة بدراستنا

خصوصا اننا بندرسه باللغة العربية!!


س13 كنت عايز تطلع ايه وانت صغنن؟؟؟


ياااااااه حاجات كتير اوي .. محامي وطيار وبعد كده لقيتني حابب مجال الإذاعة المدرسية أوي وكان حلمي أكون مذيع

ودا الحلم اللي استمر معايا لحد دلوقتي.




7 comments:

بنى أدم مع وقف التنفيذ said...

مش عارف
يمكن اكون عشان اعرفك
فانا عارف الاجوبة دى
تاج جميل شكر يا ماجد

عشان بعت التاج لصبري

عمرو غريب said...

يا عم كفايا تاجات مش معقولة كل ما ادخل مدونة القيهم كلهم ملوك حاتين تاجات ههههههههههه تحياتي واتمني لك التوفيق

صبري سراج said...

تهامي .. هتفضل في قلبي على رأي جوانا ملاح

عمرو باشا اهلا بيك في مدونتي المتواضعة
ويارب ما يقطع لك عادة

شيماء الجيزى said...

يا تاجاتك يا صبرى

حاجه ملهاش دعوه بالتاج
الصوره بتاعت عينك حلوة الى فوق
ايه الحلاوة دى :d

لا بجد اجوبتك حلوة يا صبرى
تحياتى يا باشا

صبري سراج said...

يا آنسة لو سمحتي .. انتي معندكيش اخوات
صبيان ولا ايه ( ايموشن واحد بيضحك )عموما كتر خيرك يا فندم ومنورة البلوج

مشربية said...

صبري زي ما بيتكلم زي ما بيكتب و دة في رائي ان دي حاجة جميلة جدا جدا
و الف شكر يا ماجد لانك بعت التاج لصبري لانة يستحق

ماجد ابراهيم said...

هالوا عليكوا

أنا سمحت لنفسى أنى ارد على البعض هنا
بعد اذن صبري باشا

علشان سيرتى جايه فى الكلام

أولا الشكر ليك يا تهامى لانى عن طريقك اولا عرفت يعنى ايه تاج لحد ما جانى تاج كريم

اما الزميلة شيماء فواضح أنها واخدة على خاطرها منى خالص
وبدل ماتقول تعليقى على التاج ولا تجيب سيرتى بتغااااااا ولا بلاش

عموما أنا مبصالحش حد أنا معرفش هو زعلان ليه وهذا للعلم

ومحمد العسكرى اجمل مافيك جمال اسلوبك فى الكلام بشكرك وصبرى كان لازم يتبعت له التاج

مش رئيس تحرير وتعبت قوى قوى قوى على بال ما عرفت أكلمه وأخليه يوافق ....!!!!!!!!