Tuesday, May 1, 2007

شاي ميزة .. شيشة زغلول .. أهلا بك في قهوة الموظفين..!!



شاي ميزة , حلبة بحليب , شيشة زغلول وعلبة بوكس ينفس أصحابهما مع دخانهما كل مشاعرهم المختلطة , جريدة المساء أو الدستور لو كنت معارض , أشياء أساسية لا يستغني عنها رواد قهوة الموظفين.
من مذياع القهوة يشدو عدوية بموال راحوا الحبايب , الكل يستمع في صمت مدهش وقد حرك الموال البديع شاحنة الذكريات في عقولهم فهاهم يتذكرون الأيام الخوالي.
( راحوا الحبايب بقالهم عام والتاني ) ذكريات العائلة القديمة , الجد الذي لحقوا به في أواخر أيامه , الأب والأم رحمهم الله , بنت الجيران , شلة الصعلكة , عبد الناصر والسادات , مرارة النكسة ونشوة الإنتصار.
( قادرين ع البعد ولا راجعين تاني ) الأخ الأصغر سافر إلى الخليج ,أخذته الدنيا وصار السند ضيفا لشهر كل عام وربما عامان.
( يوم ييجي عقلي في راسي ويوم بيتوه ) حسرة جيل سقطت أحلامه في هوة التحولات السياسية والإقتصادية في تلك الفترة , إشتراكية .. إنفتاح , عشق عبد الناصر الحلم والرمز مع عربدة صلاح نصر , نصر أكتوبر والحيرة في فكر السادات.
خبرة السنون والأحداث لم تفيدهم في معرفة ماهية عصر مبارك , هل نحن في أمان وسلام حقيقي أم أن خيبتنا لم ترد على أحد!!
الأغنية انتهت وفتحت صفحات المساء والدستور , إبراهيم عيسى كاتب حتة مقالة عن التوريث , يا عم إبراهيم عيسى دا مش فالح غير في الشتيمة وهما سايبينه وترجعوا تقولوا البلد مفيهاش ديموقراطية. الأهلي هيكسب كام الماتش الجاي , بيقولوا ابو تريكة مش هيلعب , والله الكورة ما ليها طعم من غيره , أنا مستني ماتش الزمالك دا هيتروق , يا سيدي حرام عليك زمالك ايه .. ليه العكننة دي ع الصبح؟ , على رأيك والله ما في حاجة بقت تفرح البلد دي غير الأهلي. بقول لكم إيه أنا قايم استأذن من الشغل وأقبض الجمعية وأنزل بالعيال أجيب لهم هدمتين عشان الصيف داخل .. سلام.

11 comments:

شيماء الجيزى said...

انها الحرب إذن
يعنى حتى فى مقالاتك العظيمه دى
مش سايب الزمالك فى حاله
يابنى فين الحياد
انت ...بس لما اشوفك
:d
بس بصراحه
لميت مصر كلها
فى قهوة الموظفين
وبجد
الله عليك
سلمت يمناك
تحياتى يا صبرى

صبري سراج said...

متشكر اوي يا شيماء وان شاء الله القادم احسن

وبالنسبة للزمالك فا والله صعبان عليا بجد ونفسي يرجع زي الاول واكتر على رأي هشام عباس

Sarah el eskafy said...

فعلا مفيش غير الاهلى اللى بيفرح البلد دى
صادق ياابنى والله

مبروووووووووك ياصبرى على المدونة
كان نفسى تعملها فى ظروف احسن من كده (اموشن متنرفز)
بس مش مشكلة انا هخلى قلبى ابيض واقولك ربنا يوفقك
وتبقى من اشهر البلوجريين فى مصر

وما تنساش تجيبلى معاك واحد سحلب

محمد حمدي said...

مبروك المدونه يا مسيو صبرى

يجعلها قدم السعد عليك :)

nohamy said...

الموضوع جميل اوي
بس فين القهوة دى بالتحديد

Anonymous said...

يا ريت بلدنا تكون زي القهوة دي بجد مش كلام
الف مبرو ... يا رايس علي المدونة
محمد العسكري

Anonymous said...

كأنى بتفرج على القهوة دى قدامى
أو كأنى قاعد فيها
هو ده صبرى اللى أنا أعرفه
بيقول أنه ماكنش ناوى يبقى صحفى ولا فكر فى ده
ومع ذلك أصبح صحفي محترف
وبقليل من الكلمات تفوق على كثيرين
دخلوا بلاط صاحبة الجلالة من سنين

بجد برافووو يا صبرى

ما تعزمنا على القهوة دى بقى
زى ما الكل طلبوا

وأنا أعمل حسابي فى سحلب

صبري سراج said...

خلاص يا اخوانا عقدت العزم اعزمكم بس يعد الامتحانات احتفالا بالمدونة وبانتهائي من المرحلة الجامعية بعد معافرة 6 سنين

بس كل واحد يحدد هيشرب ايه عشان اعمل حسابي في الفلوس بدل ما نقوم في الآخر نمسح القهوة

Anonymous said...

رغد قلة معرفتي بتلك النوعية من القهاوي..بسبب الغربة..

إلا أنك أطلعتني على الكثير مما يدور بيها..وطبيعة روادها..

تسلم يا صبري..

Anonymous said...

http://markonzo.edu contrasted http://riderx.info/members/atrovent-inhaler-atrovent-facts.aspx http://accutanez.indieword.com/ arresting

gfjghjghghj said...

مشكوووور
..............