Monday, May 14, 2007

!!..أنا مش رومانسي




القمر



البنت دي زي القمر .. لا دي أجمل من القمر .. قمر 14 يا ناس..!!


كلام كتير بسمعه لما حد بيعلق على جمال إحدى بنات حواء أو العكس – ودا طبعا قبل ما يتعمل update للمصطلحات دي بمصطلحات روشة تناسب لغة العصر زي مزة مثلا!!- يرجع مرجوعنا للمصطلح قمر , الناس كلها شايفة القمر جميل لدرجة مدحهم لبعض بتشبيه الفرد لغيره بالقمر .. مش عارف أنا ليه مش شايف كدا؟!


أنا بشوف القمر دا مجرد بقعة بيضاء في سماء سوداء بلا أي معنى ولا هدف لأاني أصلا مش مقتنع بفكرة إن القمر بينور ليالينا إلا لو كان نوره دا زي نور الضيوف كدا اللي بنقول لهم دايما نورتونا أو نورتوا البيت مش عارف ليه!!


وبالتبعية طبعا عمري ما شفت القمر رومانسي لأن معلوماتي الجغرافية عنه بتقول إنه مجرد مساحة صخرية مفيهاش أي حياة .. تبقى فين الرومانسية بقى ؟!



النيل



واحد واخد خطيبته وبيتفسح معاها ع الكورنيش ومشاهد مكررة للحبيبة اتنين اتنين فوق كوبري قصر النيل , وفي حديقة احمد رامي اللي في المنيل وكل الأماكن اللي زي دي , وصديقي يقول لي النيل دا صاحبي اللي بشكيله همي وارتاح!!


أيضا ليه معرفش عمري ما حسيت الإحساس دا مع النيل ولا أدري سببا لربطه بالرومانسية والراحة النفسية , عمري ما وقفت على النيل وملقتش الزبالة على جانبيه أو في مجراه ولا عمري شفت مياهه بلون غير الأسود وطول عمرها راكدة ولا تحرك أي مشاعر .. هي فين الرومانسية؟!



حليم



كل المحبين بيسمعوا حليم لأن صوته فيه احساس كل العشاق ,, لو مش بتسمع حليم لما تحب هتسمعه ,, حليم دا اسطورة الحب في كل زمان ,, يالهوي هو فيه زي حليم..!!


وآديني حبيت وبرضه لا حبيت حليم ولا اتأثرت به ولا عمري حسيته غير في غنوة واحدة اسمها عدى النهارد ودي كان بيحب فيها مصر بجد مش تمثيل.



أنا بقى عايش رومانسيتي شكل تاني , بعيشها رحلة بين ورقتي وقلمي , وبعيشها في لون سماء صافية بترسملي سحابة شكل حبيبتي , وبعيش رومانسيتي مع محمد فؤاد أصله بيترجم إحساسي بالضبط لا بيقلل منه ولا بيزودها ويأفور . تفتكروا عشان مبحبش النيل ولا القمر ولا حليم أكون مش رومانسي؟! .. شيء غريب إنك تربط احساس التاس بالحب مهما كان اختلاف طرقهم في استشعار الاحساس دا بتابوهات الناس تفضل ترددها وتتعامل معاها وهي لا فاهماها ولا حسها..!!


12 comments:

مشربية said...

اولا فعلا صح هي تابوهات و الناس مؤمنة بيها
ثانيا: في جملة قلتها سعاد حسني لمحمود ياسين في فيلم الغرباء "القمر عبارة عن سخر و بندوس برجلينا علية و بكرة انت كمان هادوس علية برجليك" فا الجمال بينداس علية يا صبري و دة اللي الناس اكتشفتة بس للاسف مايقدروش يعترفوا
احساسي بالنيل للاسف ارتبط بمشهد احمد السقا و هو بيرمي نفسة من كبري قصر النيل !!!!!!!!
لكن فعلا زي ما قال المذيع النيل اللي بجد في اسوان المياة فيها زرقاء بجد مش اللي عندنا دة
الف شكر يا صبري علي الموضوع

مشربية said...

انا اسف الفيلم :تيتو
المذيع:تامر امين في البيت بيتك

nohamy said...

معقول
لا مش معقول

حب زى ما انت عايز
اكتب أسطورتك الخاصة بنفسك

Anonymous said...

القمر اولا مش مساحه صخريه
تسمحلي اصححلك معلوماتك
القمر جواه براكين وانصهارات متتخيلهاش
وعمرك ما هتقدر تدوس عليه
انا كمان مش بحس بالقمر بس ببصله وانا مسافره وركبه العربيه مش اكتر عشان مفيش حاجه تانيه اشوفها
بالنسبه للنيل
المشكله الي معقداك
فعلا في ناس بتحس بالراحه
انا مثلا مبهداش غير بحجتين موسيقي عمر خيرت والبحر والنيل
ده تاثير خاص جدا مستقل بحاه كل حد لوحده
عارف زي ايه
زي فؤاد الي انت بتحبه
احنا كمان بنحب النيل
اما حليم
عادي براحتك
هو كمان الحقيقه قا عنك انه مش بيسلطفك
وكان كاتب في وصيته انك متسمعهوش
عارف يا صبري اجمل حاجه في الموضوع ايه
انك قدرت تستفذ رائي الي قدامك
وده في حد ذاته مميزات صحفي ناجح
ايه علاء الدين

Sarah el eskafy said...

شوف بقى يا انكل صبرى
انا هقولك على حاجة مهمة جدا
الحاجة دى هتندرج فى كام نقطة
اولا
ربنا يكون فى عونها
ثانيا
القمر اللى انت بتقوله ده قمر بالستر يا صبرى
القمر اللى فى السما ده لما شبهوا زمان البنت الحلوة بيه كانوا يقصدوا ان جمالها بيشد من بين كل اللى حواليها زى ما نور القمر بيشد عين الناس انهم يبصوا للسما
ثالثا بقى ياكابتن
المساحة الصخرية اللى فى القمر واللى مليانة جبال وبراكين وحاجات غريبة كده
ده شئ طبيعى موجود فى حياة كل انسان مفيش حد كيانه املس زى ماانتوا بتطالبوا القمر يكون املس عشان تشبهوا بيه البنت الحلوة دى لانها ممكن البنت الحلوة دى نفسها تبقى حلوة من برة ومن جواها مش حلوة زى القمر:))

نيجى لرابعا يا باشمهندس بقى
النيل ده انا رايى من رايك فيه بس هو حلاوته بالليل عشان مانشوفش الزبالة اللى على جنب دى
وابقى اعتبرها تراوة ياصبرى
ثم ان مين قالك ان النيل دلوقتى رومانسية
ده توفير ياابنى:))

خامسا
انت تحب فؤاد غيرك بيحب حليم كلواحد فى حد بيعبر عنه
ان شالله شعبان عبد الرحيم
عادى

سادسا
يلا بقى ياصبرى انا عايزاك تعترض على كلامى

truelove said...

حقيقي مش عارفة ليه حضرتك مقفلها كده الواحد ما بيصدق يشوف الناس بيقووا على حاجة تفرح علشان يفرح مش علشان يبص عليها من جانمب مظلم وصبح صبح

صبري سراج said...

عسكري .. فعلا النيل في اسوان وبس

واللي شاف نيل اسوان لا يمكن يقتنع بنيل الوجه البحري دا خالص لأنه اشبه بالترع ومصارف الصرف الصحي

صبري سراج said...

بتفهمني دايما يا تهامي وبتعجبني دماغك

صبري سراج said...

آية ميرسي على الكلام اللي جميل اللي انتي قايلاه

بالنسبة للتصحيح المعلومة فطبعا شكرا ليكي

وبالنسبة لحليم فموصلنيش قبل كدا انه مش بيجبني

عموما انا مبكرهوش لكن برضه مش بحبه

لأنه في رأيي أخد اكتر من حقه

صبري سراج said...

مض معترض على ولا كلمة يا سوسة لان ببساطة دا رأيي

انا كاتب الموضوع لأني ضد فكرة التابوهات واننا بنتغلق بأشياء لمجرد ان اللي قبلنا اتعلقوا بيها من غير من نحسها ولا نفهمها

انا معنديش مشكلة على فكرة مع الحاجات اللي اتكلمت عنها

لكن مشكلتي الحقيقية هي التابوه مش عبد الحليم ونيله وقمره

صبري سراج said...

true love

صدقيني انا من النوع اللي دايما يبص لنصف الكوب المليان

بس انا هنا قاصد اتكلم عن فكرة التابوه .. ليه دايما بنتعلق بحاجات مش حاسينها لمجرد اننا وعينا ع الدنيا لقينا اللي قبلنا بيعملوها ؟

Anonymous said...

رغم انى ما احبش اسلوب الاستفزاز فى الكتابة قوى
وعكس اية بشوفه ضعف مش قوة
مع احترامى ليك يا صبرى
لان الكلمة حلوة تجذب اى حد بدون استفذاذ وتلك ملكة لا يملكها الا القليلون

القمر بقى ياسيدى
من رأيى ما أجمله فى ليلة 14
ليه بتبص له بمكبرة
بص له زى ما هو دائرة بيضاء منيرة وسط عتمة الليل كيف لا تكون ابداع حتى لو كان نورها قليل
ده حتى قلة النور هى دى الرومانسية

النيل بقى يمكن اتلوث صحيح بس هناك من ينظر الى الماء فيرتاح
وأنا من هؤلاء
أعترض بقى ...!!!0
وبعدين لما ببص عليه بنسى كل ما اصابه وانظر الى روعة الخالق فيما خلق

حليم بقى من وجهة نظرى ماخدش أكثر حقه
بالعكس هو الوحيد اللى واخد حقه والباقى من الفنانين القدامى مهضوم حقهم
ومش عراف ازاى بتفضل فؤاد عليه

أنا مثلا متيم بعمرو دياب لكن مش ممكن افضله على حليم ليس لاننا تعودنا هذا
ولكن لان هذا هو الواقع فعلا
وكل ما قدمه فؤاد وعمرو مهما بلغ من ابداع لم يصل لقوة ابادع ما قدمه حليم
وبقول لم يصل وليس لن يصل
العيب فى صناع الموسيقى الان لانهم ممكن يقدموا ما يتفوقون به على استاتذتهم بس مقصرين فى حق نفسهم

وهذا رأيي