Saturday, May 24, 2008

El-Desooky crocodile is more famous than lacoste






تمساح سيدهم إبراهيم الدسوقي.. أشهر حاجة ممكن تشتريها من مولد إبراهيم الدسوقي في كفر الشيخ

هحكي لكم حكاية التمساح بس الأول أقول لكم مين هو إبراهيم الدسوقي:

هو ابراهيم الدسوقي الذي يعود نسبه إلى الحسن سبط رسول الله صلى الله عليه وسلم واتولد سنة 633 هجرية

وكان يتحدث اللغات الأجنبية ويجيد السيريانية والعبرية ويحاور الوحوش ويتحدث مع الطيور يعني بالصلاة ع النبي الراجل خد الأوبشن بتاع سيدنا سليمان وكلم الحيوانات والطيور.. يعني معجزة سيدنا سليمان اتكررت تاني مع الدسوقي.. حلو الشغل ده!!



طيب ايه حكاية التمساح بقى؟..قال لك ان كان فيه عيل صغير اسمه تررم.. بلعه تمساح.. قوم أم الولد ده جريت على الدسوقي تستنجد به قوم ابراهيم الدسوقي يأمر واحد من اتباعه انه يروح لحد الشط ويشخط في التماسيح ويقول لهم الواطي اللي بلع الواد يطلع به.. فما كان من التمساح اللي غلط غلطة عمره وبلع الواد إلا أنه طلع وقال أنا ومشي مع التابع لحد ابراهيم الدسوقي ولفظ الواد من فمه حيا!!.. الله اكبر.. قوم إيه كمان.. قال لك ان ابراهيم الدسوقي قرر يعاقب التمساح فأمره إنه يموت فمات في الحال.. عارفين.. نفسي أقول كلمة قبيحة ..



قال الدسوقي أمر التمساح إنه يموت فمات علطول وبعدها احتفظ بفقرة من ضهر التمساح حطوها في المقام بتاعه وبقوا يعملوا التماسيح تمائم ويبيعوها في المولد.. يا صلاة الزين.. هو العته وصل بالمصريين للدرجة دي؟



استنوا.. لسه كرامات الدسوقي مخلصتش.. خدوا دي كمان قال لك الناس كانوا مختلفين على أول يوم رمضان وكان الدسوقي لسه طفل رضيع.. قام لما سمع إذان الفجر لفظ ثدي أمه وصام.. وبكده الناس اقتنعت ان اليوم ده غرة رمضان

كان نفسي اعرف هو اتكلم في المهد زي سيدنا عيسى ولا لا.. بما إنه يعني كلم الحيوانات والطيور زي سيدنا سليمان.. ولا لا أنبياء مين بقى.. الراجل بقى عنده قدرات الهية كمان وقال للتمساح موت والتمساح مكسرش كلامه وعملها



آدي حكاية من ضمن حكاوي كتير لموالد كتير بنعملها لناس منعرفش اصلهم او فصلهم مجردت عادات خبيثة توارثناها من ناس جهلاء وناس خبيثة زورت في التاريخ ولعبت في عقول الناس الملعوب في أساس عقولها أساسا.. انتظروا المزيد

29 comments:

Sarah el eskafy said...

ياسلاااااااااااااااام
دى البلد دى فيها العجب

Anonymous said...

خد الأوبشن بتاع سيدنا سليمان

هههههههههههههههههه

بص


انا معاك

شكلك هتعمل حاجة فى الموالد

انا متشوق اعرف الباقي

الموضوع عبقري



تهامي

Ma7moud So3ody said...

ياجامد
تحفه اخر حاجه

إسلام منسي said...

يا صلاة الزين يا صلاة الزين

Anonymous said...

هههههههههههههه تمساح حته وحده

ايه الذكاء دا كلو لا وحكمه محصلتش دا مفروض يتكتب عنو فجينز :D

يا رب ارحمنا من هبل دا

عمو صبري والله برافو ومستنيين الباقي

missAlgiers

صبري سراج said...

سوسة

آي نعم فيها العجب العجاب.. فتح عينك تاكل ملبن

صبري سراج said...

تهامي

انا عايز اوبشن حد يكون واخد icdl و تويفل

صبري سراج said...

سعودي

اهو انت

صبري سراج said...

سلمونتي

عليه افضل الصلاة والسلام

صبري سراج said...

موكا

كالعادة منورة وان شاء الله الجديد قوي

mUsLiM said...

هذه القصه مذكوره فى كتاب الأولياء للنبهانى أظن عن أحد العارفين ..

ولكن ذُكرت مع بعض التعديلات : -

أولا : ان الولى لما أمر التمساح انه يلفظ الولد خلعله أسنانه بالحديد (( علشان يعنى لما يلفظ الواد ميتعورش ))

ثانيا : انه ما أمرش انه يموت , ولكن حكم عليه انه يبقى زى القطه تلعب به الأطفال , فصار التمساح يُلعب به فى سكك المدينه

....

هكذا هى كثير من قصص الصوفيه عفانا الله واياكم

والله من وراء القصد

السلام عليكم

اسامة يس said...

هههههههههههههههه
اضحك الله سنك...

كما تعلم ان منطقة الخرافة تتاخم حدود الدين والصراع بينهم ابدي...
والاختلاط بينهم في الفهم الانساني جد عميق لا يسلم منه الا من رحم ربي...
ودائما العقل الانساني يحاول ان يتمسك بغيبيات خرافيه تجعله قادر على قهر الطبيعة واذلالها كما تفعل هي...
لذلك يلجأ لحلول من هذا القبيل
موضوع جميل...
وفيه شغل..
دمت بكل ود
خالص تحياتي ....

Ahmed Gamal said...

طب مفيش معجزة من ضمن معجزات سيدي الدسوقي دي تقلنا امتى الكبير هينتقل الي رحمة الله

او فودافون هترخص امتى سعر الدقيقة اهو حاجة نستفيد بيها بدل العته دا

مش عارف باي منطق الناس بتصدق الكلام دا وتمشي وراه

موضوع جامد يا صبورتي اكيد دي بركة اونكل الدسوقي

صبري سراج said...

مصعب..

تعليقك اضاف للموضوع

جزاك الله خيرا

صبري سراج said...

أسامة

تعليقك دائما ما يضيف.. أحبك في الله

دمت بكل خير

صبري سراج said...

جيمي

مبروك المدونة يا برنجي

ومنور المدونة

عثل يا واد طول عمرك

Anonymous said...

المشكلة يا صبري انك لو حاولت تناقش الناس اللي مقتنعة بالحاجات دي تبقى زي ما تكون كفرت

انا اعرف حد كبير في السن و راجل محترم دايما في سيرة الحاجات دي و لو فكرت ان انت تناقشه تبقى انت جاهل و مبتفهمش و فيه حاجات فوق علمك !!!

و دي حاجات ربنا وهبها و اكلام بيها بعض البشر مش كل البشر !!!!

طب لما هو كدة نعلنها ليييه

تفرقة عنصرية ؟؟؟

انا بجد الموضوع دة اثر على حياتي بشكل فوق ما تتصوره

و لو ححطيلط في المواضيع دي حكتب مجلدات

و الله بقيت مبحبش احكي في المواضيع دي خوف لا يطلعو هم صح و انا فعلا مش فاهمة!!!!!!!!!!!!!!!!!!!!!!!!!!!!!!!!

Anonymous said...

ااها انا لينو بالمناسبة بس داخلة من الشغل مقدرش ادخل بالباس وورد هههههههههه

صبري سراج said...

لينوتشي

العقل والمنطق بيقولوا ان احنا اللي صح

خلي عندك ثقة في ده

Fatma said...

من يوم ما نزلت موضوع المولد وانا عايزة اعلق وكل شوية يحصل حاجة وماردش :)

انا عمري ما شوفت مولد في الحقيقة

ونفسي اروح اتفرج بس من اللي سمعته بحس اني خايفة

المرة الوحيدة اللي كنت موجودة في مولد بس ما شوفتش حاجة كان مولد الحسين

كنت رايحة خان الخليلي في شهر 7

اول ما وصلت لاقيت زحمة غير ادمية سألت فيه ايه قالولي مولد الحسين مشيت

بس انا عارفه ان فضولي مش هيقدر يقاوم كتير وعارفه اني هروح قريب اي مولد اتفرج

انا مش متخيلة ان في ناس بتعمل الحاجات دي من كل عقلها

مش عارفه ليه حاسة انهم كلهم بيشتغلوا بعض :)

صبري سراج said...

فيهم اللي بيشتغل الناس وفيهم اللي مش عايز يفكر يا فنون

Fatma said...

نسيت اقولك ان الموضوع حلو اوييييييي

ومستنية الباقي :)

صبري سراج said...

يخليكي ليا يا رب:$

بنت مصريه said...

انت عارف يا صبرى ان الموالد اصلا حرام
يعنى بدعه مكنتش موجوده ايام الرسول عليه الصلاه والسلام
بس الجهل بقى تقول ايه
بوست جميل
اتمنى تنورنى

صبري سراج said...

سلمى أهلا بيكي.. وطبعا لا جدال في حرمانية الموالد

Yasmine said...

والله ما انا احلف:D
انا كل شوية بدخل هنا على انى الاقى البوست الجديد مهتمة اوى بموضوع الموالد ده و عرفت منك حاجات كتير متتأخرش على الجمهور بقى:)

صبري سراج said...

ما هم بنات مصر كتروا اوي بصراحة.. يخرب بيت كده يعني lol

محمد حمدي said...

جامد جامد جامد يا صبرى

كمل ولو كده والنعمه ممكن تنزل كتاب عن الموالد

تحياتى يا ابن والدى

Anonymous said...

إنت مصيبة والله :D
أنا سمعت الكلام ده فعلا في بلدنا وزيادة...بس المصيبة اللي بجد بقى،إن ناس مثقفة ومتعلمة مصدقاه
ميناس خطاب