Monday, April 21, 2008

!!قال لك محافظتين جداد.. إفطن




صحيت الصبح اتوضيت وصليت وكالعادة نزلت رغما عني أشتري جريدة الأهرام لأبويا - اللي كان رغما عني هو

شراء جريدة الأهرام مش تنفيذ طلب لأبويا طبعا ، أنا برضه شاب متربي وابن ناس كويسين - المهم ياخونا قلت ابص ع الصفحة الأولانية وانا طالع ع السلم عشان أعد فيه كام خبر نزل عن الريس في الصفحة دي - دي من هواياتي وبجد فيها متعة أكتر من السودوكو اللي مش فاهمها دي - وكانت المفاجئة الفجائية والصدمة الصباحية والإفيه العبقري اللي خلاني اتقلبت على ضهري من الضحك أكتر من أفلام محمد سعد .. قال لك قرار جمهوري بتقسيم القاهرة والجيزة ل 4محافظات.. محافظة حلوان تضم مناطق حلوان والقاهرة الجديدة ودار السلام ومايو والهايكستب ومحافظة 6 اكتوبر وتضم جامع الحصري وعمرو خالد.


يعني أختي حبيبتي مروة عوض اللي ساكنة في مايو نامت بلليل وهي في القاهرة صحيت الصبح لقت نفسها أقاليم وإنها عشان تروح شغلها في المهندسين مضطره تعدي على 3 محافظات - إيه اللي جاب القلعة جنب البحر!!- طب دي مشكلة مروة المؤقتة.. طيب عمي اللي ساكن في الهرم وهيجدد رخصته كمان كام يوم.. هيضطر يا عيني يسافر لمحافظة 6 اكتوبر عشان مرور الجيزة موجود هناك.. علل!!.. طيب بلاش عمي .. خلينا مع المرور نفسه.. المفروض ان اللي ساكن في حلوان دلوقتي يروح يغير نمر عربيته اللي هي ملاكي القاهرة وياخد نمر جديدة ملاكي حلوان وطبعا هيدفع رسوم.. والمفروض ان الناس اللي قدرهم الاسود جعل سكنهم في 6 اكتوبر يروحوا يغيروا ورقهم كله البطاقة والرخص وشهادات الميلاد وكله كله لأنهم خلاص مبقوش من أهل محافظة الجيزة.. بقوا محافظة 6 أكتوبر.

مش عارف ليه متخيل شكل سيادة اللواء مأمور قسم حلوان لما صحي من النوم الصبح وقرأ الأهرام زيي كده.. يالهوي بالي طب أنا دلوقتي لسه مأمور ولا بقيت مدير أمن؟.. محدش فاهم حاجة


طيب أنا فيه واحد غتت اعرفه كان مرشح نفسه في انتخابات المحليات عن دايرة النزهة وخد أغلب أصواته من الهايكستب حيث حبايبه الصعايدة.. دلوقتي الهايكستب بقت تبع حلوان وبناء عليه بقى المعلم عضويته في المجلس المحلي غير شرعية.. أنا فرحان فيه


طيب أنا عندي كام سؤال - غير بتوع عدوية - الأولاني لرجل الأعمال أنسي ساويرس وبقول له يا كبير الناس بتوع حلوان واكتوبر اللي بقو أقاليم.. هل أصبح من حقهم استخدام خط ألو أقاليم ولا لا؟


وسؤالي التاني بوجهه للدكتور طارق كامل هل يا دكتور هيتعمل تعريفة جديدة للمكالمات في المحافظات دي وتبقى مباشر؟


وسؤال تالت للدكتور محمد فريد خميس.. هل جاء لحضرتك تكليف للنساجون الشرقيون بعمل سجادة جديدة عليها خريطة مصر بعد التعديل عشان تتعلق في قصر الرياسة وراء الريس في اجتماعاته مع السادة الزعماء ولا لا؟

تبقي مشكلة لو نسيوا.. هيبقى شكلنا وحش أوي قدام الأجانب


وهسأل كمان الناس بتوع شركات غرب ووسط وشرق الدلتا بتوع الاوتوبيسات المكيفة دي هل هتعملوا خطوط رحلات

للمناطق الإقليمية دي؟


وسؤال كمان للسيد وزير التربية والتعليم.. هل ربنا هيكرمنا ونشوف تعديل في مناهج الجغرافيا عشان الطلبة تعرف التقسيم الجديد ويقدروا في الفسحة يغيظوا بعضهم.. أنا من القاهرة وانت من الأقاليم؟


وسؤالي الأخير للرئيس مبارك وبالمرة كل مصري يسأله لنفسه.. ليه يا ريس معملتش الموضوع ده قبل انتخابات المحليات مع إن ده البديهي والمنطقي.. كده يا ريس تخليني اشمت في صديقي الغتت اللي عضويته بقت غير دستورية ؟

20 comments:

مروة عوض said...

اه شفت يا صبري عملوا فينا ايه أينعم انا طول عمري كنت حاسه اني بسافر يوميا لطول الوقت في المواصلات لكن دلوقتي الاحساس مبقاش نفسي بس ده بقي احساس مادي كمان بقيت رسميا من الأقاليم"ايموشن بنت مش فاهمة حاجة"

هو مش ده المهم ياصبري
ممكن تسأل الريس سؤال تاني أهم هو ليه ده حصل في الوقت ده بالذات مع وجود اضرابات وناس جعانة واسعار نار ومشاكل وبلاوي تانية كتير
السؤال هو"لييييييييه"

nohamy said...

بجد يا صبري
انت ...
بتجيب ملاحظات صغيرة
اول مرة اخد بالي منها


بس القضية دلوقتى هتتحول لحاجات صغيرة

بالنسبة لمروة عوض

دي اهم مشكلة ..ممكن نكون مهتمين بيها
انتى دلوقتي بقيتى اقيلم زيه انا يعنى

يعنى انا دلوقتي لما اروح حلون .. هبقي فى اقيلم حلون
ومفيش حد هيجي لكم


بالنسبة لمشكلة السجادة .. اكيد سهله


المهم انت بس تخلى بالك من نفسك

مصطفى فتحي said...

رجعت للتدوين وانا اخر من يعلم
طب والله لاشكي لامي

الموضوع ده فوروارد على ايميل كلمتنا فورا
فورا
بحبك موشن

Sarah el eskafy said...

هههههههههههههههههه
شفت اهه البوست ده لوحده 6 مصايب مضاعفة فى بعض

من الواضح ان الجمهورية كلها بقت اقاليم
يعنى الجمهورية كلها دلوقتى بقت مهاجرة للقاهرة
يعنى ده اكيد اكيد نظام ذل جديد للمصريين
بجانب انهم اصلا متمرمطين فى المواصلات ومصاريفها اللى تفتح بيت ويقولك لا دى بلدى ومش عارف ايه
فجأة بقوا كل يوم بيسافروا عشان يروحوا شغلهم ويرجعوا منه

Nourhan Sirag said...

انا نفسي يعلموا العباسيه محافظه :D

بوست جامد يا صمبوره

حسين هاشم said...

مبروك علينا الاعدام يارجالة مبروك علينا الاعدام
:D
حلوة اوى بتاعة مامور قسم حلوان بقى مدير امن بقدره قادر
ومروة نامت فى محافظة لاقيت نفسها الصبح فى محافظة تانية لاسحر ولاشعوذة دا الريس بيحب الهندسة
ع فكرة الحوار ده تخطيط امنى عالى المستوى
عشان يخلوا الناس تتلخبط متعرفش هو ده ايه بالظبط
وينسوا بقى الاضراب والحرية والديمقرطاية

محمد حمدي said...

سيبك من كل حاجه

أحلى حاجه أن مروه بقت اقاليم

عشان تعانوا زينا بقا وكده مبقاش فى حد احسن من حد

تحياتى يا صبرى .. موضوعك بجد جامد

مشربية said...

افطن" هي دي كلمة السر"
هو قالك دة هايكون موضوع الشعب يتسحل فية عشان الاسعار و ربنا يكرمة و يكرم اصلة اشمعني هو !!!!
و انت قلتها حكمة و احنا في القهوة افطن يا عم الحج :D
format يا صبري عملت
للكومبيوتر عشان الويندوز يكون ماشي
مع ال DSL
الكومبيوتر باظ يا صبري

moodysalihamidzic said...

انا كنت فى الشروق عند ست مغربية
لقيتها بتقول احنا بقينا تبع حلوان
افتكرتها بتهزر
فين وفييييييين لما عرفت
بوست جامد جداً يا صبرى

Ma7moud So3ody said...

يا ابني انت مش عارف مصلحتك
واحنا كمان مش عارفين مصلحتنا
احنا؟؟؟
احنا ولاد ...؟
احنا بندور ع الزعماء ونعكنن عليهم
الحق عليهم انهم بيزودوا المناطق الجغرافيه ف مصر
ويوزدوا بقا معاهم طوابير العيش
والعيش ذات نفسه
والرده كمان
والعيش اللي من غير رده هيقوموا عليه بحرب الرده
محدش فاهم حاجه واصل
غير بقا المساكن الشعبيه والفيلل ببلاش
روح نام يا صبري

بحبك

صبري سراج said...

مروة عوض

عندك حق طبعا .. وانا لو منك انتهز الموقف واقول لمحمد يا تجيبلي عربية يا بلاش يا ولا

صبري سراج said...

تهامي فعلا مشكلة مروة عوض هي الأهم.. انا مش عارف ازاي الريس مفكرش في مروة قبل ما ياخد قراره ده؟

صبري سراج said...

مصطفى فتحي

بحبك اكتر من خالك أيمن

صبري سراج said...

سوسة..

محدش فاهم حاجة

صبري سراج said...

نورهان سراج

العباسية منتظر اعلانها دولة مستقلة بعون الله

صبري سراج said...

محدش فاهم حاجة

مبروك علينا الاعدام يا سحس

صبري سراج said...

محمد حمدي

طول عمرك شرير يا بني

صبري سراج said...

مشربية

محمد يا عسكري شيل الدي اس ال وريحني

صبري سراج said...

مودي

صح النوم يا عسل

صبري سراج said...

سعودي

بحبك اكتر من شعر رجلي