Saturday, June 7, 2008

!!.. لحمة وفتة وفول نابت.. يا أم هاشم يا طاهرة






هو أحد أهم الموالد التي تأخذ الطابعين الشعبي والرسمي.. مولد السيدة زينب بنت سيدنا علي رضي الله عنهما.. يتميز مولد السيدة زينب أو أم هاشم كما خلدها يحيى حقي بجو خاص.. هناك في وسط القاهرة حيث مقام السيدة ترى في أسبوع المولد خياما لكل المحافظات فكل مقتدر في كل محافظة تلاقيه عامل خيمة لأهل محافظته فيها ما لذ وطاب من الأطهمة لحوم وفتة ورز وطبعا الفول النابت.. منهم اللي بيعمل الحكاية دي لوجه الله ومنهم اللي بيعملها لغرض فين نفس يعقوب - يعقوب مين؟ -



يا تمر حنة يا تمر حنة.. عادي متستغربوش كل موالد مصر فيها تمرة حنة والولا حسن.. المولد اللي المفروض انه بياخد طابع ديني لابد تلاقيه فيه غازية ومطرب وسييط وحاوي جلا جلاو فقرة سيرك وفتح عينك تاكل ملبن وهتلاقي احمد رمزي ورشدي اباظة بيستعرضوا عضلاتهم ع المدفع والكسبان يقابل نعيمة عاكف في النهائي!!



موسم للارتزاق والاسترزاق.. موسم للهليبة والنشالين والمتحرشين وكل شيء، العيال تلعب مراجيح والشباب يضربوا بيرة وحشيش ويتحرشوا.. في الزحمة لا رقيب



ندخل الجامع.. حلقات ذكر والله حي ودروشة ومش عارف ايه اللي هيقربني من ربنا وانا قاعد اطوح في دماغي يمين وشمال؟.. ناحية االمقام ناس بتتمسح فيه ويا طاهرة يا ام هاشم حنني قلب جوزي عليا واكفيني شر حماتي.. يا طاهرة ابني عاطل بقاله سنتين.. يا ام هشام ابويا دوخنا به ع المستشفيات.. هنا فقط يأتي دور زيت القنديل.. اكيد شفتوا الفيلم مفيش داعي بقى نرغي في الحوار ده تاني!



في مولد السيدة وبجانب الحمص والحلاوة هتلاقييهم بيبيعوا طواقي مكتوب عليها مولد السيدة.. على سبيل ان يكون فيه يونيفورم يعني او حاجة توضح ان لابس الطاقية دي له حصانة خاصة.. الطاقية سعرها جنيه واحد عشان محدش يضحك عليك



تفتكروا ان السيدة زينب فرحانة بينا واحنا بنحتفل بميلادها بالشكل ده؟.. والله انها بريئة مننا ومن أفعالنا دي

15 comments:

Fatma said...

هوا حكاية زيت القنديل دا بجد !!!!!!!!!!!!!

انا كنت فاكراها مبالغة في الفيلم بس لزوم الحبكة الدرامية !!

هوا فعلا في قنديل وبيتباركوا بزيته !

يا لهوي !

هيا الناس دي مخها فين

اهدي عبيدك يارب

هوا فين مكان الجامع دا يا صبري

والمولد بتاعها امتى بالظبط؟

انت سخنتني جدا اني اروح اتفرج على فكرة

سلسلة مواضيع ممتازة

اتمنى يكون لسه في اجزاء تانية :)

Yasmine said...

انا اول مرة اعرف ان الزيت ده موجود بجد
انا كنت فاكراهم عملوا كده عشان كان لازم سميرة احمد يجرالها حاجة فى عينها عشان شكرى يعالجها:D
يعنى بجد بيبيعوا البتاع ده و بيحطوه
فى عينيهم؟ليه فى سنة كام احنا؟
فنون لما تروحى ابقى هاتيلى الطاقية دى:D
والله احنا فى زمن المساخر بجد
كمل كمل انا مش همشى من المدونة دى ده حوار الموالد ده طلع عالم لوحده
ايون المرة دى انا انا عشان متتلخبطش:)))

صبري سراج said...

فطوم.. المولد بيبدأ 21-7 ومدته اسبوع

ومكانه في حي السيدة زينب طبعا:d

صبري سراج said...

سلمى من غير لخبطة:d

ان شاء الله لسه فيه اجزاء تانية

انا سعيد بجد ان فيه ناس مهتمة بالملف ده

إسلام منسي said...

انا بقى نويت استرزق اشمعنى الناس بتوع الموالد
وكمان هستغل مدونتك وهعلق على الحيطة الاعلان بتاعي
يعلن المدون اسلام منسي عن القيام بمجموعة رحلات يومية بدءا من 21-7 ولمدة اسبوع من الساعة الثانية ظهرا وحتى الثامنة مساءا متجهة نحو مدونة صبري سراج اقصد حي السيدة زينب وذلك باتوبيسات مكيفة سعر التذكرة لا يزيد عن خمس جنيهات للفرد
نياهااهاهاهاهاهاها
تحفة يا صبريكوووووو وعلى فكرة يا جماعة فيه اسوأ من الزيت بس الرقابة هخلي صبري يقولكو عليه
بالتوفيق يا صبري يا حبي

صبري سراج said...

منور يا سلمونتي

وابو قسم بقى في المصلحة دي

Anonymous said...

الموضوع جامد كالعادة يا حبيبي
منتظر موضوعك الجاي
بس متأكد من مووضع رشدي اباظة

تهامي

صبري سراج said...

تهامي

بالنسبة لرشدي اباظة فده صعب متقلبش علينا الكام بنت اللي بيدخلوا المنتدى..

Ahmed Gamal said...

طالما وصلت للطاهرة ام هاشم

في موضوع كان اتفتح من كام سنة واختفى فجاءه .. وهو كان بحث عن ان السيدة زينب مش مدفونة في المكان دا وان وقت وفاتها مكنش في المسجد دا اساسا بجانب ان مكانه كان فرع من النيل وحاجات كتير من هذا القبيل بجانب كام مقام وضريح

يعني الحكاية مش هتطلع بس مجرد جهل وخرافات لاء دا كمان تزوير في التاريخ والدين واللعب برموزه

زدنا يا صبورتي

صبري سراج said...

اهي دي جديدة يا ابو جمال.. اشجينا بالتفاصيل بقى

بنت مصريه said...

عندك حق والله يا صبرى
اللهم لا تؤاخذنا بما فعل السفهاء مننا

Here i'm said...

دى حاجات أبعد ما يكون عنها للدين .. المشكلة يا عزيزى أن دا توجه رسمى من الدولة .. تلاقى فى مجلس الصوفية بيجتمع علشان يعتمدوا الميزانية للموالد

عارف لما تيجى تقولهم دا مش فى الأسلام .. أبسط حاجة تلاقى اللى ينط يقولك " أمسك أرهااااابى "


أرهابى .. مرة واحدة كده


أمشى يا أرهابى من هنا :))

dr_samarmar said...

طب و الله أنا فاكرة الحجات دى كانت زمان و خلاص الناس عقلت


لسة فى العباطات دى و لسة فيه الله حى الله حى و لسة فى مولد بمعنى مولد

طب و الله لولا ثقتى فى كلامك ماكنتش صدقت أبدا ان مصر لسة فيها ناس عبيطة و مضحوك عليها و هبلة و ساذجة بالشكل دا

طب يعنى ما اللى مخنوقة من حماتها و لا عايزة جوزها يحبها و لا ابنها عطلان عندها ربها اللى خلقها و خلق قلب جوزها و خلق لسان حماتها و خلق وزارة القوى العاملة و عايزها تدعيه و تطلب منه اللى هى عايزاه


زائد كل السلبيات اللى قولتها ياصبرى عايزة أضيف ان دا شرك واضح و صريح بالله عز و جل

و أكيد طبعا السيدة زينب مالهاش أى علاقة باللى بنهببه دا

و بجد لو دا لسة بيحصل يبقى بقا نقول على نفسنا يارحمن يا رحيم

أسوور said...

اتنشرلك بوست فى جريدة الأسرة العربية العدد بتاع النهاردة

تحياتى لك

شيماء الجمال said...

صبري سراج..ازيك انا شيماء الجمال ؟
كلماوية عارفني ولا لأ
المدونة بتاعتك عجباني جداً و الملف ده بالذات، وانت فعلا صحفي ممتاز