Thursday, December 11, 2008

المقامة الأوبامية




كلمتنا.. عدد ديسمبر 2008

حدثني العبد بن سيد قال:

لما كانت الانتخابات الأمريكية بعد أزمة اقتصادية وحرب أفغانية ومثلها عراقية، وبعد أن انهار (برجان) واختفى بن لادن إلى الآن، وبعد أن طرد بوش من البيت الأبيض إلى الحوش، انقسم الناس إلى فريقين، النصف لأوباما ونصف النصف لماكين، وسأل الناس الآخرين: "يا ترى أوباما ولا ماكين؟".. ولما كنت من الربع الأخير فقلت بعد زفير: "يا ناس يا لوكال يا شعبيين فككوا من أوباما وماكين".. وكأني لم أرد فالسؤال قد رُد، لازم تجاوب يا خفيف سيبك من الجواب الظريف، لعنت الغباء واستعذت من الجهلاء، وأجبت: يا إخواننا يا مؤمنين سيارتي بالبنزين، والبنزينة مفيهاش تمانين وغالي الخمسة وتسعين، بالذمة هينفعني أوباما ولا ماكين؟.. القدس ساكنها بنو صهيون من أيام الرئيس ويلسون، احسبوا كم فترة رئاسية، جمهورية وديمقراطية.. في عهد أي زعيم عادت أورشليم؟.

وكسبها خلاص العم أوباما وقالوا هنشوف الخير ياما ، ده أسمر كيني وبيشرب شاي، وأبوه مسلم هيخون إزاي؟.. ، أوباما رئيس مزيكة.. هيدلع أبو تريكة، أدلق جاز ولّع نار.. باراك أوباما زعيم جبار، وفي خطاب النصر أهو قال هنغير لكم الحال، حال مين تقصد يا رئيس؟ يمكن حال التفطيس؟.. ما هو سبقك بوش ونهاه أسلوب ذبح وخلّاه، صدام في الحبل اتعلق وبن لادن في الصحراء أهو فلّق، فلتبحث يا باراك عن فكر جديد فتاك، فلك أربعة أعوام تحتاج لفكر تمام، عندك سوريا وطهران والتنين الصيني كمان.. ماذا ستفعل يا بن حسين ويا ترى هتكون كغراب البين؟.. الأيام وحدها هتقول مين فينا المخبول؟


10 comments:

Anonymous said...

وصول اوباما يحمل معني انساني راقي
مفتكريش انه هيقدم حاجة للناس متسحقيش


تهامي

Sarah el eskafy said...

هههه
اصبت يا صبرى بن سراج
كلنا هنتدلع ان شاء الله

Superman said...

اوباما ما هو الا نموذج للديموقراطية الامريكية
و بكرة هنعرف ان امريكا فيها مساواة..و ان سواء الرئيس كان ابيض او اسود..يبقي الوضع علي ما هو عليه

اوباما رئيسهم..مش رئيسنا
سياسته الخارجية هي نفسها سياسة كل اللي قبله
الاختلاف هيكون في السياسة الداخلية

صبري سراج said...

تهامي بتاع الانسانيات

بحبك

صبري سراج said...

اتدلعي لوحدك يا بنت الاسكافي

صبري سراج said...

سولتو

انا مقولتش حاجة غير اللي انت قلته

نورت يا برنس

Unknown said...

لقد أصبت كبد الحقيقة يا ابن سراج ....

الحسنة الوحيدة اللى أنا شايفها فى أوباما دة..... انه فى فرق كبير جدا بين رئيس يعتبر نفسه مبعوث العناية الالهية لتطهير العالم..... وانه بيوحى له من قبل الله... وبين رئيس بيقول انه حيسمع وحيقعد وحيشوف .....

وفى الاخر يا حاج صبرى ....على رأى الست بتعة...

احنا فى ايدينا ايه غير ان احنا نستنى وننتظر .... دة احنا حتى بقينا عاملين شبه البنت اللى قاعدة مستنيا عدلها..
حاجة تكسف

صبري سراج said...

جدع حتى النهاية

متشكر جدا لرأيك ونورت المدونة

Rannon said...

ههههههههه
جامدة بجد يا صبري
والله انت فنان

تحياتي :)

صبري سراج said...

ميرسي يا روووووني