Wednesday, June 6, 2007

!!..بنت الإسكافي .. حوار قبل القمة




هي شخصية قمة في الطيبة وخفة الدم .. حين تتحدث معها تشعر انك امام
روح لا تعرف للضغينة او لثقل الدم عنوانا.. هي بإختصار صاحبة مدونات فقاعة هواء ليمتد
الآنسة سوسة
عايزك تردي على اسألتي وانتي بترقصي ..الرقص مفيد جدا في كشف الحقائق
بماذا تشعرين الآن بالضبط في هذا الوقت الظريف ؟


اشعر بالبرد

وهل البرد دا ناتج عن احساس داخلي ام انك من أثرياء القوم الذين يملكون هذا الجهاز المسمى بالتكييف ؟



لا الحمد والشكر لله وحده
انا انسانة بردانة بطبعى لا تشعر بحرارة الجو الا لما بتتمشى فى الشمس بتاعة الساعة 12 الضهر


نفهم من كدا انك انسانة تعاني من انيميا وتحتاجين لتبرعات السادة المدونين ؟


لا دى مش مسألة انيميا دى مسألة ان الاوضة بتاعتى اصلا مناخها بارد واحيانا بيبقى بارد قارص يميل الى هطول الامطار اما بالنسبة لللتبرعات فانا مش هرفض الهدايا بالذات وانا على وش تخرج وعايزة الحق اشوفلى رصيف ايجار جديد


معنى كده انكوا ساكنين على خط الاستواء؟


خط الاستواء ده فى الشارع اللى جنبنا احنا دلوقتى مقضيينها كارت..!!

ايه الفرق بين يوسف معاطي وسارة الاسكافي ؟


سؤال وجيه..
سارة بتحب تقرا ليوسف معاطى انما يوسف معاطى مايعرفش سارة الاسكافى للاسف .. فاته نص عمره والله


ويا ترى يوسف معاطي لو في يوم قرأ لسارة الاسكافي تتخيلي هيكون ايه انطباعه ؟


بلاش عشان الرقابة


تفتكري ان الادب الساخر في مصر مش واخد حقه ؟

مشفتش حاجة بس الادب الساخر عموما منتشر بس مش واخد حقه بصراحة

طيب مين اهم كتاب الادب الساخر دلوقتي .. غير بنت الاسكافي طبعا ؟
حلو اسم بنت الاسكافي دا :>


حلوة بنت الاسكافى دى .. شوف ياسيدى
انا ماقريتش فى الادب الساخر كتب كاملة او لكتاب معينين كتير
وكل ثقافتى فيها من المقالات المجمعة من هنا ومن هناك
بس احسن حد برتاح انى اقراله هو يوسف معاطى ومن بعده احمد رجب
وبعده بلال فضل بس مش كتير يعنى بالصدف

دايما بيقولوا الكوميديا هي اسرع وسيلة لتوصيل المعلومة ولتحفيز الناس ومع ذلك بتقولي ان الادب الساخر مش
منتشر بعكس السينما طبعا .. تفتكري التضاد دا ايه سببه ؟
فى فرق كبييييييييييير جدا بين الادب والادب اللى بيتقدم فى السنيما على الاقل فى الفترة اللى عشتها فى الدنيا
لان ببساطة لو انت مسكت كتاب فيه مقالات ساخرة او قصص ساخرة واتحولت لافلام او مسلسلات هتلاقيها مختلفة بشكل كبير فى زمن اصبحت فيه المادة بتتغلب على المضمون فبالتالى اللى بيتقدم فى السينما مش ادب
بالنسبة بقى لموضوع الانتشار والشهرة فبطبيعة الشعب المصرى ساخرة من كل حاجة حتى من نفسه

الشعب المصري دايما ساخر من نفسه وناقد لها بشكل مثير للعجب فمن الطبيعي وانتي راكبة الاوتوبيس مثلا تلاقي الليشعوب البسيطة اللي عندنا ال يقول دا شعب بهايم .. عمر المصريين دول ما هينضفوا ابدا .. وكلام من هذا القبيل .. اشمعنى احنا دونا عن سائر عادة العجيبة دي ؟

سؤال وجيه..
بس يمكن احتمال والله اعلم نظرا لاننا احفاد الفراعنةواكيد متوارثين منهم صفة الفرعنة
وبما اننا توارثنا صفة الفرعنة على مدى الاف السنين فشئ طبيعى اننا نكون شعب مابيعجبناش العجب
احتمال!!


الامثال الشعبية جزء من الموروث الأدبي الساخر ..هل عندك شغف حقيقي للإلمام بها , ولماذا يتعامل المصريون مع الأمثال دي كما لو انها دساتير مقدسة رغم انها من صنع بشر مثلنا وتحتمل جانب كبير من الخطأ ؟

انا بحب اسمعها والله وافكر فيها وجت ليه لانى عمرى ماهعرف جت ازاى الا لو لفيت على شعب مصر كله وبرضه مش هعرف بس للاسف الزهايمر والمكتبات مش مساعدينى انما انا الحمد لله بقالى 3 سنين اسم مرجعين فيهم الامثال كلهم وناوية بعد الامتحانات ان شاء الله اجيبهم بقى واعيش حياتى معاهم

ولماذا يتعامل المصريون مع الأمثال دي كما لو انها دساتير مقدسة رغم انها من صنع بشر مثلنا وتحتمل جانب كبير من الخطأ ؟


اقولك انا بقى اولا عشان احنا ناس مش بتحب تتعب نفسها فى حاجة
تانى حاجة بقى ان محدش بيحاول يفكر المثل ده اتقال امتى وليه نفس ردى عليك كمان فى موضوع انا مش رومانسى فى حكاية البنت اللى زى القمر وزى اللى بياخد ايات من القرآن يفسرها على مزاجه والى هتمشى مع مصلحته عادى بقى ناس رايقة ياابنى

حوارنا دا قبل مباراة القمة بوقت قليل جدا .. صفي لنا شعورك الآن


انا الحمد لله شعورى انى بتمنى من كل قلبى الاهلى يكتسح الماتش وبناء على ذلك فانا محضرة الفشار والاعلام والترنج الاحمر

ايه اكتر صفة بتحبيها في سارة ؟

سؤال غريب.. يمكن بحب فيا انى باخد الامور ببساطة حتى لو كانت مصايب وانى بتعصب اتعصب واهدى بسرعة

هو وجيه مشي ولا ايه ؟

بيغيروا شيفتات

واكتر صفة بتكرهيها في سارة ؟

العصبية والنسيان .. الاتنين مدمرين حياتى تقريبا ان مكانش بالتاكيد

اكتر اغنية بتحبيها

مش اغنية واحدة انا ليا فى الاغانى الهاديةبس الاكتر الاغانى اللى تلاقى فيه المطرب او المطربة بيدوا حبيبهم على دماغه وبيذلوه بموت فى النوع ده من الاغانى

على كدا بتحبي محمد فؤاد وسميرة سعيد

اوى جدا

ايه اكتر حاجة بتستفزك ؟


الناس اللى مابتقبلش الراى الاخر والدكاترة لما بيقولولى احفظى

مين هي سارة الاسكافي ؟

بنى ادماية زى كل البنى ادمين

هسألك نفس السؤال اللي سألته لتهامي .. ايه اللي بيشد البنات لعمر الشريف ؟

والله مااعرفش لانى مش شايفة فيه حاجة تشد بصراحة فمش هقدر افيدك باكتر من انها تفاهة بنات

مين فارس احلام سارة او ايه هي مواصفاته

هو اهم حاجة يكون فيه 3 حاجات
انه يكون عارف ربنا عشان يراعى ربنا فيا
الحاجة التانية يكون طيب ودول انقرضوا تقريبا
تالت حاجة واللى مستحيل هيكون انه يفهمنى يعنى من الاخر مش موجود ..
اه ياريت كمان مايتريقش على المكتبات

تفتكري بعد 20 سنة هتكون سارة الاسكافي وصلت لفين


الله اعلم

اختاري ضيف الحوار اللي بعدك

انت

ازاي يعني

مش شغلى انا عايزة صبرى سراج

11 comments:

مروة عوض said...

جميل قوي الحوار مهي اسئلة صبري باشا وحوار مع سارة بجد واضح انك شخصية لطيفة عجبتنى دماغك ربنا يوفقك
على فكرة احلي حاجة البساطة عايزاكي تعصري صبري في الأسئلة

sosa said...

يادى الفضايح
طب كنت استنى لما ارجع من الامتحان بكرة واصدمنى

مروة
بجد ميرسى اوى
من بعض ماعندكم
واوعدك باسئلة لصبرى مابيكلمنيش من بعدها
اصلى خدته فى وقتها على طول قلت اجرب فيه
واى خدمة

عمرو غريب said...

بصراحة اسئلة ممتازة وحوار جميل اوي واجابات رائعة من الاخت الغزيزة سارة

مشربية said...

عظيم و فعلا كلنا عيزين صبري
خفة دمكم و الحضور اللي انت فية اجمل حاجة في الكون
و بجد فرحان اني اتعرفت علي سارة اكثر و طبعا صبري و زدني الشرف بالتعرف علي "وجية - و عبقري" الف شكر لكم انتم الاثنين
سلالالالالالالاممممممممممم

Anonymous said...

حوار نع شخصية مع شخصية برافو عليك يا صبري

تهامي

REEMOO said...

حلو الحوار جدا ودمه خفيف
أنا سعيده انى زرت المدونه
أنا عرفتها عن طريق مدونه ساره
بس أكيد ليا زيارات تانيه كتير
تحياتى

He$teRia® said...

اهلا و سهلا بالضيفه اللي جت بعد محمدالتهامي بناءا على رغبته !!

ضيف هااايل بصراحه يا صبري , بجد استمتعت بشخصيك الظريفه , و انا بصراحه شايف ان الادب الساخر خو اصل الكوميديا و هو المفروض في نظري يبقى المصدر الرئيسي لكوميديا السينما و النوع ده من الافلام احيانا بيطلقوا عليه الكوميديا السوداء !!

لان السينما بتحاكي الواقع , فانا بصراحه بفضل نوعيه " هم يضحك و هم يبكي " و اللي قايمه على فكره الادب الساخر , و طبعا زي ما وضحتي, فرق كبير بين الادب الساخر و اللي بيتقدم في السينما حاليا ده اسمه هبل ساخر !!

و بعدين صحيح يا صبري ما تتصرف .. هي طلبت صبري سراج يبقى تتصرف و تجيب صبري سراج و تعمل معاه حوار بنفسك خلينا نعرف اللي فيها

و كتر خيرك و النبي بعد كده في كل ماتش قمه ابقي حضري الترنج الاحمر و الفيشار علشان الزمالك يكسب , و ايعتي سلامي لوجيه لما يجي يستلم الشيفت بتاعه

و شكرا :D

ماجد ابراهيم said...

حوار جميل يا صبرى
وردور لذيذة سا سارة

بس ليا اعتراض واحد أنا شايف أن الطيبين لسة ما انقرضوش قوى
هما فى طريقهم للانقراض همتك بعلم المكتبات تحافظى عليهم

ibn nasser - ابن ناصر said...

حوار جميل
تحياتي

sosa said...

ميرسى اوى جدا موت ياجماعة على المجاملات اللطيفة دى
كده الواحد يعرف يمتحن
:)))

أحمد مختار عاشور said...

اسئلة ساخرة راقية ممتازة يا صبرى
كشفت لنا عن انسانة جميلة مثقفة
.........
مع خالص تحياتى