Wednesday, May 7, 2008

أصعب تاج




وده طبعا غير أصعب حب بتاعت عجاج
التاج ده جاء لي عبر مدونة الروح لصاحبتها الست
bos bos هانم
التاج عبارة عن سؤال واحد لكنه بجد في قمة الصعوبة
اتكلم عن نفسك في 10 نقاط؟
حاضر
1- صبري سراج.. إعلامي مصري ( صحفي ومذيع يعني ) بدأت العد التنازلي لوصول سنوات عمري للرقم 24 ، ليسانس لغات وترجمة فورية قسم إنجليزي،لي أخت واحدة هي نورهان سراج صحفية ومدونة (زميلة يعني)،بحبها جدا رغم اننا مش شبه بعض (أنا أحلى طبعا)، أصحابي كتير كتير الحمد لله لكن الأقرب ليا دايما 3 ،حسين هاشم وده برضه صحفي ومدون(يعني انا محاصر بالبيت والأصحاب في كل حتة)، حسين في سنة 4 حقوق وربنا ينتعه منها بالسلامة، واسلام منسي وده برضه مدون، اسلام بيشتغل في قناة فضائية عجيبة كده،ومصطفى عبد العزيز وده الوحيد فينا اللي ملوش في الكتابة من أصله، درش مهندس كميائي في شركة عجيبة برضه
كمان فيه leeno لينوتشي حبيبتي ودي بجد أختي الكبيرة واكتر حد بحسه شايل همي..بحبها حب خالد بيبو لبشير التابعي
2- انا انسان متقلب المزاج، معنديش ثوابت في تفكيري، عصبي أحيانا،ثقتي في نفسي ملهاش حدود وده بيضايق بعض الناس مني لأنهم بيشوفوا إن ده غرور، بحب دماغي وطريقة تفكيري وبحب أغلط واتعلم ومعنديش أدنى مشكلة في الاعتراف بخطأي،

3- طموح لأقصى درجة وعندي حلم مصر أحققه لكني في نفس الوقت بضيع وقت كتير.. وده أسوأ اعتراف بعترفه في حياتي..اصحابي بيساندوني بشكل كبير وهم أكبر دافع ليا عشان أنجح خصوصا محمد التهامي وحسين هاشم ومصطفى فتحي وإسلام منسي ومصطفى عبد العزيز.. ربنا ما يحرمني منهم أبدا.. الناس دي بتحبني في الله ومش مستنية مني أي حاجة .. اللهم الا واحد فيهم مستني البناطيل الجينزlol


4- مسحتها


5- بحب المزيكا والسينما جدا وبحترم الفن اوي ومبعتبرش الرقص فن، من أحلامي يبقى عندي شركات انتاج موسيقي وسينمائي اقدم من خلالها فن محترم بجد، فن ميستخفش بعقول الناس ويساعد في تربية جيل يعرف يعني ايه حرية مسئولة، أدي فرصة لكل مبدع وموهوب،انه يعبر عن وجهة نظره في الحياة ويمارس ابداعه بدون قيود إلا خوفه من ربنا.


6- نفسي أكون إعلامي كبير.. مذيع وكاتب صحفي بأثر في الناس ولما اموت الناس تقول الله يرحمه من قلبها وهي قلبها موجوع عليا ووشهم مبتسم.. لما يفتكروني ميفتكروش غير الخير.. نفسي محدش يكون كارهني أو شايل مني.. لأني قاسي وبقسى على الناس اللي بحبهم اوي.. لأني بجد بحبهم وخايف عليهم.


7- بحب الكورة اوي وبفهم فيها.. أهلاوي أوي.. ومحسوب دلوقتي على جبهة المعارضة الأهلاوية لأني معارض لسياسة النادي دلوقتي وطبعا ناوي ابقى عضو في النادي اما اشتهر واغتني بإذن الله.. بيقولوا العضوية دلوقتي وصلت 80 ألف ..


8- بحب مصر اوووووي..بحبها بكل حرف كتبه صلاح جاهين ومدحت العدل وايمن قمر وبكل نغمة غناها منير وفؤاد لمصر بصدق وبجد وبدون مناسبة..بحبها اوي يا جدعان اوي


9- بكره القراءة لكني بعتبرها زي المية والهوا يا هنايا في حبهم.. ضرورة وشر لابد منه.. بحب بلال فضل وخيري شلبي وكنت بحب نبيل فاروق ايام المراهقة وبحب محمد التهامي واحمد مجدي كمان.. بحب نزار ودرويش وعنترة والمتنبي وعم جاهين وعم نجم وسيد حجاب وشاعر محدش يعرفه اسمه عبد الرحمن والي.. هيبقى شاعر كبير اوي


10- بقالي ساعة وشوية بجمع في الكلام.. اصعب شيء في الدنيا انك تتكلم عن نفسك.. بس انا صيعت شوية واتكلمت على ناس تانية.. عفريت انا


بمرر التاج ده

لكل مدون اسمه اتكتب في موضوعي أضيف عليهم

فنون وماجا وقباري

24 comments:

إسلام منسي said...

الله عليك يا صبري يا حبي
ربنا يخليك ليا ويخليك لينا كلنا يارب
بس مش عارف هعرف البس التاج ده واللا ايه الظروف بس هحاول ومتقلقش هتبقى اول واحد يشوفني وانا لابسه
بحبك ياض

حسين هاشم said...

نسيت عضوية الاهلى كمان غير البناطيل :D

صبري سراج said...

منسي آي لف يو

وربنا ما يحرمكم مني

صبري سراج said...

حسين

مبتنساش حاجة انت يا سحس

Fatma said...

استمتعت وانا بقرأ :)

حقيقي

استمتعت :)

صبري سراج said...

منوراني يا فنون بجد.. ربنا يكرمك ويخليكي

Anonymous said...

شكرا على الأستجابة السريعة دى

وعلى تعريفك بنفسك

تحياتى لك

صبري سراج said...

تأمريني يا bos bos هانم

Anonymous said...

ana kol da ya sabortchy????

ya lahwwwy

wana kmaaan ya sabortchy nafs el sh3ooooor

صبري سراج said...

لينوتشي.. ربنا يخليكي ليا يااااااا رب

nohamy said...

تلقائي
و
وائق من نفسه
و
عاقل
و
عارف هو عاوز اية

يارب تفضل كدة على طول

صبري سراج said...

تهامي

ربنا يخليك ليا يا صاحبي

مصطفى فتحي said...

بحبك يا واد يا صبري

صبري سراج said...

وانا كمان.. أي لف يو فيري مشط

dr_samarmar said...

هاااااايل يا صبرى يارب تحقق كل أمانيك و أحلامك و طموحاتك

و ربنا يسعد قلبك و يروق بالك ياااارب

mUsLiM said...

ربنا يبارك فيك يا أخى الكريم

ولكن كلماتك السابقه اعتصرت قلبى حقـــا ...

كتبت عشرات اللكلمات بل عشرات السطور عن نفسك

ولم تذكر كلمه واحده توضح أنك مسلم تشهد ألا اله الا الله وأن محمد رسول الله

تذكرت كل شـــئ عن نفسك

الا هو يتك الاسلاميه التى هى أم من كل شئ

كتبت عن كل شئ تقريبا الا عن هدف المسلم من حياته وهو عبادة الله جل وعلا ونصرة دينه ...

نسأل الله لنا ولك الهدايه

وبارك الله فيك وهدانا واياك الى صراطه المستقيم

Nourhan Sirag said...

hayel ya sambura

sa3b awe el wa7ed ytklm 3n nfso

law etkalmt 3n nafsy hatla3ny we7sha awe :D

صبري سراج said...

سمر..

متشكر اوي وربنا يخليكي ويكرمك وينجحك يا رب

صبري سراج said...

مصعب..

أهلا بيك..

يا سيدي الفاضل

انا قلت اني عايز اعمل شركات انتاج تقدم فن محترم يعرف الناس القيم النبيلة.. تفتكر ده هيكون مبني على إيه غير الدين؟

لما قلت اني نفسي اكون حد مؤثر في الناس وناجح.. ده هيكون ليه؟.. مش لأن ربنا أمرنا اننا نسعى؟

ولا انا لازم اقول اني مسلم وكل واحد اقابله اقول قدامه الشهادتين.. ديني وعلاقتي بربنا متخصش حد غيري وغير المولى عز وجل.. مش لازم كل حاجة اكتبها اجيب فيها سيرة ربنا عشان اثبت اني مسلم وان الدين في دماغي!!

صبري سراج said...

نور

لو كتبتي على نفسك وحش يبقى بتكدبي

mUsLiM said...

ولماذا الدين فقط هو من تذكره تبعا وتعريضا لا أًصلا وتوضيحــا ...؟!!

هذا فضلا , عن أن مقالاتك عن الفن المحترم تحتاج الى ضبط , فما هو ضابط الاحترام عندك ..؟

وليس كل انسان مؤثر وناجح قد أفاد دينه , والواقع يشهد بذلك ...

وانا لا أبتغى من كلامى هذا جدالا عقيما , ولكن هى فكرة يجب أن تسيطر على فكر المسلم

وحقٌ لها أن تسيطـــر

ألا وهى فكرة الاسلام , الذى هو نظارتنا للحياه , ننطلق منها وفيها واليها

وجزاكم الله خيـــرا

والله من ورا القصد

السلام عليكم

صبري سراج said...

ومن قال اني شخصيا اتعرض للاسلام وللدين بطريقة مستترة؟! هل تابعت كل ما أكتب في المطبوعات أو على النت ؟ هل تابعت برامجي الإذاعية أو جلست معي بصفة شخصية حتى تعلم فيما أتحدث وكيف؟

لكن ليس من المعقول أن أقحم الدين في كل حديث .. الدين دائما في القلب لكن لا ينبغي حشره في كل الكلام حتى لا تقع في الخطأ على أقل تقدير والخطأ في الحديث عن الدين مصيبة وأنت تعلم

من نجح وأثر في الناس ولم يخدم دينه فهي مشكلته وليست مشكلتي أنا.. وأنا لست غيري حتى تحكم علي بنفس حكمك على هذا الغير.

أما ضبط مفهوم الفن المحترم عندي فهي قناعات وما أقتنع به أنا ربما لا تقتنع به أنت.. لكن حدود الله معروفة للجميع

دمت بخير

Sarah el eskafy said...

ياجامد
ايه ياواد الجمدنة دى
ده انا قلبى اتقطع

ما قلتش ليه انك منوفى ياصبرى
انت عايزنى اغتالك ولا ايييييييييييه؟

صبري سراج said...

الطبيعي ان البني آدم بيتولد منوفي بالفطرة.. ده شيء بديهي يا سوسة